Gikan sa Among mga Magbabasa

Estadistika sa Pagpangulipon Naglagot ko sa gisulti diha sa usa ka bahin sa “Pagpaniid sa Kalibotan” nga nag-ulohang “Labing Kusog ug Tubo nga Patigayong Kriminal.” (Disyembre 22, 2000) Ang artikulo nag-ingon nga 11.5 ka milyong ulipon ang gipagawas pinaagig barko gikan sa Aprika sa 400 ka tuig nga pagpangulipon. Ang pagpangulipon natapos sa Tinipong Bansa sa 1865. Ang 400 ka tuig magdala kanimog balik sa tuig 1465​—dugay na una pa mapahiluna ang kolonya sa Jamestown!

M. B., Tinipong Bansa

Sumala sa “Encyclopædia Britannica,” ang pagpadala ug mga ulipong Aprikano nagsugod nga “ingon ka sayo sa katuigang 1450.” Ang mga historyano nag-ingon nga ang gidagit nga mga Aprikano gipangdala ngadto sa mga plantasyon diha sa mga isla sa Atlantiko dugay na una pa makaabot ang pagnegosyog ulipon ngadto sa Caribbeano ug sa Tinipong Bansa.​—ED.

Pagpangawat ug Identidad Akong gibasa ang inyong artikulo nga “Makakawat Sila sa Imong Identidad!” (Marso 22, 2001) uban ang personal nga interes. Dunay mikawat sa numero sa akong deposito sa bangko, naghimog mini nga mga tseke, ug migastog duolan sa $800! Dakong panahon ang akong gigugol aron sa pagtul-id sa kahimtang​—pagsira sa deposito, pagbukas ug bag-ong deposito, ug pagpayl ug sumbong ngadto sa polis. Nakakat-on ako nga mag-amping sa paghatag ug personal nga impormasyon.

D. S., Tinipong Bansa

Ang akong bana mibiyahe alang sa usa ka transaksiyon sa negosyo ug gikawat ang iyang bag apil ang tanan namong credit card ug mga libreta sa tseke. Ang artikulo bahin sa pagpangawat ug identidad nakatudlo kanamo kon unsaon pag-atubang ang kahimtang, lakip ang pagkontak sa mga ahensiyang tigdumala sa panikas sa among lokal nga mga buro sa kredito. Nakasanta kini sa mga kawatan sa pagpangutang ug dugang. Kon ako lang, dili gayod ako makahunahuna sa paghimo niana.

H. C., Tinipong Bansa

Ang Adlaw Sagad akong magpasalamat kang Jehova tungod sa adlaw, sa bulan, ug sa atong matahom nga yuta, apan talagsa ra akong maghunahuna bahin niining maong mga linalang. Human mabasa ang artikulong “Ang Talagsaong Kinaiya sa Atong Adlaw” (Marso 22, 2001), natukmod ako sa paghatag ug kinasingkasing nga pag-ampo, nga nagpasalamat sa Diyos tungod sa iyang dagaya ug bililhong mga gasa.

B. P., Tinipong Bansa

Ako maoy nuybe anyos, ug buot ko kamong pasalamatan tungod sa pagsulat ug makaiikag nga mga artikulo​—sama niining usa bahin sa adlaw. Daghan gyod kog makat-onan inigbasa nako ug Pagmata!

A. B., Tinipong Bansa

Buhok Nagtrabaho ako isip tiggalam sa buhok, ug sa dihang akong gibasa ang artikulong “Pagsusi sa Imong Buhok” (Abril 8, 2001), nalipay ako. Gihatagan nakog kopya ang akong amo. Nakadayeg siya ug gihatag kini ngadto sa ubang mga empleyada sa trabahoan. Salamat nianang mapuslanong impormasyon.

D. L., Romania

Salamat sa potnot nga nagpunting sa kanhing artikulo nga “Alopecia​—Pagkinabuhi nga Mahilomon Tungod sa Pagkawala sa Buhok.” (Abril 22, 1991) Mao kini ang akong problema sulod na sa 17 ka tuig. Niining kalibotan diin ang labing hinungdanong butang mao ang panagway ug diin si bisan kinsa nga lahi isalikway, makapadasig ang pagkahibalo nga ako adunay pagpaluyo ni Jehova ug sa iyang organisasyon.

M. G., Italya

Sugilanon sa Tigdibuho Nag-alagad ako ingong usa ka nagapanawng magtatan-aw sa mga Saksi ni Jehova, ug may kaila ako nga usa ka pamilya diin ang amahan wala gayod mouswag ingong usa ka Kristohanon. Maayo siya nga tawo, apan ang iyang pasatiempo mao ang paggamag mga pigurin sa mga ayroplanong iggugubat. Sa iyang kompiyuter dunay programa sa pagpusilanay sa mga ayroplanong iggugubat ug mogugol siyag daghang oras sa pagtira sa mga ayroplanong iggugubat sa kaaway. Naningkamot kaming tabangan siya nga makita ang panginahanglan nga usbon ang iyang tinamdan bahin sa gubat. Karon nabatonan namo kining maayo kaayong sugilanon bahin kang Dorothy Horle nga may ulohang “Naghimaya sa Pakigdait Inay sa Gubat.” (Abril 8, 2001) Nagplano ako nga hisgotan kining artikuloha uban kaniya.

P. P., Dominican Republic