Ang Iglesya sa Inglaterra—Usa ka Nabahin nga Balay
Ang Iglesya sa Inglaterra—Usa ka Nabahin nga Balay
TINAMPO SA MAGSUSULAT SA PAGMATA! SA GRAN BRITANYA
ANG ika-13 nga Komperensiya sa Iglesya sa Inglaterra sa Lambeth gihimo sa Canterbury sa 1998 duol sa 900-anyos nga katedral niini. Namulong sa maong komperensiya, si Obispo William E. Swing naghisgot sa tin-aw nga obserbasyon: “Ang relihiyon kinahanglang mohunong na sa pagkahimong hinungdan sa kasamok ug magsugod sa pagtaganag kasulbaran. Walay mahitabong kalinaw taliwala sa mga nasod gawas kon dunay kalinaw taliwala sa mga relihiyon.”
Ang pagkabahinbahin nga naglungtad taliwala sa mga relihiyon maoy dayag kaayo, mao man usab ang pagkabahinbahin taliwala sa mga parokyano ug klero sa mao rang relihiyon. Ang usa ka obispo wala motambong sa maong komperensiya, nga ginahimo matag napulo ka tuig sukad sa 1948, tungod kay nanambong ang babayeng mga obispo. Ang pipila nga mitambong supak sa pagpakighisgot bahin sa Bibliya uban niining mga babayhana.
Samtang ang isyu bahin sa pag-ordinar sa mga babaye maoy labawng gihisgotan sa 1988 nga komperensiya, ang homoseksuwalidad mao ang pangunang ulohan nga gilantugian sa 1998. Sa kataposan, ang mga obispo nakahukom nga ang homoseksuwalidad maoy “supak sa kasulatan.” Unsay nakaaghat sa maong desisyon?
Ang usa ka hinungdan mahimong ang mga Anglikano buot maglig-on sa relasyon niini uban sa Romano Katolikong Iglesya. Ug naamgohan nila nga ang ilang iglesya dili makadahom ug pagbayloanayg opinyon tali sa duha ka relihiyon kon padayon nilang dawaton ang mga homoseksuwal diha sa hut-ong sa mga klero. Ang laing nagpaluyong katarongan sa maong desisyon mahimong ang kahadlok sa Islam. Ang pagpasar ug usa ka resolusyon nga nagkonsentir sa homoseksuwal nga mga pari maoy, sama sa giingon sa mga obispo sa Aprika, “kataposan sa ebanghelikal nga panagsultihay” diha sa mga estado nga Islam.
Mahitungod sa laing makapabahin nga isyu sa maong komperensiya, ang The Sunday Telegraph nagtaho: “Diha sa mga bahin sa Aprika, ang pangunang isyu sa mga misyonaryo mao ang poligamiya.” Namalandong sa suliran nga giatubang sa mga Anglikano sa Aprika, usa ka obispo nag-ingon: “Kon dunay usa ka tawo nga mohatag ug dakong amot nga salapi ngadto sa Iglesya apan daghag asawa, unsa may ilang buhaton?” Kay nakamatikod sa gidahom nga resulta sa maong debate, ang The Times sa London nagtaho: “Ang mga obispong Anglikano magpakahilom kon poligamiya ang hisgotan.”
Sa unang higayon, ang mga obispong Anglikano nagdebate bahin sa ilang relasyon uban sa Islam. “Dunay nakagamot na pag-ayo nga pagdumot tali sa mga Kristohanon ug mga Muslim sa Nigeria,” nagtaho ang obispo sa Kaduna, Nigeria, nga nag-angkon nga kapin sa 10,000 ka kinabuhi ang nakalas sa relihiyosong mga panag-away diha sa iyang nasod. Gikaingon nga pinaagi lamang sa pagbaton ug mas maayong pagsabot sa mga pagtulon-an sa Islam nga malikayan ang usa ka relihiyosong gubat diha sa Aprika.
Unsay kaugmaon alang sa 70 milyones ka tawo sa tibuok kalibotan nga, matod sa usa ka gilantugiang pangangkon, mga membro sa Anglikanong iglesya? * Ang kahimtang makapaluya, tungod kay sama sa gitaho sa The Times: “Ang komperensiya nakapakurat sa daghang maniniid ug mga sumasalmot tungod kay usahay kini kaamgid gayod sa usa ka katigoman sa politikal nga partido imbes usa ka Kristohanong iglesya nga nag-ampo.”
Dili ikatingala nga ang The Sunday Times mihinapos nga ‘panag-away ug dili-pagsinabtanay ang nagtimaan sa komperensiya.’
[Footnote]
^ Kining gidaghanona nga 70 milyones “morag makapahingangha,” matod sa The Times, apan “ang talagsa rang isulti mao nga niining gidaghanona, 26 milyones ang sakop sa Iglesya sa Inglaterra. Duolan na lag usa ka milyon karon ang manimba dinhi [sa Britanya], ang nahibilin maoy mga Anglikano sa ngalan lamang.”
[Hulagway sa panid 24]
Katedral sa Canterbury, 900 anyos