Dili-Makadaot nga Pagkaon Alang sa Tanan

MAKAPALIPAY ang pagkaog maayong pagkaon. Apan sumala sa ato nang nasabtan, ang maong pagkaon dili sayon nga mabatonan. Ang daotan pa, minilyong tawo ang diyutay ra kaayog makaon nga dili na sila maghunahuna kon ang ilang pagkaon makadaot ba o makapahimsog. Puliki sila sa pagpangitag igong pagkaon aron lang mabuhi. Gituyo kaha sa Diyos nga maingon niini ang mga butang?

Hunahunaa kini. Sa dihang gibutang sa Diyos ang lalaki ug babaye sa yuta, may hinungdan ba aron mabalaka sila bahin sa pagkaon? Wala, wala gayod! Ang asoy sa basahong Genesis sa Bibliya nag-ingon: “Gipatubo ni Jehova nga Diyos gikan sa yuta ang tanang kahoy nga tilinguhaon sa panan-aw ug maayong kan-on.” (Genesis 2:9) Busa si Adan ug Eva may daghang nagkalainlaing pagkaon maingon man dagaya, walay kataposang suplay. Ang Diyos nga naglalang kanila nahibalo gayod kon unsang nutrisyon ang ilang gikinahanglan; nahibalo usab siya kon unsay makahatag kanilag kalipay. Tinuod, wala kita karon sa tanaman sa Eden. Apan giusab ba sa Diyos ang iyang orihinal nga katuyoan alang sa mga tawo ug sa yuta?

Kita dunay lig-ong katarongan sa pagtuo nga sa dili madugay ang tanan dinhi sa yuta magtagamtam ug daghan kaayong makapahimsog ug maayong pagkaon! Kining maong pagtuo dako kaayog ikatabang aron atong mahuptan ang timbang nga tinamdan bahin sa isyu sa pagkadili-makadaot sa pagkaon karon. Ang maong paglaom, kon segurado ug masaligan, makatabang kanato sa paglikay nga maugmad ang panatiko o naghinobrang mga tinamdan.

 Ngano mang makaseguro gayod kita nga sa dili madugay malahi na ang kinabuhi? Ang madasigong mga estudyante sa Pulong sa Diyos nahibalo nga kita nagkinabuhi na karon sa “kataposang mga adlaw” niining sistema sa mga butang. Ang presenteng sistema gigamhan sa tawhanong kaalam, nga diha sa daghang bahin sa kinabuhi kini walay katinoan ug nagsalig sa pagsulayg lainlaing mga paagi. Kon mahitungod sa mga teknik sa pagproseso sa pagkaon, dunay dakong pagduhaduha kon kini ba dili-makadaot o peligroso. Ang maong pagduhaduha mopahinabog kahadlok, kagubot, ug pagkabahinbahin.​—2 Timoteo 3:1-5.

Ang Maglalalang sa katawhan nagsaad nga kining presenteng sistema sa mga butang pulihan sa usa ka bag-o gayod nga sistema. Ang iyang orihinal nga katuyoan​—nga ang tibuok yuta mamahimong paraiso sama sa tanaman sa Eden, nga pagapuy-an sa malipayon ug himsog nga tawhanong pamilya​—matuman na unya. Ang nagahiusa nga puwersa sa hingpit nga diyosnong kaalam magapuno unya sa yuta. (Isaias 11:9) Dili na maglungtad ang walay-katinoan nga tawhanong kaalam. Ang bag-ong sistema nga himoon sa Diyos magwagtang sa tanang pagduhaduha bahin sa pagkadili-makadaot sa atong pagkaon. Dili ba makataronganon ang paghinapos nga ang Diyos nga naglalang sa mga tawo makasabot usab sa atong mga panginahanglan sa nutrisyon?

Hingpit nga Pagkaon Gikan sa Maglalalang

Ang Bibliya naundan ug buhing mga tagna bahin sa mga kahimtang sa kinabuhi ilalom nianang nagsingabot nga sistema sa mga butang. Si manalagnang Isaias misulat: “[Ang Diyos] tinong maghatag sa ulan alang sa imong binhi nga maoy imong gipugas sa yuta, ug tinapay ingong abot sa yuta, nga mahimo gayong tambok ug mantikaon. Ang imong kahayopan manibsib nianang adlawa sa usa ka luag nga sibsibanan. Ug ang mga baka ug ang hingkod nga mga asno nga nagadaro sa yuta mokaon ug kompay nga sinaktan ug asedera, nga gipaliran pinaagi sa pala ug sa kahig.”

Ang tagna ni Isaias miingon usab: “Si Jehova sa mga panon maghikay gayod alang sa tanang katawhan, niining bukira, ug usa ka bangkete sa mantikaon kaayo nga pagkaon, usa ka bangkete sa bino nga pinalugdang, sa mantikaon kaayo nga pagkaon nga puno sa utok sa bukog, sa bino nga pinalugdang, sinala.” Ang The New American Bible  naghubad nianang ulahing prase nga, “usa ka salosalo sa sustansiyadong pagkaon ug piniling mga bino, dugaon, sustansiyadong pagkaon ug lunsay, piniling mga bino.”​—Isaias 25:6; 30:​23, 24.

Nindot ba kanang paminawon alang kanimo? Ang tagna ni Isaias nagpasalig kanato nga ang tanang magkinabuhi ilalom sa bag-ong sistema sa Diyos makabaton unya ug dagayang pisikal nga pagkaon. Dili kaha kini makadaot nga kan-on? Dili gayod. Ang laing tagna nagpasalig kanato nga ang katawhan sa Diyos “manglingkod, ang tagsatagsa ilalom sa iyang paras ug ilalom sa iyang kahoyng igos, ug walay usa nga magpakurog kanila.” (Miqueas 4:4) Ang maong bug-os nga kasegurohan ipaneguro sa Mesiyanikong Gingharian sa Diyos, nga magsugod sa paggahom sa tibuok kalibotan sa haduol nga umaabot.​—Isaias 9:​6, 7.

Wala na gayod unyay pagduhaduha kon ang pagkaon makadaot ba o dili. Sa kasukwahi, malipay kita sa pagsulti ngadto sa usag usa: “Kaon mog maayo” o “guten Appetit” o “bon appétit.”

[Blurb sa panid 12]

Sa dili madugay ang tanang tawo sa yuta magatagamtam ug daghan kaayong makapahimsog ug maayong pagkaon

 [Hulagway sa panid 10]

Ang Diyos nagsaad ug dili-makadaot, maayong pagkaon alang sa tanan