Gikan sa Among mga Magbabasa
Gikan sa Among mga Magbabasa
Destiyero sa Siberia Buot kong ipahayag ang akong halawom nga apresasyon alang sa sugilanon ni Fyodor Kalin diha sa seryeng “Relihiyon sa Rusya—Unsay Kaugmaon Niini?” (Abril 22, 2001) Makapatandog ang pagbasa bahin sa paghingilin sa iyang pamilya ngadto sa Siberia ug bahin sa kon giunsa nila pagpabiling matinumanon ug malipayon bisan panahon sa kinalisorang mga kahimtang. Nakahigayon ako pagbisita sa pipila sa atong Kristohanong mga igsoon sa Moldova pipila ka tuig kanhi, ug dili ko gayod makalimtan ang ilang mga sugilanon mahitungod sa paghingilin kanila ngadto sa Siberia. Ang ilang pagsalig kang Jehova ug ang ilang pagtuo nakapadasig kanako nga magpabiling maunongon.
G. F., Sweden
Bungol ug Buta Salamat sa artikulo mahitungod kang Janice Adams, “Bisan Bungol ug Buta, Nakaplagan Ko ang Kasegurohan.” (Abril 22, 2001) Wala ko gayod hunahunaa nga dunay usa ka tawo nga bungol ug buta nga makapadasig kaayo kanako. Ang akong bana ug ako nakasinati nag daghang pag-atake sa sakit, sa pisikal ug emosyonal. Ang mga artikulong sama niini mas nagpalig-on sa among pagtuo nga molahutay hangtod sa kataposan.
P. G., Tinipong Bansa
Sagad natong ibalewala ang atong nabatonan, tingali mopaltag usa ka Kristohanong tigom tungod lang kay labad ang ulo. Apan bisag dunay daghang katarongan si Janice nga magpabilin sa balay—sama sa iyang depresyon ug sa pag-abuso nga iyang giantos—misalig siya kang Jehova nga mohatag kaniya sa gikinahanglang kalig-on aron magkinabuhing aktibo sa espirituwal.
C. D., Italya
Ako maayo kaayog panglawas, busa lahi ang akong kasinatian nianang iya ni Janice. Apan tungod sa pagpang-abuso nga nasinati ko diha sa tunghaang elementarya, ako sagad mag-antos sa depresyon. Ako magsigeg hilak ug lain gayod kaayo ang akong gibati. Akong nadawat ang pagdasig gikan sa kaubang mga Kristohanon ug pagpaluyo gikan sa akong mga ginikanan. Bisan pa niana, ako kinasingkasing nga nagpasalamat kaninyo sa sugilanon ni Janice Adams. Nakahatag kini kanako ug kaisog.
M. T., Japan
Mga Apohan Salamat sa artikulo nga “Mga Batan-on Nangutana . . . Nganong Kinahanglan Nakong Masinati ang Akong mga Apohan?” (Abril 22, 2001) Ang akong lola ug ako suod gayod kaayo. Sa dihang nagbulag ang akong mga ginikanan, daghan akog mga pangutana ug sagad mohilak. Ang akong lola anaa kanunay, andam nga motabang kanako. Iuban ko niya sa pagsangyaw, nga magsilsil kanako sa gugma alang sa ministeryo. Gisubay ko ang iyang mga tunob pinaagi sa pagkahimong bug-os-panahong ebanghelisador upat ka tuig kanhi. Bisan human siya matakboyig sakit nga Alzheimer ug wala na makaila kanako, ang iyang mga mata mosanag sa dihang basahan ko siyag mga teksto mahitungod sa Paraiso. Namatay siya niadtong Septiyembre 2000. Daghan kaayong salamat sa pagtudlo sa mga batan-on sa kahinungdanon sa among mga apohan.
C. R., Tinipong Bansa
Ang akong mga ginikanan nagbulag sulod na sa napulo ka tuig. Tungod sa gipahamtang-sa-kaugalingon nga pagbati sa pagkamaunongon ngadto sa akong inahan, akong giputol ang mga relasyon uban sa pamilya sa akong amahan. Apan human mabasa kining mga artikuloha, akong nakita ang kahinungdanon ug kaayohan sa pagbaton ug maayong relasyon uban sa akong mga apohan. Tungod niadtong mga artikuloha, aduna na akoy binase-sa-Bibliyang mga sugyot alang sa pag-ugmad nianang relasyona.
G. V., Tinipong Bansa
Bisag ang upat nako ka apohan dili mga Kristohanon, aduna akoy maayong relasyon uban nila. Aduna usab akoy “lola” diha sa kongregasyon—usa ka Kristohanong igsoon nga duolan nag 70 anyos. Kon dunay koy problema, basahan ko niyag Bibliya ug dasigon ko niya. Usahay hawiran lang niya ang akong kamot o iya kong agbayan. Usahay, morag parehas lang mig edad.
M. K., Japan