Kon Nganong Gidayeg ang Buluhaton Didto sa Moscow

SA 1998 usa ka sibil nga kaso nga magdili sa kalihokan sa mga Saksi ni Jehova ang gipasaka diha sa usa ka lokal nga korte sa distrito sa Golovinsky sa Moscow. Busa, matingala ka tingali nga ang mga Saksi bag-o lang gidayeg sa lokal nga mga opisyales sa Golovinsky District Administration.

Nganong nakadayeg man sa mga Saksi ang mga opisyales sa Moscow nga, sa samang panahon, gisulayan sa pipila ka tawo nga idili sila diha sa siyudad? Ang mubong pagsubli sa kalihokan sa mga Saksi didto makatubag niana.

Ang mga Saksi sa Moscow

Sa tungatunga sa katuigan sa 1950, ang Moscow maoy usa sa pipila ka kaulohang mga siyudad sa kalibotan diin walay bisan usa ka Saksi ni Jehova ang nagpuyo. Ang hinungdan? Tungod kay gihinginlan na ang mga Saksi sa Moscow, sama sa libolibong Saksi ni Jehova nga nagpuyo diha sa ubang mga dapit sa Unyon Sobyet. Asa dad-on? Ang kadaghanan gidala ngadto sa mga kampo sa pinugos nga trabaho sa Siberia.

Sa paglabay sa mga tuig, ang pipila ka taga-Moscow nagsugod sa pagtuon sa Bibliya uban sa tabang sa mga publikasyon sa mga Saksi, nga gidili niadtong panahona sa Rusya. Sa tungatunga sa katuigan sa 1970, ang pipila nga nahimo nang mga Saksi nagtigom aron magtuon sa Bibliya diha sa apartment ni Murat Shakirov sa Moscow. Sa katuigan sa 1980, ang mga membro niining gamayng grupo nakadani sa daghang uban pa nga magtuon sa Bibliya.

 Sa dihang ang kalihokan sa mga Saksi ni Jehova sa Unyon Sobyet nalegal niadtong Marso 1991, usa ka dakong kongregasyon sa mga Saksi sa Moscow ang nagsugod sa paglihok nga dayag. Libolibo ka tawo ang gustong mahibalo kon nganong ang mga Saksi ginalutos. Ug buot nilang masayran kon unsa gayod ang ginatudlo sa Bibliya. Busa dihang usa ka kombensiyon ang gihimo sa Kiev, Ukraine, sa Agosto 1991, kapin sa 2,000 gikan sa Moscow ang mibiyahe ug mga 890 kilometros aron motambong. Daghan niini nila ang nalakip sa 1,843 nga nabawtismohan didto.

Dihang sa 1993 usa ka dakong internasyonal nga kombensiyon sa mga Saksi ni Jehova ang gihimo sa Locomotive Stadium sa Moscow, 23,743 ka tawo gikan sa kapin sa 30 ka nasod ang mitambong. Pagkatapos nianang tuiga, ang gidaghanon sa mga kongregasyon diha sa siyudad sa Moscow miuswag ngadto sa 21. Karon, mga walo ka tuig sa ulahi, dunay 104 ka kongregasyon diha sa mao gihapong dapit.

Sa Hunyo ug Hulyo niining tuiga, 18,292 ka tawo ang mitambong sa upat ka distritong mga kombensiyon sa mga Saksi ni Jehova sa Moscow, ug 546 ang nabawtismohan. Ang talagsaong pag-uswag sa gidaghanon niadtong miduyog sa mga Saksi sa pagtuon sa Bibliya nakaaghat sa mga lider sa Ortodoksong Iglesya sa Rusya sa pagsulay sa pag-impluwensiya sa mga opisyales sa Moscow sa pagdili sa ilang kalihokan.

Sa sayong bahin sa 1998, ang kaso sa korte nga magdili sa mga Saksi gisang-at sa hukmanan sa Golovinsky. Sa kataposan, sa Pebrero 23, 2001, ang huwes nagpakanaog ug hukom nga ang mga Saksi dili sad-an sa mga sumbong nga gipasaka batok kanila. Apan, sa dihang ang nagdemanda nag-apelar sa kaso ngadto sa mas hataas nga korte sa Moscow, gipadala kinig balik aron timbangtimbangon pag-usab sa unang korte.

Apan, bisan pa sa mga pagsulay sa pipila ka tawo sa pagdili sa mga Saksi, nganong gidayeg man sa lokal nga mga opisyales sa siyudad sa Golovinsky District Administration sa Moscow ang mga Saksi?

May Kalambigitan ang Bag-ong Tigomanan

Sa Disyembre 1998, ang mga Saksi nakapalit ug usa ka dako, dos-andanas nga tinukod duol sa Mikhalkovsky Park. Gigamit kini niadto ingong usa ka kultural nga sentro. Di pa dugay ang mga trabahanteng Saksi nagsugod sa pag-ayo niining dakong pasilidad. Naglakip kini sa lima ka Kingdom Hall, o mga tigomanan, alang sa 22 ka kongregasyon sa mga Saksi ni Jehova.

Niining milabayng Abril 15, usa ka administrador sa  distrito sa Golovinsky ang mihangyo nga sa Abril 21 hinloan sa mga Saksi ang Mikhalkovsky Park. Sa Rusya, naandan na nga ang mga molupyo ug mga grupo sa komunidad makigbahin sa linangkob nga pagpanghinlo sa mga parke ug mga haywey sa komunidad. Sa Abril 17, nagtigom ang mga Saksi aron sabotan ang maong buluhaton. Gikasabotan sa maong tigom nga mga 700 ka trabahante ang gikinahanglan.

Kon Giunsa Pagpalampos ang Buluhaton

Sa Abril 18, dihang gipahibalo sa mga Saksi ang mga opisyales sa distrito sa Golovinsky kon pila ka buok kahig ug ubang mga himan ang gikinahanglan, ang mga opisyales wala makatuo nga duolag 700 ka trabahante ang misanong. Apan, pagka-alas 9:30 s.b., sa Abril 21, dihang nangabot ang mga empleyado sa administrasyon didto sa parke, gatosan ka Saksi ang didto na, apan duna lay 200 ka himan alang sa tanaman nga ilang magamit. Sa ulahi, mga 200 pa ka mga kahig ang gikuha aron gamiton. Kadtong walay mga himan namunit ug basura ug nagsulod niini ngadto sa mga plastik bag. Nagdala pa gani ang mga Saksi ug mga botas ug usa ka sakayan aron gamiton sa paghinlo sa dakong lanaw.

Ang mga hawas sa administrasyon nahingangha sa gihimo sa mga Saksi. Namatikdan nila nga ang mga tawo naghago nga daw naghinlo sila sa kaugalingon nilang propiedad, nga nagtrabaho nga malipayon ug madasigon. Sa katibuk-an, mga usa ka libo ka Saksi ni Jehova ang nakigbahin sa buluhaton didto sa Mikhalkovsky Park, ug kapin sa 250 tonelada nga basura ang nakuha. Kadtong nanimuyo sa maong dapit nag-ingon nga wala nila makita ang parke nga hinlo kaayo sulod sa dugay nang panahon.

Ingon sa gihisgotan sa sinugdan, ang mga opisyales nahingangha sa nahimo ug mapasalamaton kaayo. Usa ka opisyal sa distrito sa Golovinsky misulat: “Ang District Administration sa Golovinsky sa North Administrative  Region sa Moscow nagpasalamat sa relihiyosong komunidad sa mga Saksi ni Jehova tungod sa ilang pagpakigbahin sa pagpanghinlo sa Mikhalkovsky Park.” Usa ka kaubang opisyal nagpahayag ug samang mga pulong sa pagpasalamat, nga mihinapos: “Kining dalayegon ug gikinahanglang buluhaton nakahatag ug kaayohan ug kalipay sa tanang bisita sa parke.”

Bisag gikalipay sa mga Saksi ni Jehova ang pagpatahom sa palibot sa ilang mga propiedad​—ug ang pagpakigbahin sa mga proyekto sama sa gihubit dinhi​—ang ilang pangunang buluhaton karon mao ang pagpaambit sa mga tawo sa maayong balita sa Gingharian sa Diyos, ang kagamhanan nga mopatunghag Paraisonhong mga kahimtang sa tibuok yuta. (Mateo 24:14) Samtang nanghinlo sila sa Mikhalkovsky Park, dunay pipila nga nadunggang mikomento nga ang ilang ginabuhat maoy mapuslanong pagbansaybansay alang sa trabaho inigkahuman sa Armagedon sa pagpatahom sa tibuok yuta.​—Pinadayag 16:​14, 16.

Sa pagkatinuod, ang tanang mahigugmaon sa Bibliya nagpaabot sa panahon sa dihang ang tibuok yuta mahimong samag-parke katahom nga dapit, nga mao gayoy katuyoan sa Diyos sa dihang gilalang niya ang unang tawhanong magtiayon.​—Genesis 1:28; 2:​8, 9, 15; Pinadayag 21:​3, 4.

[Hulagway sa panid 15]

Ang panagkita pag-usab niadtong nagtigom sa apartment ni Murat Shakirov sa tungatunga sa katuigan sa 1970

[Mga hulagway sa panid 16]

Ang upat ka kombensiyon nga gihimo sa Moscow niining tuiga dunay total nga nanambong nga 18,292

[Mga hulagway sa panid 17]

Kining kanhi kultural nga sentro gibag-o aron maigo ang lima ka Kingdom Hall

[Mga hulagway sa panid 18]

Kapin sa 250 tonelada nga basura ang nakuha