Mapasigarbohon sa Iyang Amahan

‘NAKAPAUSBAW kini sa akong pagpasigarbo sa akong amahan!’ matod sa 12-anyos nga dalagita diha sa usa ka sulat ngadto sa sangang buhatan sa mga Saksi ni Jehova sa India. Ang iyang gitumong mao ang artikulo nga “Interesadong mga Amahan Adunay Mas Malipayong mga Anak nga Lalaki,” diha sa seksiyon sa “Pagpaniid sa Kalibotan” sa Agosto 22, 1999, nga Pagmata! Gitaho niini ang konklusyon sa usa ka pagtuon nga kon ang mga amahan magpakitag personal nga interes sa ilang mga anak, sila mahimong mga hamtong nga mas masaligon ug malaomon.

Ang dalagita miingon nga siya mapasalamaton nga siya ug ang iyang kaluhang babaye napanalanginan ug usa ka amahan nga nagpakitag personal nga interes kanila. Nag-ingon siya nga siya nahimuot sa paagi sa pagtaho sa Pagmata! sa mga hitabo sa kalibotan, ug midugang nga “kini usa ka mapuslanon kaayong magasin alang sa mga estudyante karon.”

Aron katabangan ang nabalakang mga pamilya sa pagsagubang sa talagsaong mga problema nga giatubang sa katawhan karon, ang mga Saksi ni Jehova nagpatik ug 192-panid nga librong Ang Sekreto sa Kalipay sa Pamilya. Kini naghatag ug makatabang nga giya alang sa matag membro sa pamilya​—sa mga bana, asawa, ginikanan, anak, apohan​—oo, sa tanan. Lakip sa matulon-anong mga kapitulo niini mao ang “Bansaya ang Inyong Anak Sukad sa Pagkabata,” “Tabanging Mouswag ang Inyong Anak nga Tin-edyer,” “Panalipdi ang Inyong Pamilya Gikan sa Makadaot nga mga Impluwensiya,” ug “Mentinaha ang Kalinaw sa Inyong Panimalay.”

Alang sa imong kopya, palihog pil-api ang nagaubang kupon ug ipadala kana ngadto sa adres nga gipakita sa kupon o sa nahiangayng adres nga nalista sa panid 5 niining magasina. Makabenepisyo ka gikan sa espesipikong mga sugyot nga makatabang kanimo sa pagsulbad sa mga suliran ug paghimo sa pamilyahanong kinabuhi nga malipayon nga maoy katuyoan sa Maglalalang.

□ Interesado akong makadawat ug kopya sa librong Ang Sekreto sa Kalipay sa Pamilya.

□ Palihog kontaka ako mahitungod sa usa ka libreng pagtuon sa Bibliya sa balay.