Tabang ug Kaluoy Gikan sa Daghang Dapit

ANG mga boluntaryo nangabot gikan sa ubang mga dapit sa Tinipong Bansa ug gikan usab sa ubang mga nasod. Ang usa niana nga boluntaryo mao si Tom (makita sa ibabaw), nag-edad ug 29, usa ka bombero nga taga-Ottawa, Canada. Giingnan niya ang Pagmata!: “Nakita nako sa TV ang mga hitabo ug gusto nakong mohatag ug moral nga pagpaluyo sa akong mga isigka-bombero sa New York. Nagdrayb ako paingon sa New York sa Biyernes ug miadto sa Ground Zero sa Sabado aron motabang. Gibutang ako sa gitawag ug bucket brigade, nga maghakot sa binaldeng nangaguba nga bahin sa bilding.

“Gihinayhinay namo pagpala ang mga gun-ob, gianam-anam, nga nangita ug mga butang nga makatabang sa pag-ila sa nangamatay nga mga bombero. Nakakita ko ug usa ka Halligan tool nga gamiton sa pag-abli sa kinandadohang mga pultahan, ug mga pangsumpay sa usa ka hos. Hago kaayo kadto. Uban sa mga 50 ka boluntaryo, gidangtag duha ka oras aron mapuno ang usa ka dump truck.

“Pagka-Lunes, Septiyembre 17, among gikuha ang mga patayng lawas sa pipila ka bombero nga nagdali pag-adto sa maong bilding sa miaging Martes. Dili gyod nako malimtan ang akong nakita​—ang tanang rescue worker nanghunong pagtrabaho, gihubo nila ang ilang mga helmet, ug nanindog—​agig pagtahod sa among nangamatay nga mga kauban.

“Samtang nagtindog ko nga nagtan-aw sa Ground Zero, nakahunahuna ko nga pagkadali ra diayng matapos ang kinabuhi karon. Nakapamalandong ako sa akong kinabuhi, akong trabaho, akong pamilya. Bisan unsa pay mga kapeligrohan, ang akong trabaho mapuslanon gayod​—kay ako makatabang sa mga tawo ug makaluwas gani ug mga kinabuhi.”

Ang mga Saksi Naghatag ug Praktikal nga Tabang

Sa unang duha ka adlaw sa katalagman, mga 70 ka tawo ang midangop sa tibuok-kalibotang hedkuwarter sa mga Saksi ni Jehova. Ang uban kansang hotel nga giabtan nahugno ug wala na silay mga bagahe gihatagag kasak-an ug ilisan. Sila gipakaon. Tingali labi pang hinungdanon, sila gihatagan ug emosyonal nga pagpaluyo sa eksperyensiyadong Kristohanon nga mga ansiyano.

Ang mga Saksi ni Jehova nagpadala usab ug gikinahanglang kasangkapan nga pang-emerhensiya ug mga galamiton alang sa mga search-and-rescue crew nga nagtrabaho diha sa dapit nga nailhan ingong Ground Zero. Gipagamit usab ngadto sa fire department ang mga sakyanan aron ikahatod ang mga bombero sa dapit nga nahitaboan sa katalagman. Si Ricardo (naa sa tuo, sa ibabaw), 39-anyos nga Saksi ug tigkolekta sa mga basura, miboluntaryo usab, duyog sa gatosang uban pa, sa pagpanghakot ug tinoneladang nangaguba  nga bahin sa bilding adlaw-adlaw. Giingnan niya ang Pagmata!: “Ang akong nakita makapahigwaos kaayo, ilabina alang sa mga bombero, nga nangita sa ilang nangawalang mga kauban. Nakita nako sila nga nagbutad sa usa ka buhi pa nga bombero. Ang laing bombero namatay kay nahulogan sa usa ka patayng lawas. Daghang bombero ang nanghilak. Wala nako kapugngi ang akong kaugalingon ug mihilak ko pag-ayo. Nianang adlawa wala nay mas isog pa kay kanila.”

‘Panahon ug Wala Damhang Panghitabo’

Libolibong tawo ang nangamatay sa maong katalagman. Lakip niini ang labing menos 14 ka Saksi, nga didto o duol sa nahitaboan sa trahedya. Si Joyce Cummings, 65 anyos ug nagpuyo niadto sa Trinidad, makigkita unta sa usa ka dentista duol sa World Trade Center. Ikasubo, naatol kadto sa katalagman. Dayag nga natuok siya sa aso ug gidali pagdala sa ospital sa duol. Wala nila maluwas siya. Ang iyang kahimtang maoy usa sa daghang kaso sa mga tawo nga nakaagom sa mga epekto sa ‘panahon ug wala damhang panghitabo.’ (Ecclesiastes 9:11) Siya nailhan ingong masiboton kaayo nga ebanghelisador.

Si Calvin Dawson (tan-awa ang kahon) nagtrabaho sa usa ka brokerage firm diha sa ika-84 nga andana sa south tower. Didto siya sa iyang opisina ug makita kaayo niya ang north tower human gayod sa pagkaigo niini sa ayroplano. Ang iyang amo, nga wala diha sa opisina, mitawag sa telepono aron sa pagsusi kon unsay nahitabo. Siya miingon: “Naningkamot si Calvin sa pagsulti kanako kon unsay iyang nakita. Siya miingon, ‘Ang mga tawo nanglukso!’ Ako siyang giingnan sa paggula dayon ug sa pagpagawas sa uban sa opisina.” Wala na makagula si Calvin. Ang amo mipadayon: “Si Calvin maoy usa ka maayong tawo ug giapresyar namong tanan, bisan kanamong dili mahiligon sa espirituwal nga mga butang. Nakadayeg kami sa iyang pagkadiyosnon ug sa iyang pagkamakitawhanon.”

Laing Saksi nga biktima mao si James Amato (ubos nga bahin sa tuo sa atbang nga panid), amahan sa upat ka anak ug kapitan sa fire department sa New York. Kadtong nakaila kaniya nag-ingon nga isog kaayo siya nga “siya mosaka sa nagdilaab nga bilding bisan pag ang mga tawo nanagan na.”  Gipatas-an ang ranggo ni James ngadto sa pagkahepe sa batalyon bisag patay na siya.

Laing Saksi nga bombero, nga may pito ka tuig nga kasinatian, mao si George DiPasquale. Naminyo siya kang Melissa ug adunay dos-anyos nga anak nga babaye, si Georgia Rose. Ansiyano siya sa Staten Island nga kongregasyon sa mga Saksi ni Jehova ug didto siya sa ikanapulong andana sa south tower sa dihang nahugno kini. Gibuhis usab niya ang iyang kinabuhi samtang naningkamot siya sa pagluwas ang uban.

Duha lamang kini sa gatosan ka bombero, kapolisan, ug mga emergency worker nga nakalasan sa ilang mga kinabuhi samtang maisogon silang naningkamot sa pagluwas sa mga tawo. Ang kaisog niining maong mga rescuer hinungdanon gayod. Ang mayor sa New York City nga si Rudolph Giuliani sa ulahi miingon ngadto sa usa ka grupo sa gipatas-ag ranggo nga mga bombero: “Ang inyong pagkaandam nga mopadayon nga way-kokahadlok sa kinalisdang mga sirkumstansiya maoy inspirasyon namong tanan. . . . Ug . . . wala nay lain pang mas maayong panig-ingnan sa kaisog kay sa Fire Department sa Siyudad sa New York.”

Usa ka Ministeryo sa Paghupay

Sa mga adlaw human sa trahedya, mga 900,000 ka Saksi ni Jehova sa Tinipong Bansa ang mihimog determinadong paningkamot sa tibuok nasod sa pagtanyag ug kahupayan niadtong nagbangotan. Ang gugma sa silingan nagtukmod kanila sa paghupay sa mga nagbalata. (Mateo 22:39) Sa ilang ministeryo naningkamot usab sila sa pagpunting sa bugtong matuod nga paglaom alang sa nagmagul-anong katawhan.​—2 Pedro 3:13.

Ang mga Saksi mabination sa ilang pagduol sa mga tawo. Ang ilang tumong mao ang pagtanyag ug kahupayan gikan sa Kasulatan ug pagsundog sa makapadasig nga panig-ingnan ni Kristo, nga miingon: “Umari kanako, kamong tanang nabudlayan ug nabug-atan, ug ako magapalagsik kaninyo. Isangon diha kaninyo ang akong yugo ug magtuon gikan kanako, kay ako malumog-buot ug mapainubsanon sa kasingkasing, ug kamo makakaplag ug kahayahay alang sa inyong mga kalag. Kay ang akong yugo masayon ug ang akong luwan magaan.”​—Mateo 11:28-30.

Ang grupo sa mga ansiyano gikan sa lokal nga mga kongregasyon sa mga Saksi ni Jehova sa Manhattan gitugotan sa pag-adto sa Ground Zero aron sa pagpakigsulti ug paghupay sa mga rescue worker didto. Maayo kaayo ang reaksiyon. Kining mga ministroha mikomento: “Nagluha ang mga mata sa mga tawo samtang gibasahan namo sila ug mga teksto.” Ang mga rescue worker nagpahulay diha sa usa ka barko nga nagdunggo. “Ang mga lalaki subo kaayo, ang mga ulo nagdungo, nga wala makaagwanta sa ilang nakita. Mitupad mi nila paglingkod ug gibasahan namo silag mga teksto sa Bibliya. Nagpasalamat ug dako ang mga tawo sa among pagduaw, nga nag-ingong gikinahanglan gayod nila kining maong paghupay.”

Kasagaran ang mga tawo nga gikontak human sa trahedya gusto nga may mabasa, ug libolibong brosyur ang gipanghatag kanila. Ang uban niini mao ang Sa Dihang ang Imong Minahal Mamatay, Will There Ever Be a World Without War?, ug Tinuod Bang May Pagtagad ang Diyos Kanato? Dugang pa, ang seryal nga panghapin sa duha ka isyu sa Pagmata! ang gihatagag linaing pagtagad: “Ang Bag-ong Dagway sa Terorismo” (Mayo 22, 2001) ug “Pagsagubang sa ‘Post-traumatic Stress’” (Agosto 22, 2001). Sa daghang kaso gipatin-aw sa mga Saksi ang paglaom sa pagkabanhaw nga anaa sa Bibliya. (Juan 5:​28, 29; Buhat 24:15) Tingali milyonmilyong tawo ang nakadawat niining makapahupay nga mensahe.

Angay Kining Magtukmod Kanato sa Pagpamalandong

Ang mga trahedya sama niining sa New York City angayng magtukmod kanato sa pagpamalandong kon unsay atong ginabuhat sa atong mga kinabuhi. Kita ba nagkinabuhi alang lamang sa mahakogong mga pangagpas, o kita ba naningkamot nga makahatag ug dugang kalipay sa uban? Ang manalagnang si Miqueas misukna: “Unsa ba ang gipangayo ni Jehova kanimo kondili ang pagbuhat sa hustisya ug ang paghigugma sa kalulot ug ang paglakaw nga makasaranganon uban sa imong Diyos?” (Miqueas 6:8) Ang pagkamakasaranganon angayng magpalihok kanato sa pagsusi sa Pulong sa Diyos aron makaplagan ang tinuod nga paglaom alang sa mga patay ug aron mahibaloan kon unsay buhaton sa Diyos sa dili madugay aron mapasig-uli ang Paraisonhong mga kahimtang niining yutaa. Kon gusto nimong mahibalo ug dugang bahin sa mga saad sa Bibliya, giawhag ka namo sa pagkontak sa mga Saksi ni Jehova sa imong dapit.​—Isaias 65:​17, 21-25; Pinadayag 21:1-4.

[Kahon/Mga hulagway sa panid 11]

ANG PAG-AMPO NI TATIANA

Ang biyuda ni Calvin Dawson, si Lena, misugilon sa Pagmata! bahin sa pag-ampo nga gilitok sa iyang siyete-anyos nga anak nga babaye pipila ka adlaw human niya mahibaloi nga ang iyang amahan dili na mopauli. Si Lena nakaampo na, ug si Tatiana nangutana, “Puwede ba kong moampo, Ma?” Misugot ang inahan. Si Tatiana nag-ampo: “Jehova, among langitnong Amahan, buot namong pasalamatan ka niining pagkaon ug niining adlawa sa among kinabuhi. Ug naghangyo kami kanimo nga ang imong espiritu magauban kanako ug kang Mama aron kami malig-on. Ug naghangyo kami nga ang imong espiritu magauban kang Papa, aron nga malig-on siya inigpauli niya. Ug sa dihang mopauli na siya, nga siya unta maayo ra, lig-on, ug malipayon ug himsog, ug makita namo siya pag-usab. Sa ngalan ni Jesus . . . oh, ug ayaw diay kalimot sa pagpalig-on kang Mama. Amen.”

Si Lena, nga wala kaayo makaseguro kon nakasabot ba si Tatiana, miingon: “Tatiana, nindot ang imong pag-ampo. Apan, Day, nahibalo ka ba nga dili na mopauli si Papa nimo?” Dihadiha, milutaw sa panagway ni Tatiana ang iyang kakurat. “Dili na?” siya miingon. “Dili,” miingon ang iyang inahan. “Abi nakog nasultian na ti ka ana. Abi nakog nasabtan nimo nga si Papa nimo dili na mopauli.” Si Tatiana miingon: “Apan pirme ko nimong sultian nga mopauli siya sa bag-ong kalibotan!” Sa kataposan, kay nakasabot kon unsay buot ipasabot sa iyang anak, si Lena miingon: “Pasensiya ka na, Tatiana. Wala ti ka masabti. Abi nakog imong gipasabot nga si Papa nimo mopauli ugma.” Si Lena miingon: “Maayo ang akong gibati sa pagkahibalo nga ang bag-ong kalibotan tinuod gayod para kaniya.”