Gikan sa Among mga Magbabasa

Mga Apohan Mao pay pagkahuman nakog basa sa artikulong “Mga Batan-on Nangutana . . . Sa Unsang Paagi Masuod Ko ang Akong mga Apohan?” (Mayo 22, 2001) Dugay na akong gidasig sa akong mga ginikanan nga magbatog usa ka relasyon uban sa akong mga apohan, apan tungod kay kanunay nga may panagbingkil tali sa akong mga ginikanan ug sa akong mga apohan sa inahan, gibati ko gayod nga dili ko angayng makig-estorya kanila. Kining artikuloha mitabang kanako nga makaamgo nga buot ni Jehova nga makabaton akog usa ka relasyon uban nila. Inay magdapigdapig, ako modapig lamang kang Jehova.

C.L.M., Tinipong Bansa

Pagkaanindot nga mga artikulo bahin sa mga apohan! Nalipay kaayo ako nga gihisgotan ninyo ang pagsulat. Bisag ang uban kanamong ‘batabata pa’​—ako 36 anyos na​—nagtipig sa matag sulat o kard nga gipadala kanamo. Gipabilhan pag-ayo ang pagdawat ug usa ka butang gawas sa mga bayranan ug di-importanteng mga koreyo!

M. Q., Tinipong Bansa

Buot ko kamong pasalamatan tungod sa mga artikulo bahin sa mga apohan diha sa Abril 22 ug Mayo 22, 2001 nga mga gula. Bisan tuod ang akong lola nagpuyo nga layo kanako, aduna akoy suod nga relasyon uban niya. Popareho mig kahimtang sa apohan ug apo nga gihubit diha sa inyong mga artikulo. Usa siya sa mga Saksi ni Jehova, ug nakahatag siya kanakog dakong espirituwal nga kahibalo. Usahay dungan ming mangandam alang sa Kristohanong mga tigom. Ang akong gugma kang Jehova nagakadako matag higayon nga makita ko si Lola nga masibotong nag-alagad kaniya. Kining mga artikuloha nakatabang kanako nga padayong mahuptan kining linaing relasyon. Daghan kaayong salamat!

G. M., Yugoslavia

Aduna koy pangutana. Ang akong lolo sa amahan masakiton kaayo, ug ang akong lola diyutay rag kuwarta. Sa unsang paagi masuod ako kanila kon dili ko sila ikauban aron maglulinghayaw?

T. O., Tinipong Bansa

Ang “Pagmata!” nagtubag: Kon ang imong mga apohan nagpuyo lang sa duol, makahimo ka sa pagduaw kanila o pagpakig-estorya kanila sa telepono panagsa. Kay nagtagad sa ilang kahimtang, mahimo pa gani nimong atimanon ang pipila sa ilang mga panginahanglan. Sumala sa gihisgotan sa artikulo, ang pagsulat mahimong usa ka paagi nga masuod sa imong mga apohan. Sa bisan unsa mang kahimtang, ang imong mga apohan magmapasalamaton gayod sa bisan unsang pakigkontak nga imong himoon kanila.

Mga Telepono Kay nagtrabaho sa departamento sa pisika sa usa ka dakong edukasyonal nga institusyon, ako nakadayeg sa inyong artikulo nga “Ikaw Nakonektar​—Sa Unsang Paagi?” (Mayo 22, 2001) Tin-aw ang pagkasulat niini, ug hinaot makadasig kini alang niadtong naghunahuna nga ang pisika lisod kaayong masabtan.

S. T., Britanya

Salamat sa artikulo nga “Ikaw Nakonektar​—Sa Unsang Paagi?” Kana ang pangutana nga kanunay kong gihunahuna. Usa ako ka estudyante sa hayskul, ug ganahan akong mobasag Pagmata! Dako kaayog gikatabang kining nunot-sa-panahong publikasyon diha sa daghang homwork sa eskuylahan. Daghang salamat sa inyong paghago!

H. W., Tinipong Bansa

Ang kable sa telegrapo nga gipahimutang tabok sa Atlantiko niadtong 1866 dili mao ang una. Ang una gipahimutang tali sa Irlandia ug Newfoundland niadtong 1858. Nahikalimtan kadto tungod kay wala kadto molungtad ug dugay.

L. D., Britanya

Ang “Pagmata!” nagtubag: Ang among artikulo yanong nag-ingon nga “ang usa ka kable sa ‘telegrapo’ malamposong gipahimutang tabok sa Atlantiko tali sa Irlandia ug Newfoundland niadtong 1866.” Sumala sa imong nahibaloan, ang una nakompleto niadtong 1858. Apan, kini nadaot sulod sa pipila ka semana ug human niadto gibiyaan na.