Mga Batan-on Nangutana . . .

Pag-apil-apil sa Okulto​—Unsa ang Kapeligrohan?

INTERESADO ba gayod sa okulto ang mga tin-edyer? Gipaningkamotan kini nga mahibaloan sa usa ka grupo sa mga tigdukiduki pinaagi sa pagsurbi sa mga estudyante diha sa 115 ka eskuylahan sa elementarya ug hayskul. Ang surbi nagpadayag niining mabutyagong mga estadistika: Kapin sa katunga niadtong gisurbi (54 porsiyento) miingon nga interesado sila sa okulto ug sa dili-kinaiyanhong mga butang, samtang un-kuwarto (26 porsiyento) ang miingon nga sila “interesado kaayo.”

Ang mga tigdukiduki sa University of Alaska sa Anchorage misulat: “Ang mga balita diha sa mantalaan ug magasin bahin sa gikaingong pagdagsang sa kalihokan sa satanikong kulto . . . midaghan sa dili pa dugayng katuigan.” Ang mga eksperto nag-ingon nga gamay ra ang lig-ong ebidensiya nga magpamatuod sa giingong pagkaylap sa Satanismo taliwala sa mga batan-on. Bisan pa niana, dili kaduhaduhaan nga daghang batan-on ang naikag sa lainlaing mga bahin sa Satanismo ug sa okulto, bisan pag taphaw ra ang maong kaikag.

‘Unsa ang kapeligrohan sa pag-apil-apil sa okulto?’ mangutana tingali ang ubang mga batan-on. Ingong tubag, tan-awon nato ang pipila ka paagi nga ang mga batan-on nalangkit sa okulto sa sinugdan.

Ang Panghaylo sa Okulto

Ang usa ka artikulo sa U.S.News & World Report nag-ingon nga “ang mga bata ug mga tin-edyer karon makakita ug maladlad sa daghan kaayong makapalibog​—sagad makapatugaw​—nga mga hulagway ug impormasyon nga dili gayod mahanduraw bisan 20 ka tuig kanhi.” Ang pagkamaukiton nakatukmod sa daghang batan-on sa pagbasag mga libro ug mga magasin, pagtan-awg mga video, o pagsusi sa mga Web site diha sa Internet nga nagpasiugda ug mga impormasyon bahin sa okulto.

Sumala pa sa BBC News Online, ang popular nga mga programa sa TV nga nagpasiugdag pagpamarang ug mga bampira “gikaingong nakadasig sa mga bata nga maikag sa pagpamarang.” Ang ubang musika nga heavy metal nagpasiugda usab ug mapintas o demonyohanon nga mga ulohan. Ang kolumnistang si Tom Harpur misulat diha sa mantalaang The Sunday Star sa Toronto: “Kinahanglang mohatag ako ug kusganon kaayong pasidaan sa kon unsay nagakahitabo [sa musika]. . . . Wala pa ako sukad makakita ug bisan unsang butang nga ingon ka mahilayon. Ang mga awit lunlon bahin sa kabuang, pagkanagamhan sa daotang espiritu, mga demonyo, pag-ulag dugo, mga pamalikas, tanang matang sa kapintasan, lakip sa paglugos, pagsamad sa kaugalingon, pagbuno, ug paghikog. Ang kamatayon ug kadaot, mga tagna bahin sa kalaglagan, pagsalikway sa tanang maayo ug pagdawat sa tanang mangil-ad ug daotan​—mao kana ang mga ulohan.”

Ang pagpaminaw ba sa ingon niana nga musika tinuod nga makapahinabog makadaot nga panggawi? Mao gayod kini ang nahitabo labing menos diha sa usa ka kaso​—nianang sa 14-anyos nga batan-on sa Tinipong Bansa nga nagdunggab sa iyang inahan  hangtod namatay ug dayon naghikog siya. Ang mga bungbong sa iyang lawak napunog mga poster sa mga musikero sa heavy metal. Ang iyang amahan mihangyo sa ulahi: “Sultihi ang mga ginikanan nga magbantay kon unsang musikaha ang ginapaminaw sa ilang mga anak.” Siya miingon nga nianang semanahona una pa patya sa iyang anak ang iyang inahan, nagsige siyag kanta ug awit nga rock “bahin sa pag-ulag dugo ug pagpatay sa imong inahan.”

Unya anaa ang mga dula nga magsundog ug karakter, nga ang mga magdudula sa pipila niana magdala sa papel sa mga barangan ug uban pang mga tawo nga nagbuhat ug okulto. Daghan nianang mga dulaa nagpasiugdag demonyohanong kapintasan. *

Bisan pa niana, ang organisasyon sa panukiduki nga Mediascope mitaho: “Gipakita sa mga pagtuon nga ang pagkagusto ug musikang heavy metal mahimong usa ka dakong timailhan sa pagpalain, pag-abusog droga o alkoholikong ilimnon, mga sakit sa kaisipan, kapeligrohang maghikog . . . o mapangahasong mga kinaiya panahon sa pagkabatan-on, apan ang musika dili mao ang hinungdan niining maong mga panggawi. Gituohan nga ang mga tin-edyer nga nakigbisog nang daan nianang mga problemaha madani tingali sa musikang heavy metal, tungod kay ang mga pulong niini nagpahayag sa ila mismong mga kabalaka.”

Dili tingali magkauyon ang tanang tigdukiduki bahin sa mga kapeligrohan sa pagpaminaw ug satanikong musika. Apan dili ba makahilo ang kanunayng pagtan-awg mga video, pagpaminaw ug musika, o pagdulag mga dula nga nagpasiugda ug kapintasan o pagdaot sa kaugalingon? Apan, alang sa mga Kristohanon ang pag-apil-apil sa okulto mohatag ug mas dako pang kapeligrohan.

Ang Panglantaw sa Diyos Bahin sa Okulto

Sa 1 Corinto 10:​20, gipasidan-an ni apostol Pablo ang mga Kristohanon: “Dili ko buot nga kamo mahimong mga mag-aambit sa mga demonyo.” Kinsa ba gayod ang mga demonyo, ug nganong peligroso man kaayo nga malangkit kanila? Sa yanong pagkasulti, ang mga demonyo maoy mga manulonda kanhi nga mipili sa pagsunod kang Satanas nga Yawa. Ang Satanas nagkahulogang “Magsusupak” ug ang Yawa nagkahulogang “Tigpasipala.” Sumala pa sa Bibliya, kining kanhing manulondang anak sa Diyos naghimo sa iyang kaugalingon nga magsusupak ug tigpasipala  pinaagi sa pagpili nga morebelde batok sa Diyos. Ngadtongadto, iyang gihaylo ang ubang mga manulonda sa pagduyog kaniya diha sa iyang rebelyosong dalan. Busa kining maong mga magkaanib nahimong mga demonyo.​—Genesis 3:1-15; 6:1-4; Judas 6.

Gitawag ni Jesus si Satanas nga “magmamando niining kalibotana.” (Juan 12:31) Si Satanas ug ang iyang mga demonyo dunay “dakong kasuko” tungod sa ilang nagkaduol nga kalaglagan. (Pinadayag 12:9-12) Dili ikatingala nga nakaplagan niadtong nalangkit sa mga demonyo nga sila maoy mabangis. Usa ka babaye sa Suriname nga nagdako diha sa usa ka pamilya nga nagbuhat ug espiritismo nakasaksi mismo kon sa unsang paagi ang mga demonyo “nalipay sa pagpaantos sa ilang napugos nga mga biktima.” * Busa ang pagkalangkit niining mabangis nga espirituhanong mga linalang sa bisan unsang paagi maoy peligroso kaayo!

Tungod niini, gisugo sa Diyos ang iyang katawhan kaniadto, ang mga Israelinhon, sa paglikay sa tanang buhat sa okulto. “Bisan kinsa nga nagabuhat niining mga butanga dulumtanan kang Jehova,” nagpasidaan ang Deuteronomio 18:10-12. Ang mga Kristohanon gipasidan-an usab nga ‘kadtong nanagbuhat sa espiritismo’ pagalaglagon sa Diyos. (Pinadayag 21:8) Bisan ang taphaw nga pag-apil-apil sa okulto gihukman sa Diyos. “Hunong na sa paghikap sa mahugaw nga butang,” nagsugo ang Bibliya.​—2 Corinto 6:17.

Paglingkawas Gikan sa mga Buhat sa Okulto

Ikaw ba nasayop sa pag-apil-apil sa okulto? Nan tagda kon unsay nahitabo sa unang-siglong siyudad sa Efeso. Daghan didto ang “nanaggamit ug mga kalaki sa salamangka.” Apan ang uban napalihok tungod sa gamhanang mga buhat nga gihimo ni apostol Pablo sa tabang sa balaang espiritu. Ang resulta? “Ubay-ubay niadtong nanaggamit ug mga kalaki sa salamangka nagtapok sa ilang mga basahon ug nagsunog niini atubangan sa tanan. Ug ilang gikuwenta sa tingob ang bili niini ug ilang nakaplagan nga kini mikabat ug kalim-an ka libo ka pirasong plata. Busa sa gamhanang paagi ang pulong ni Jehova padayong mikaylap ug nagmadaogon.”​—Buhat 19:11-20.

Unsa may ginasulti niini kanato? Nga kon buot sa usa ka tawo nga makalingkawas sa pagkontrolar sa mga demonyo, siya kinahanglang magsunog sa tanang butang nga may kalabotan sa satanikong pagsimba! Naglakip kini sa tanang libro, magasin, poster, komiks, video, anting-anting (mga butang nga isul-ob agig “panagang”), ug demonyohanong mga impormasyon nga gikuha gikan sa Internet. (Deuteronomio 7:​25, 26) Ilabay ang bisan unsang butang nga tingali gamiton sa pagpanagna, sama sa mga bolang kristal o mga Ouija board. Wad-a usab ang musika o mga video nga nagpasiugda ug satanikong mga ulohan.

Nagkinahanglag kaisog ug determinasyon aron mahimo ang maong maisogong mga lakang. Apan dako ang mga kaayohan. Usa ka Kristohanong babaye nga ginganlag Jean * mipalit ug usa ka dula sa kompiyuter nga morag dili makadaot sa sinugdan. Sa dihang naabot niya ang lainlaing mga hugna sa maong dula, iyang nadiskobrehan nga dihay mga bahin niini nga may espiritistikong mga kahulogan. Wala magdugay nagsugod ang iyang mapintas ug makahahadlok nga mga damgo! “Mibangon ko ug tungang gabii,” matod pa ni Jean, “ug gilabay ang mga CD sa maong dula.” Ang resulta? “Wala na ako samoka sukad niadto.”

Kon ikaw nagpakitag tinuod nga determinasyon nga makalingkawas, ikaw magmalamposon. Hinumdomi ang determinasyon nga gipakita ni Jesus sa dihang gisulayan paghaylo sa Yawa si Jesus nga simbahon siya. “Si Jesus miingon kaniya: ‘Pahilayo, Satanas! Kay kini nahisulat, “Si Jehova nga imong Diyos ang imong pagasimbahon, ug siya lamang ang imong pagahatagan ug sagradong pag-alagad.”’ Unya ang Yawa mibiya kaniya.”​—Mateo 4:8-11.

Ayaw Pag-inusara sa Pagpakigbugno

Gipahinumdoman kita ni apostol Pablo nga ang tanang Kristohanon “adunay pakigdumog . . . batok sa daotang mga puwersa nga espirituhanon sa langitnong mga dapit.” (Efeso 6:12) Apan ayaw sulayi nga mag-inusara sa pagpakigbugno batok kang Satanas ug sa iyang mga demonyo. Pangayog tabang gikan sa imong mahinadlokon-sa-Diyos nga mga ginikanan ug sa mga ansiyano diha sa lokal nga Kristohanong kongregasyon. Tingali makauulaw ang pagsulti nga ikaw nalangkit niini, apan moresulta kini sa imong pagdawat ug gikinahanglan kaayong pagpaluyo.​—Santiago 5:​14, 15.

Hinumdomi usab nga miingon ang Bibliya: “Sukli ang Yawa, ug siya mokalagiw gikan kaninyo. Duol sa Diyos, ug siya moduol kaninyo.” (Santiago 4:​7, 8) Oo, imong mabatonan ang pagpaluyo ni Jehova nga Diyos! Siya motabang kanimo nga makalingkawas gikan sa lit-ag sa okulto.

[Mga footnote]

[Hulagway sa panid 26]

Wad-a ang tanang butang nga maylabot sa satanikong pagsimba

[Hulagway sa panid 26]

Magbantay sa mga Web site nga nagpasiugda ug espiritismo