Ang Adlaw sa Kasal—Malipayon Apan Hago

GIPADAYAG sa Bibliya nga si Jehova nga Diyos​—kinsa labawng nahibalo sa mga tawo kay kang bisan kinsa​—mao ang naghimo sa unang kasal. Iyang gitukod ang kaminyoon isip pangunang patukoranan sa tawhanong katilingban. (Genesis 2:18-24) Ug sa inspiradong Pulong sa Diyos, ang Bibliya, atong makaplagan ang nagkalainlaing mga prinsipyo nga makatabang sa paggiya kanato sa pagplano sa kasal.

Pananglitan, si Jesus miingon nga ang mga Kristohanon angayng ‘mobayad kang Cesar sa mga butang ni Cesar.’ (Mateo 22:21) Busa, kinahanglang sundon nila ang balaod sa nasod. Ang kasal nga nagtuman sa legal nga mga kinahanglanon magapanalipod niadtong nalangkit sa daghang paagi, sama sa pinaagi sa pagbatbat sa mga responsabilidad ngadto sa mga anak (lakip ang puy-anan, pagkaon ug besti ug edukasyon) ug mga katungod sa panulondon. May mga balaod usab nga gidisenyo sa pagpanalipod sa mga membro sa pamilya batok sa pag-abuso ug pagpanghimulos. *

Ang Pagpangandam

Sa dihang ang parisan makadesisyon na sa pagpakasal ug ang kasal magtuman sa mga balaod ug mga prinsipyo sa Bibliya ingon man sa balaod sa nasod, unsang praktikal nga mga butang ang kinahanglang tagdon? Apil niini mao ang petsa ug ang gustong matang sa seremonyas sa kasal.

“Ang mga ideya sa parisan tingali dili gayod takdo sa iya sa mga ginikanan, ug sila basin malibog tali sa pagpili sa eksakto kon unsay ilang gusto ug sa pagsunod sa mga tradisyon sa pamilya,” matod sa usa ka libro bahin sa ulohan. Unsa ang mahimo? “Kini walay sayon nga mga kasulbaran, gawas nga patalinghogan nga mataktikanhon, bug-os nga hisgotan ang mga suliran, ug pagkompromiso. Kini maoy emosyonal nga panahon alang sa tanan, ug ang diyutay nga abanteng paghunahuna ug pagsabot makatabang ug dako sa pagpasayon pa sa mga kahikayan.”​—The Complete Wedding Organiser and Record.

Bisan pag ang mahigugmaong mga ginikanan dakog mahimo aron paneguroon nga magmalamposon kanang adlawa, angayng suklan nila ang tentasyon sa pagpatuman sa ilang mga kagustohan. Sa laing bahin, bisan pag ang kataposang mga desisyon himoon sa kaslonong babaye ug lalaki, sila angayng mamati sa maayog-tuyo nga tambag. Sa paghukom kon unsang mga sugyot ang dawaton, maayong hinumdoman sa parisan ang tambag sa Bibliya: “Ang tanang butang subay sa balaod; apan dili ang tanang butang may kaayohan. Ang  tanang butang subay sa balaod; apan dili ang tanang butang makapalig-on. Magpadayon pagpangita ang matag usa, dili sa iyang kaugalingong kaayohan, kondili nianang sa laing tawo.”​—1 Corinto 10:​23, 24.

Ang mga pagpangandam naglakip sa nagkalainlaing mga kalihokan, gikan sa pagpadalag mga imbitasyon ngadto sa pag-organisar sa salosalo. “Kon mas hapsay ang maong pagpangandam, kon ipadapat ang mas dakong abanteng paghunahuna ug pagplano, mas menos ang kakapoy ug tensiyon,” matod ni H. Bowman diha sa iyang librong Marriage for Moderns. “Bisan sa labing maayong mga kahimtang,” siya nagpasidaan, “aduna gihapoy kakapoy, ug maalamon nga himoon ang igong paningkamot nga menosan kini.”

Aduna unyay mga pagsugo nga pagatumanon ug mga bisitang abiabihon. Makatabang ba ang mga higala o ang pamilya? Ikadelegar ba ngadto sa ubang kasaligang mga tawo ang pipila ka butang nga dili gayod kinahanglang himoon sa kaslonong babaye ug lalaki?

Ang mga Galastohan

Ang makataronganong badyet gikinahanglan. Dili makataronganon o mahigugmaon ang pagdahom nga ang parisan o ilang mga ginikanan mangutang aron igasto sa kasal nga sobra sa ilang maarangan. Ang daghan nga makaabot sa gasto sa mas engrandeng kasal mopalabi gihapon sa paghimo nianang yano. Bisan kon unsay kahimtang, nasayran sa pipila ka parisan nga makatabang ang pagbatog listahan sa gikalkulo ug sa aktuwal nga gastos. Mapuslanon usab nga adunay gitagal nga mga petsa alang sa tanang butang nga kinahanglang organisahon. Ang pagsag-ulo lamang sa gitagal nga mga petsa lagmit kaayong makapahigwaos.

Pila ang gasto sa kasal? Magkalain ang mga presyo sa nagkalainlaing mga dapit, apan bisan kon hain ka magpuyo, maalamon ang pagsukna sa inyong kaugalingon: ‘Maabot ba namo ang tanan nga among giplano? Kinahanglanon ba gayod kana?’ Si Tina, usa ka babayeng bag-ong kinasal, miingon: “Ang pipila ka butang nga daw ‘kinahanglanon kaayo’ niadtong higayona misangpot nga dili diay kinahanglanon.” Tagda ang gitambag ni Jesus: “Kinsa kaninyo nga buot magtukod ug torre nga dili una molingkod ug kuwentahon ang gasto, aron tan-awon kon siya aduna bay igo aron sa paghuman niini?” (Lucas 14:28) Kon dili ka makaabot sa tanang butang nga imong gusto, ikanselar ang usa ka butang. Bisan pag makaabot kag labaw pa, basin buot gihapon nimong yanohon ang mga butang.

Sa Italya, ang usa ka eksibit nga gihimo sa pagpailaila sa mga serbisyo ug mga baligya alang sa mga kasal mihatag ug gibanabanang mga kantidad kon pilay magasto sa kasagarang kaslonong Italyana. Mek-ap ug kopyur, $450; abang sa maluhong kotse, $300; video sa adlaw sa kasal, $600; album sa kasal (walay labot ang mga letrato), $125-500; mga bulak, gikan sa $600 pataas; kombira, $45-90 matag ulo; boda, nga mosobra pag $1,200. Kon hunahunaon ang kabililhon sa okasyon, hisabtan ang tinguha sa paghimo niana nga espesyal. Apan bisan kon unsa ang nadesisyonan na kinahanglang himoon sa maalamong paagi.

Bisan pag mogastog dakong kantidad ang pipila, ang uban malipay sa pagdaginot​—o mohimo niana kay sila walay laing kapilian. “Kaming duha maoy mga payunir [bug-os-panahong mga ebanghelisador], ug wala kamiy kuwarta, apan kadto dili mahinungdanon,” matod sa usa ka babayeng kaslonon. “Ang akong ugangang-babaye mipalit ug panapton, nga gitahi sa usa ka higala isip iyang regalo sa kasal. Ang mga imbitasyon gisulat nga kinamot sa akong bana, ug gipahulam kamig kotse sa usa ka Kristohanong higala. Alang sa salosalo, gipalit namo ang mga kinahanglanon, ug may mihatag kanamog bino. Kadto dili engrande, apan kadto igo  lang.” Sumala sa usa ka lalaking kaslonon, sa dihang ang pamilya ug mga higala mohatag ug praktikal nga ayuda, “ang gastos mamenosan ug dako.”

Bisan kon unsay ilang kahimtang sa panalapi, ang Kristohanong mga parisan buot molikay sa bisan unsang paghinobra, pagkakalibotanon, o pagpagawal. (1 Juan 2:15-17) Pagkamakapasubo kon ang usa ka malipayong okasyon nga sama sa kasal magpahinabo nga adunay dili makasunod sa Kasulatanhong mga prinsipyo sa pagkamakasaranganon, nga nagpasidaan batok sa sobrang pagkaon, sobrang pag-inom, o sa bisan unsang laing butang nga makapugong sa usa ka tawo nga isipong “dili salawayon”!​—Proverbio 23:​20, 21; 1 Timoteo 3:2.

Likayi ang uso sa pagtinguha nga makabaton ug mas engrande ug mas maayong kasal kay sa uban. Tagda ang mahal kaayong mga belo nga gigamit sa duha ka babayeng kaslonon sa usa ka nasod​—ang usa ka belo 13 metros sa diyametro ug mitimbang ug 220 ka kilo; ang laing belo 300 metros sa gitas-on, nga nagkinahanglag 100 ka abay sa pagkupot niana. Mahiuyon ba sa tambag sa Bibliya nga magmakataronganon ang pagsundog sa maong mga pasundayag?​—Filipos 4:5.

Angay Bang Sundon ang Tradisyon?

Magkalain ang mga tradisyon sa kasal sa nagkalainlaing mga nasod, mao nga imposible ang pagkomento bahin nianang tanan. Sa pagdesisyon kon sundon ba nila ang usa ka batasan, ang parisan maayong mangutana sa ilang kaugalingon: ‘Unsay kahulogan niini? Nalangkit ba kini sa patuotuo nga kana maoy suwerte o panghinaot nga magmasanayon​—sama sa pagsabwag ug bugas humay sa mga bag-ong kinasal? Nalangkit ba kana sa bakak nga relihiyon o sa ubang mga batasan nga gisaway sa Bibliya? Dili makataronganon o dili mahigugmaon ba kana? Makapakaulaw o makapandol ba kana sa uban? Makapatungha ba kanag mga pagduhaduha bahin sa mga motibo sa parisan? Mangil-ad ba kana?’ Kon adunay mga pagduhaduha bahin sa bisan hain niining mga puntoha, mas maayo ang paglikay sa maong tradisyon ug, kon kinahanglanon, abanteng pahibaloon ang mga bisita sa desisyon.

Kalipay ug Emosyon

Ang mga emosyon sa dakong adlaw mahimong gikan sa hilabihang kalipay ngadto sa mga luha. “Dako kaayo ang kalipay, kadto nahisamag usa ka natuman nga damgo,” matod sa usa ka babayeng kinasal. Apan usa ka lalaking kinasal nahinumdom: “Kadto ang labing mangil-ad apan kinamaayohang adlaw usab sa akong kinabuhi. Nanghilak nga todotodo ang akong mga ugangan kay akong gikuha ang ilang panganayng anak babaye, naghilak ang akong asawa sa pagkakita nga naghilak ang iyang mga ginikanan, ug sa kataposan, mihilak usab ako kay wala na ako makaantos.”

Ang mga reaksiyong sama niini angayng dili makapabalaka​—tungod kana sa tensiyon. Ni makapatingala kon medyo madaot usahay ang relasyon sa pamilya, bisan tali sa parisan mismo. “Kon buot sabton, lagmit nga kana ang una nilang kasinatian sa magkauban nga pag-eskedyul sa usa ka dakong okasyon, ug ang kaukyab makaapektar sa usa ka paagi sa ilang relasyon,” matod sa The Complete Wedding Organiser and Record. “Dili maayong mapikal tungod kay dili maayo ang dagan sa kalihokan sumala sa gilaoman; ang pagpangayog tambag ug pagpaluyo sa higayong sama niini maoy labing mapuslanon.”

Usa ka lalaking bag-ong kinasal miingon: “Ang butang nga pabilhan unta nakog dako ug gibasolan ko kanunay mao ang pagkawalay magtatambag nga akong kasumbongan ug kasultihan sa akong mga pagbati sa kahiladman.” Kinsay mas maayong makatuman sa maong papel kay sa usa ka hamtong nga higala o paryente o sa laing eksperyensiyadong tawo diha sa Kristohanong kongregasyon?

Sa dihang makita sa mga ginikanan nga ang ilang anak mobiya na sa balay sa pamilya, sila makasinati sa nagsagol nga kalipay, garbo, kamingaw, ug kahadlok. Apan, sa pagkadili-mahakogon sila angayng makaamgo nga ang panahon miabot na nga ang ilang anak “mobiya sa iyang amahan ug sa iyang inahan” ug mounong sa iyang kapikas ug “mahimong usa ka unod,” sumala sa katuyoan sa Maglalalang. (Genesis 2:24) Sa pagkomento bahin sa iyang reaksiyon ngadto sa pagkaminyo sa iyang panganay nga anak lalaki, ang usa ka inahan nahinumdom: “Mitubod ang akong mga luha, apan dugang pa nianang sa kasubo, may mga luha sa kalipay tungod kay makabaton ug minahal kaayong umagad nga babaye.”

Aron mahimong kahimut-anan ug makapalig-on ang okasyon, ang mga ginikanan​—sama ra gayod sa kaslonong babaye ug lalaki​—kinahanglang magpasundayag sa Kristohanong mga hiyas sa kooperasyon, pagkakalmado, pagkadili-hakog, ug pagkamatinugoton.​—1 Corinto 13:4-8; Galacia 5:22-24; Filipos 2:2-4.

 Ang pipila ka kaslonong babaye mahadlok nga may butang nga madaot sa adlaw sa ilang kasal​—nga mohiyos ang ligid sa kotse ug maulahi sa pag-abot sa seremonyas, nga ang panahon madaot, o sa kataposang gutlo ang boda magisi nga dili na mareper. Lagmit walay usa niana ang mahitabo. Bisan pa niana, mahimong realistiko. Dili molampos sa hingpit ang tanang butang. Kinahanglang dawaton ang mga kapakyasan. (Ecclesiastes 9:11) Paningkamoti nga dili mawad-an sa imong sentido sa pagsiniaw sa mag-atubang ug mga kalisdanan, ug hupti ang positibong panglantaw. Kon adunay masipyat, hinumdomi nga sa umaabot nga katuigan, basin kataw-an mo kana sa dihang imong isugilon kana. Ayaw itugot nga ang gagmayng mga kapakyasan makadaot sa kalipay sa kasal mismo.

[Footnote]

 [Blurb sa panid 7]

“Ang pipila ka butang nga daw ‘kinahanglanon kaayo’ sa maong panahon misangpot nga dili diay kinahanglanon.”—TINA, USA KA BABAYENG BAG-ONG KINASAL

[Kahon/Mga hulagway sa panid 7]

USA KA SAMPOL NGA LISTAHAN SA PAGPANGANDAM *

6 ka bulan o mas pa nga abante

❑ Hisgoti ang mga plano uban sa umaabot nga bana o asawa, mga ugangan, ug mga ginikanan

❑ Desisyoni kon unsang matanga sa kasal ang gusto

❑ Hikaya ang badyet

❑ Susiha ang legal nga mga kinahanglanon

❑ Ireserba ang dapit sa salosalo

❑ Pakigsabot ug letratista

4 ka bulan

❑ Pagpili (gikan sa nabatonang mga sinina), pagpalit, o pagpatahi sa mga besti sa kasal

❑ Pag-order ug mga bulak

❑ Pagpili ug pag-order sa mga imbitasyon

2 ka bulan

❑ Ipadala ang mga imbitasyon

❑ Pagpalit ug mga singsing

❑ Pagkuha sa gikinahanglang mga papeles sa kasal

1 ka bulan

❑ Isukod ang mga sinina sa kasal

❑ Kompirmaha ang mga order ug ang mga kasabotan nga nahimo

❑ Pagsulat ug mga sulat-pasalamat alang sa mga regalo nga nadawat na

2 ka semana

❑ Sugdi ang pagdala sa personal nga mga butang ngadto sa bag-ong puy-anan

1 ka semana

❑ Seguroa nga ang tanang magtatabang nahibalo kon unsay gidahom gikan kanila

❑ Paghikay sa pag-uli sa giabangan o gihulaman nga mga butang

❑ Idelegar ang tanang butang nga posible sa uban

[Footnote]

[Hulagway sa panid 8]

“Kon unsay gihiusa pagyugo sa Diyos ayaw ipabulag ni bisan kinsang tawo”