Ang Kaminyoon Angayng Usa ka Permanenteng Bugkos

SUMALA sa kataposan sa daghang pelikula, ang kasal maoy tilinguhaon nga tumong. Kasagaran, ang lalaki ug babaye sa kataposan magkatagbo, magpakasal, ug magpuyong “malipayon hangtod sa kahangtoran.” Diha sa mga pelikula, kasagarang kana mao ang kataposan sa estorya.

Diha sa tinuod nga kinabuhi, ang kasal maoy, dili ang kataposan, kondili ang sinugdanan sa bag-ong kinabuhi nga magkaipon sa pagpuyo. Ug gilaoman nga, sumala sa giingon sa Ecclesiastes 7:​8, “mas maayo pa ang kataposan sa usa ka butang kay sa sinugdan niini.”

Usa ka Permanenteng Bugkos

Ang pagpanglantaw sa unahan gikinahanglan. Ang kaminyoon kinahanglang adunay lig-ong mga patukoranan aron kini molungtad ug mahimong makapatagbaw. Kon dili, ang kapit-osan nga masinati human sa kasal basin mas dako pa kay sa kapit-osan sa wala pa ang kasal. Ang usa ka Kristohanon dili mahimong magminyo nga naghunahuna: ‘Kon dili molampos, ako makadiborsiyo sa bisan unsang panahon.’ Ang kaminyoon kinahanglang isipon nga usa ka permanenteng bugkos.

Gitin-aw ni Jesus nga ang kaminyoon kinahanglang permanente sa dihang iyang gitubag ang usa ka pangutana nga gisukna kaniya bahin sa pagkaangay sa diborsiyo. Siya miingon: “Wala ba ninyo mabasa nga [ang Diyos] nga naglalang kanila sukad sa sinugdan nagbuhat kanila nga lalaki ug babaye ug nag-ingon, ‘Tungod niini ang usa ka lalaki mobiya sa iyang amahan ug sa iyang inahan ug moipon sa iyang asawa, ug ang duha mahimong usa ka unod’? Mao nga dili na sila duha, kondili usa ka unod. Busa, kon unsay gihiusa pagyugo sa Diyos ayaw ipabulag ni bisan kinsang tawo.”​—Mateo 19:4-6.

Human sa Adlaw sa Kasal

Tukmang giingon nga sa kinabuhi sa usa ka Kristohanon, kon bahin sa pagkahinungdanon, ang pagpakasal maoy ikaduha lamang sa iyang pagpahinungod sa Diyos. Ang pagpahinungod magbugkos sa usa ngadto sa Maglalalang hangtod sa hangtod, ug ang bawtismo magpaila niana sa publiko. Ang kasal mao ang publikong pagpahayag sa panaad nga mounong ngadto sa laing persona​—sa walay kataposan. Imposible nga ipahinungod ang kaugalingon ngadto sa Diyos o makighiusa diha sa kaminyoon samtang adunay seryosong mga pagpanagana. Busa, kadtong naghunahuna sa pagminyo maayong magsusi ug maayo sa mga tinuohan, mga tumong, mga tinamdan, ug kinaiya sa umaabot nga kapikas.

Sa pagpangandam alang sa kasal, ang kalulot, kamahunahunaon, ug espiritu sa kooperasyon maoy hinungdanon. Kanang mga hiyasa labi pang hinungdanon human niana aron magmalamposon ang  kaminyoon. Ang mga bag-ong kinasal nagkahigugmaay, apan human sa kasal angayng hinumdoman nga sa adlaw-adlaw, ang gugma “dili mangita sa kaugalingong kaayohan niini.” Kon ang gugma ipadapat sa sunodsunod nga tuig, “ang gugma dili gayod mapakyas.” (1 Corinto 13:​5, 8) Tungod sa malungtarong gugma, ang mga hiyas sama sa hataas-nga-pailob, kalulot, pagkamaayo, kalumo, ug pagpugong-sa-kaugalingon​—mga bunga sa espiritu sa Diyos​—mas sayong ipasundayag. Kining mga hiyasa gikinahanglan alang sa malamposong kaminyoon.​—Galacia 5:​22, 23.

Ang lisod nga bahin mao ang pagpadayon sa pagpadayag sa maong mga hiyas human sa adlaw sa kasal. Bisan pa niana, ang sekreto sa kalamposan sa pagpadayag sa maong maayong mga hiyas mao kini: Higugmaa ang tawo nga imong giminyoan, ug magmaandam sa paghimog mga pagsakripisyo.

Si Jesus miingon nga ang labing dakong sugo alang sa mga tawo mao ang paghigugma kang Jehova, ug siya miingon nga ang ikaduhang labing dakong sugo mao, “Higugmaa ang imong silingan sama sa imong kaugalingon.” (Mateo 22:39) Ang labing suod nga silingan sa usa ka tawong minyo mao ang iyang kapikas  sa kaminyoon, tungod kay walay butang sa yuta ang mas makapahiusa sa duha ka indibiduwal kay sa kaminyoon.

Ugaling lang, ang lawasnong panaghiusa lamang dili mogarantiya sa panaghiusa sa emosyon. Ang panaghiusa sa duha ka lawas dili kanunayng panaghiusa sa duha ka kaisipan. Aron ang seksuwal nga panaghiusa mohatag ug kinalabwang katagbawan, ang ikaduhang panaghiusa gikinahanglan usab​—panaghiusa sa mga emosyon ug mga intensiyon. Sa kadaghanang kaso, ang paghimog mga pagsakripisyo alang sa laing tawo mao ang bayad aron magmalamposon ang kaminyoon. Kinsa ang angayng mohimo ug mga pagsakripisyo? Ang bana? Ang asawa?

Pagpakitag Gugma ug Pasidungog

Ang Pulong sa Diyos nagsugo: “Manguna sa pagpakitag pasidungog sa usag usa.” (Roma 12:10) Kon makahimo ka, himoa ang pagsakripisyo sa dili pa kana pangayoon sa imong kapikas. Ngani, makunhoran na ang pagkabililhon sa butang nga maangkon na human sa balikbalik nga mga paghangyo. Hinunoa, ang matag kapikas sa kaminyoon angayng mag-ugmad sa batasan nga manguna sa pagpakitag pasidungog sa kapikas.

Pananglitan, ang mga bana gisugo nga “maghatag [sa asawa] ug kadungganan samag ngadto sa usa ka sudlanan nga mas mahuyang, ang babaye, . . . aron nga dili mababagan ang [ilang] mga pag-ampo.” (1 Pedro 3:7) Kon ang usa ka bana dili mohatag ug kadungganan sa iyang asawa, bisan ang iyang mga pag-ampo ngadto sa Diyos madaot. Apan, unsay ipasabot sa pagpasidungog sa imong asawa? Nagpasabot kini nga konsiderahon siya sa tanang panahon, pamatian ang iyang mga opinyon, papilion siya sa nagkalainlaing mga butang sa kadaghanang panahon. Ug ang asawa makapasidungog sa bana sa samang paagi, nga manlimbasog nga mahimong kooperatibo nga katabang.​—Genesis 21:12; Proverbio 31:10-31.

Ang Pulong sa Diyos nag-ingon: “Ang mga bana angay nga maghigugma sa ilang mga asawa sama sa ilang kaugalingong lawas. Siya nga nahigugma sa iyang asawa nahigugma sa iyang kaugalingon, kay wala gayoy tawo nga nagdumot sa iyang kaugalingong unod; kondili nagapakaon ug nagapangga niini, ingon sa ginahimo usab ni Kristo sa kongregasyon.” Unsa ka dakong gugma ang nabatonan ni Kristo alang sa iyang mga sumusunod? Siya andam nga mamatay alang kanila. Ang Bibliya nag-ingon usab: ‘Kinahanglang higugmaon gayod sa matag usa kaninyo [mga bana] ang iyang asawa sama sa iyang kaugalingon.’ (Efeso 5:28-33) Ug ang Pulong sa Diyos nagsugo sa mga asawa “sa paghigugma sa ilang mga bana, . . . nga magpasakop sa ilang mga bana, aron ang pulong sa Diyos dili mapasipalahan.”​—Tito 2:​4, 5.

Magmatinugoton sa mga Sayop

Sanglit ang tanang tawo natawo man nga dili hingpit, sila makahimog mga sayop. (Roma 3:23; 5:12; 1 Juan 1:8-10) Apan inay padak-on ang mga sayop, sunda ang tambag sa Bibliya: “Labaw sa tanang butang, batoni ang mainit nga gugma alang sa usag usa, kay ang gugma magatabon sa daghang sala.” (1 Pedro 4:8) Ang ginagmayng mga sayop madumala nga labing maayo pinaagi sa dili paghunahuna niana, nga kalimtan kana. Mahimong buhaton usab kana sa mas bug-at nga mga sayop. Ang Colosas 3:12-14 nag-ingon: “Isul-ob ninyo ang malumong mga pagmahal sa pagkamabination, kalulot, pagpaubos sa hunahuna, kalumo, ug hataas-nga-pailob. Magpadayon sa pag-antos sa usag usa ug kinabubut-on nga magpasaylo sa usag usa kon ang usa adunay reklamo batok sa lain. Ingon nga si Jehova kinabubut-on nga nagpasaylo kaninyo, buhata usab ninyo ang ingon. Apan, gawas pa niining tanang butanga, isul-ob ninyo ang gugma, kay kini maoy usa ka hingpit nga bugkos sa panaghiusa.”

Kapila ba angay natong pasayloon ang ordinaryong mga sayop ug mga depekto sa atong kapikas sa kaminyoon? Si Pedro nangutana kang Jesus: “‘Ginoo, pila ka higayon nga ang akong igsoon makasala batok kanako ug ako magpasaylo kaniya? Hangtod ba sa makapito?’ Si Jesus miingon kaniya: ‘Ako magaingon kanimo, dili, Hangtod sa makapito, kondili, Hangtod sa kapitoag-pito.’” (Mateo 18:​21, 22) Sanglit si Jesus nagsulti niini bahin kanilang anaa sa gawas sa bugkos sa kaminyoon, ang pagpasaylo tali sa mga kapikas sa kaminyoon labi pang gikinahanglan!

Bisan pag ang institusyon sa kaminyoon giatake sa katuigang bag-o pa, sa kataposan, ang kaminyoon molahutay tungod kay ang Diyos maoy nagsugod niini ug ang tanang butang iyang gilagda maoy “maayo kaayo.” (Genesis 1:31) Dili kini makaraan. Ug kini mahimong molampos, ilabina taliwala kanila nga nagtahod ug nagtuboy sa mga sugo sa Diyos. Apan ang hagit mao: Tumanon kaha sa duha ka indibiduwal ang panaad nga ilang gihimo sa adlaw sa kasal nga maghigugmaay ug magminahalay sa usag usa? Kana mahimong usa gayod ka hagit, ug kinahanglan tingali nimong manlimbasog aron magmadaogon. Apan ang mga resulta maghimo unya sa paningkamot nga mapuslanon!

[Kahon sa panid 10]

DIBORSIYO UG PANAGBULAG

Ang Diyos, ang Tagmugna sa kaminyoon, nagdisenyo niini nga usa ka permanenteng panaghiusa. Apan aduna bay Kasulatanhong pasikaranan nga ang usa ka tawo makadiborsiyo sa iyang kapikas​—ug itugot niana ang posibilidad sa pagminyo pag-usab? Gitagad ni Jesus ang maong butang pinaagi sa pagpahayag: “Ako magaingon kaninyo nga bisan kinsa nga makigdiborsiyo sa iyang asawa, gawas kon tungod sa pakighilawas, ug magminyog lain makapanapaw.” (Mateo 19:9) Ang seksuwal nga pagkamaluibon sa usa ka kapikas mao ang bugtong pasikaranan alang sa usa ka diborsiyo nga ang inosenteng kapikas katugotan sa pagminyo pag-usab.

Dugang pa, ang mga pulong sa Bibliya sa 1 Corinto 7:10-16, bisan pag nagdasig sa mga kapikas sa kaminyoon nga mag-ipon, nagtugot sa panagbulag. Ang pipila, human sa dakong paningkamot nga mapreserbar ang ilang kaminyoon, mobati nga wala silay kapaingnan gawas sa pagbulag. Unsa ang dalawaton nga Kasulatanhong mga pasikaranan alang sa maong tikang?

Ang usa mao ang tinuyong dili pagsuportar. Sa dihang magminyo, ang bana moabaga sa responsabilidad sa pagtaganag pangabuhian sa iyang asawa ug mga anak. Ang lalaki nga tinuyong dili motagana sa materyal nga mga kinahanglanon sa kinabuhi “naglimod sa pagtuo ug mas daotan pa kay sa tawong walay pagtuo.” (1 Timoteo 5:8) Busa posible ang panagbulag.

Ang laing pasikaranan mao ang sobrang lawasnon nga pag-abuso. Busa, kon ang usa ka kapikas mag-abuso sa iyang asawa sa lawasnong paagi, ang biktima makabulag. (Galacia 5:19-21; Tito 1:7) “Si bisan kinsa nga nahigugma sa kapintasan ginadumtan gayod sa kalag [sa Diyos].”​—Salmo 11:5.

Ang laing pasikaranan sa panagbulag mao ang bug-os nga kapeligrohan sa espirituwalidad sa magtutuo​—ang relasyon sa usa uban sa Diyos. Sa dihang ang pagsupak sa usa ka kapikas, tingali naglakip sa lawasnong pagpugong, nagpaimposible sa pagtuman sa matuod nga pagsimba ug nakapameligro sa espirituwalidad sa magtutuo, nan gihunahuna sa pipila ka magtutuo nga gikinahanglan ang pagpakigbulag. *​—Mateo 22:37; Buhat 5:27-32.

Hinuon, kon ang diborsiyo gitinguha ubos sa maong mga kahimtang, ang usa dili libreng makaminyo pag-usab. Sumala sa Bibliya, ang bugtong angayang pasikaranan alang sa diborsiyo nga itugot ang pagminyo pag-usab mao ang pagpanapaw o “pakighilawas.”​—Mateo 5:32.

[Footnote]

[Hulagway sa panid 9]

Ang kaminyoon angayng isipon nga usa ka permanenteng kahikayan

[Hulagway sa panid 10]

Si Jesus miingon nga kita angayng magpasaylo sa “kapitoag-pito” ka higayon