Ang Hunahuna sa Bibliya

Kinsa si Miguel nga Arkanghel?

SUMALA sa Bibliya, adunay minilyong linalang nga manulonda nga nagpuyo sa espirituhanong dapit. (Daniel 7:​9, 10; Pinadayag 5:11) Gikan sa sinugdanan ngadto sa kataposan, ang Kasulatan masubsob nga naghisgot bahin sa mga manulonda nga nagpabiling maunongon sa Diyos. Apan, duha lang niining espiritu nga mga linalang ang ginganlan. Ang usa mao ang manulondang Gabriel, nga personal nga naghatod sa mga mensahe sa Diyos ngadto sa tulo ka lainlaing mga indibiduwal sa yugto nga duolan sa 600 ka tuig. (Daniel 9:​20-​22; Lucas 1:​8-​19, 26-​28) Ang lain nga manulonda nga ginganlan sa Bibliya mao si Miguel.

Si Miguel dayag nga usa gayod ka talagsaong manulonda. Pananglitan, diha sa basahong Daniel, si Miguel gihubit nga nakig-away sa daotang mga demonyo alang sa katawhan ni Jehova. (Daniel 10:13; 12:1) Diha sa dinasig nga sulat ni Judas, si Miguel nakigharong kang Satanas diha sa panaglalis bahin sa lawas ni Moises. (Judas 9) Ang basahon sa Pinadayag nagpakita nga si Miguel nakiggubat kang Satanas ug sa iyang mga demonyo ug gitambog sila gikan sa langit. (Pinadayag 12:7-9) Walay laing manulonda ang gilarawan nga dunay dakong gahom ug awtoridad batok sa mga kaaway sa Diyos. Nan, dili ikahibulong nga tukmang gihisgotan sa Bibliya si Miguel ingong “ang arkanghel,” diin ang nag-unang panglanggikit nga pulong sa Ingles nga “arch” nagkahulogang “pangulo,” o “panguna.”

Kontrobersiya Bahin sa Kailhanan ni Miguel

Ang mga relihiyon sa Kakristiyanohan, maingon man ang Hudaismo ug Islam, dunay nagkasumpaki nga mga ideya bahin sa mga manulonda. Ang ubang mga pagpatin-aw dili klaro. Pananglitan, ang The Anchor Bible Dictionary nag-ingon: “Tingali dunay usa ka labaw nga manulonda ug/o usa ka gamayng grupo sa mga arkanghel (kasagaran upat o pito).” Sumala sa The Imperial Bible-Dictionary, ang Miguel mao ang “ngalan sa usa ka labaw-tawhanon nga persona, nga bahin kaniya dunay kasagarang duha ka magkasumpaking mga opinyon, nga mahimong siya ang Ginoong Jesu-Kristo, ang Anak sa Diyos, o nga siya usa sa gitawag nga pito ka arkanghel.”

Sumala sa tradisyong Hudiyo kining pito ka arkanghel mao sila si Gabriel, Jeremiel, Miguel, Raguel, Raphael, Sariel, ug Uriel. Sa laing bahin, ang Islam nagtuo ug upat ka arkanghel, nga mao, si Jibril, Mikal, Izrail, ug Israfil. Ang Katolisismo  nagtuo usab ug upat ka arkanghel: Miguel, Gabriel, Rafael, ug Uriel. Unsay giingon sa Bibliya? Aduna bay daghang arkanghel?

Ang Tubag sa Bibliya

Gawas kang Miguel, ang Bibliya wala maghisgot ug arkanghel, ni naggamit ang Kasulatan ug terminong “arkanghel” sa dinaghang paagi. Ang Bibliya naghubit kang Miguel ingong ang arkanghel, nga nagpasabot nga siya lamang ang nagdala nianang tituloha. Busa, makataronganon ang pag-ingon nga si Jehova nga Diyos naghatag ngadto sa usa, ug usa lamang, sa iyang mga linalang sa langit ug bug-os nga awtoridad ibabaw sa tanang ubang mga manulonda.

Gawas sa Maglalalang mismo, usa lang ka matinumanong persona ang gihisgotan nga dunay mga manulonda nga ilalom kaniya​—nga mao, si Jesu-Kristo. (Mateo 13:41; 16:27; 24:31) Espesipikong gihisgotan ni apostol Pablo ang “Ginoong Jesus” ug ang “iyang gamhanang mga manulonda.” (2 Tesalonica 1:7) Ug gihubit ni Pedro ang nabanhawng Jesus pinaagi sa pag-ingon: “Siya anaa sa tuong kamot sa Diyos, kay siya miadto sa langit; ug ang mga manulonda ug ang mga awtoridad ug ang mga gahom gipailalom kaniya.”​—1 Pedro 3:22.

Bisan pag walay giingon diha sa Bibliya nga klarong nagpaila kang Miguel nga arkanghel ingong si Jesus, adunay usa ka teksto nga naglambigit kang Jesus sa katungdanan ingong arkanghel. Diha sa iyang sulat ngadto sa mga taga-Tesalonica, si apostol Pablo nagtagna: “Ang Ginoo manaog gikan sa langit uban sa singgit sa pagsugo, uban sa tingog sa arkanghel ug uban sa trompeta sa Diyos, ug kadtong nangamatay nga nahiusa kang Kristo mouna pagbangon.” (1 Tesalonica 4:16) Niining tekstoha si Jesus gihubit nga nagdawat sa iyang gahom ingong Mesiyanikong Hari sa Diyos. Bisan pa niana, siya nagsulti uban sa “tingog sa arkanghel.” Matikdi, usab, nga siya adunay gahom sa pagbanhaw sa mga patay.

Samtang dinhi pa sa yuta ingong tawo, si Jesus naghimo ug daghang pagpamanhaw. Sa paghimo niini, iyang gigamit ang iyang tingog sa pagbungat sa mga sugo. Pananglitan, sa dihang nagbanhaw sa anak sa usa ka babayeng balo sa siyudad sa Nain, siya miingon: “Dong, ingnon ko ikaw, Bangon!” (Lucas 7:​14, 15) Sa ulahi, sa wala pa banhawa ang iyang higalang si Lazaro, si Jesus “misinggit sa makusog nga tingog: ‘Lazaro, gula ngari!’” (Juan 11:43) Apan niining mga okasyona, ang tingog ni Jesus maoy tingog sa usa ka tawong hingpit.

Human sa iyang kaugalingong pagkabanhaw, si Jesus gibangon ngadto sa usa ka “labaw nga katungdanan” sa langit ingong usa ka espiritu nga linalang. (Filipos 2:9) Kay dili na usa ka tawo, siya adunay tingog sa usa ka arkanghel. Busa sa dihang ang trompeta sa Diyos nagpalanog sa pagpanawag ‘niadtong nangamatay nga nahiusa kang Kristo’ nga pagabanhawon ngadto sa langit, si Jesus ‘misinggit sa pagsugo,’ niining higayona “uban sa tingog sa arkanghel.” Makataronganon ang pag-ingon nga arkanghel lang ang makasinggit “uban sa tingog sa arkanghel.”

Oo, adunay uban pang laing mga linalang nga manulonda nga dagko ug ranggo, sama sa mga serapin ug mga kerubin. (Genesis 3:​24; Isaias 6:2) Bisan pa niana, ang Kasulatan nagpunting ngadto sa nabanhawng Jesu-Kristo ingong pangulo sa tanang manulonda​—si Miguel nga arkanghel.