Ang Gresya Nagdepensa sa Relihiyosong mga Katungod

SA UNANG HIGAYON, sa miaging tuig ang gobyerno sa Gresya mitugot nga gamiton sa mga Saksi ni Jehova ang usa sa tinamod pag-ayong mga pasilidad sa esports alang sa usa ka dakong kombensiyon. Kini ang naa-sa-sulod nga Olympic Sportshall, nga makapalingkod ug mga 20,000. Kining air-conditioned nga dapit-dulaanan maoy bahin sa hugpong sa mga pasilidad nga gamiton sa 2004 Olympic Games sa Athens.

Makahuloganon, niadtong 1963 ug 1988, ang mga Saksi nagplano nga mogamit sa dagkong mga pasilidad sa esports sa Athens alang sa ilang mga kombensiyon. Ugaling lang, ang mga awtoridad nagpadaog sa duha ka higayon sa mga panghulga sa Gregong Ortodoksong Iglesya ug gibalibaran ang mga Saksi sa paggamit niana.

Usa ka Lahing Resulta

Niadtong Pebrero 2001, miaplay ang mga Saksi nga mogamit sa Olympic Sportshall​—usa sa pipila ra ka naa-sa-sulod nga mga pasilidad nga may igong gidak-on aron masulod ang ilang gidaghanon. Apan nahibulong sila kon ang kasaysayan masubli ba. Sumala sa gikahadlokan, negatibo ang unang tubag sa mga awtoridad.

Hinunoa, giduol dayon ang tag-as-ug-ranggong mga opisyales nga iladong dili-panatiko ug dili-mapihigon. Sila ba andam molaban sa subay sa batakang-balaod nga mga katungod sa pagsimba ug sa malinawong panagkatigom? Ila bang supakon ang  relihiyosong pagpit-os? Kanay ilang gihimo, ug ang bag-ong desisyon nagbali sa unang pagbalibad. Tungod niadto ang mga Saksi nag-eskedyul sa ilang kombensiyon diha sa Sportshall sa Hulyo 27-29, 2001.

Sa samang panahon, gitugot sa mga awtoridad nga mogamit ang mga Saksi sa laing kontrolado-sa-gobyerno ug naa-sa-sulod nga pasilidad sa esports, ang Palais de Sport sa Thessalonica.

Napakyas ang Grabeng Pagpit-os

Sa nagsingabot ang unang adlaw sa kombensiyon sa Athens, ang makapabalakang mga pangutana nagpabilin: Motuman ba ang mga awtoridad sa ilang kasabotan bisan pa sa pagpit-os sa Ortodoksong klero? Ug mapahimuslan ba sa mga Saksi ang ilang panagkatigom nga dili matugaw sa malapasong mga pundok?

Ang Ortodoksong Iglesya wala mobiya sa karaang mga taktika niini sa pagsulay paggamit sa iyang impluwensiya aron pagtugaw sa kombensiyon. Gibutyag sa mga estasyon sa TV nga giawhag sa Ortodoksong mga klerigo nga dili hisgotan ang kombensiyon. Bisan pa niana, ang mga paningkamot sa iglesya sa kataposan wala molampos.

Katingad-anan, ang Ortodoksong Iglesya nag-akusar sa mga Saksi ingong tigsekreto nga relihiyon. Apan ang iglesya sa aktuwal mao ang naningkamot nga dili mahibalo ang publiko kon unsay nagkahitabo sulod sa Sportshall. Ikalipay, ang maisogong mga tigbalita gikan sa media wala magpadaog sa pagpit-os sa klero. Ilang gihatag ang makaylapon ug dili-mapihigong paghisgot sa kombensiyon.

Labot pa, ang libolibong delegado nakigbahin sa pagpahibalo sa publiko bahin sa kombensiyon ug sa pagpakigsulti kanila bahin sa ilang mga tinuohan. Bisan diin sila nangadto, ang mga delegado nailhan pinaagi sa dalag nilang mga badge sa kombensiyon. Ang daghang tawo nga dili mga Saksi ni Jehova gidapit sa kombensiyon ug misanong, nga nakapauswag sa tumatambong sa kataposang adlaw sa Sportshall ngadto sa 15,760. Sa kataposang duha ka hinapos-sa-semana sa Hulyo, ang mga kombensiyon sa Palais de Sport sa Thessalonica may giipong tumatambong nga 13,173.

Nahingangha ang mga Maniniid

Sa dihang ang usa ka panon sa 2,604 ka boluntaryo​—ang tanan maoy mga Saksi ni Jehova​—mihugop sa Sportshall, nga nanghinlo, namintal, ug nangandam alang sa kombensiyon, ang mga manedyer sa dapit-dulaanan miingon: “Nanganhi kami aron makita mismo sa among mga mata ang butang nga wala pa gayod mahitabo sukad niining dapita.” Usa ka tawo mikomento: “Angayng gamiton ninyo kining pasilidara kada tuig aron kini bug-os mahinloan ug mabag-o.”

Si Andreas Vardakis, direktor sa publikong kahikayan sa Sportshall nahingangha. “Inyong gipatahom kining pasilidara,” matod niya. “Aduna kamiy mga tawo nga nagdumala sa kahikayan sa pasilidad. Apan ang inyong pagpakigbahin mao ang hinungdan nga nagmalamposon kini nga kombensiyon.”

Panahon sa kombensiyon, sa pagkaamgo nga siya dili na kinahanglang magpadalag mga tawo aron pagkontrolar sa malinawong panon, usa ka direktor sa kapolisan mipatugbaw: “Wala pa ako makakita sukad ug hilabihang kamatinahoron ug kahapsay!”

Usa ka Dakong Punto sa Kombensiyon

Sa kataposang pakigpulong sa kombensiyon, gipahibalo nga ang Gregong Ministeryo sa Nasodnong Edukasyon ug mga Relihiyon nag-ila sa mga Saksi ni Jehova ingong “usa ka ilado nga relihiyon.” Dugang pa, ang Ministeryo naghatag ug opisyal nga pag-ila sa nasodnong hedkuwarter sa mga Saksi ni Jehova sa Athens. Ang kasulatan sa gobyerno miingon sa bahin:

“[Ang] Kristohanong mga Saksi ni Jehova giisip sa administrasyon ingong usa ka iladong relihiyon . . . uban ang tanang legal nga mga benepisyo nga mosangpot niana. Ang nahisgotang artikulo sa Batakang-Balaod magapanalipod sa kagawasan sa pagsimba, sa metodo ug mga galamiton sa pagpahayag sa pagsimba, ug ang kagawasan sa pagpili may kalabotan sa metodo sa administrasyon ug organisasyon sa matag simbahan o relihiyosong tigom. Kini nga panalipod tin-awng maglakip sa mga lote sa organisasyon ug sa mga pasilidad sa Marousi [ang sangang buhatan sa mga Saksi ni Jehova ingong] sagrado ug nakonsagrar nga dapit, nga napahinungod sa pagsimba sa Diyos. Ang maong mga pasilidad gitawag ug Bethel, nga mao, ‘Balay sa Diyos.’”

Ang mga Saksi ni Jehova ug ang ubang dapig sa relihiyosong kagawasan, mapasalamaton tungod sa maong mga panghitabo. Ang ilang mga pag-ampo mao nga unta ingong resulta, makapadayon ang mga tawo sa ilang Kristohanong mga kinabuhi nga ‘mahusay ug malinawon, uban ang bug-os nga diyosnong pagkamahinalaron ug pagkaugdang.’​—1 Timoteo 2:​1, 2.

[Mga hulagway sa panid 10]

Ang mga Saksi nagtigom sa Olympic Sportshall

[Credit Line]

Harry Bilios