Ang Yawa—Usa ka Daotan nga Naglungtad Gayod?

DIHA sa daghang pundok sa relihiyon, ang Yawa giisip gayod nga usa ka karaang patuotuo nga minugna sa tawo. Busa si Dionigi Tettamanzi, arsobispo sa Genoa​—usa sa pangunang mga kardinal sa Italya​—nakapukaw ug kagubot tungod sa iyang 40-ka-panid nga sulat ngadto sa mga klero bahin sa kon unsaon sa pagpakig-away sa Yawa. Naglista kini sa “10 ka sugo.”

Una: “Ayaw kalimot nga naglungtad ang yawa,” tungod kay ang iyang “unang pagpamakak” mao ang “pagpatuo kanato nga siya wala maglungtad.”

Ikaduha: “Ayawg kalimot nga ang yawa maoy usa ka manenental. . . . Ayaw paghunahuna nga dili ka maapektohan o dili madutlan.”

Ikatulo: “Ayawg kalimot nga ang yawa labing maalamon ug hait ug salabotan. Siya sa tanang panahon malipoton tungod sa pagkamabihagon, sama sa iyang gihimo sa unang tawo.”

Ikaupat: “Magmabinantayon: sa mga mata ug kasingkasing. Ug magmalig-on: sa espiritu ug kaligdong.”

Ikalima: “Pagtuo gayod nga si Kristo makadaog batok sa manenental” tungod kay kini “mohatag kanimog kalig-on ug kalinaw atubangan sa bisan unsang mapintas kaayong pag-atake nga himoon batok kanimo.”

Ikaunom: “Hinumdomi nga buot ni Kristo nga makaambit ka sa iyang kadaogan.”

Ikapito: “Padayon sa pagpamati sa Pulong sa Diyos.”

Ikawalo: “Magmapainubsanon ug higugmaa ang kaulawan nga modangat.”

Ikasiyam: “Pag-ampo kanunay, nga walay hunong,” aron makabuntog sa tentasyon.

Ikanapulo: “Himayaa ang Ginoo nga imong Diyos ug siya lamang ang simbaha.”

Unsay epekto niining sulat alang sa mga klero? Ang tambag niini wala maangayi sa Milan’s Center of Theological Studies. Ang Center miingon nga ang “teolohikal nga diwa sa sulat morag iya sa Edad Medya nga kaisipan.” Sumala sa usa ka tigpamaba, “ang mga tawo wala nay [kaugalingong] tulubagon kon ipasangil ang tanang butang ngadto sa yawa.”

Bisan pag gipadayag sa Bibliya nga ang mga tawo adunay tulubagon sa ilang kaugalingong mga buhat, klarong gipaila niini si Satanas nga Yawa nga mao “ang diyos niining sistema sa mga butang,” ang usa nga nagtental kang Jesus. Gipadayag usab niini ang gahom ni Satanas ug ang iyang tinguha sa ‘pagbuta sa mga hunahuna sa mga dili-magtutuo.’​—2 Corinto 4:4; Mateo 4:​1-​11.

Sa pagkatinuod, sumala sa gisulat ni apostol Pedro, si Satanas “sama sa usa ka leyon nga nagangulob, nga nagapangitag matukob.” (1 Pedro 5:8) May katarongan nga si apostol Juan nagpahinumdom sa mga magtutuo: “Ang tibuok kalibotan nailalom sa gahom sa usa nga daotan.” (1 Juan 5:19) Maalamon kita nga atong hatagag pagtagad kining mga pasidaana sa Kasulatan.