Mga Batan-on Nangutana . . .

Komosta Kon Duna Koy Ikahibalag nga Eskolmet Samtang Ako Nagsangyaw?

“Ang pag-adto sa eskuylahan sa Lunes maoy alantoson. Kon dunay akong higala nga nakakita nako nga nagsangyaw, mag-imbento ko ug mga estorya. Pananglitan, akong sultian ang akong mga higala nga nangolekta ko ug kuwarta alang sa Partido sa Pamuo.”​—James, Inglaterra.

“Sa eskuylahan bugalbugalan ko sa mga estudyante nga nakakita kanako. Gibati nako ang dakong kapit-os.”​—Débora, Brazil.

NGANONG nahadlok man kaayo kining mga batan-ona nga makita sa ilang mga higala? Sila ba nakigbahin sa usa ka matang sa ilegal nga kalihokan? Sa kasukwahi, sila nakigbahin sa labing dungganon ug labing hinungdanon nga buluhaton nga ginahimo sa yuta karon. Sila nagahimo sa buluhaton nga gisugo ni Jesus sa dihang siya miingon: “Busa panglakaw kamo ug paghimog mga tinun-an sa katawhan sa tanang kanasoran, . . . nga magatudlo kanila sa pagtuman sa tanang butang nga akong gisugo kaninyo.”​—Mateo 28:​19, 20.

Sumala sa Gallup nga surbi sa T.B., kapin sa 90 porsiyento sa mga tin-edyer ang nagtuo sa Diyos. Mga katunga ang mosimba kada semana. Ug bisan tuod daghang batan-on ang nalangkit sa mga kalihokan nga gipaluyohan sa simbahan, sama sa pagkamembro sa koro, pipila lang ang makigsulti sa ilang mga eskolmet bahin sa Diyos. Apan, ang mga Saksi ni Jehova ilado sa tibuok kalibotan tungod sa ilang balay-balay nga kalihokang pagsangyaw. Libolibo ka batan-ong Saksi ang nakigbahin niining buluhatona.

Kon ikaw usa ka batan-ong Saksi, sa walay duhaduha ikaw usab nakigbahin na niining buluhatong pagsangyaw. Apan wala kini magpasabot nga gisayonan ka sa pagbuhat niana. Sama sa mga batan-ong gikutlo sa sinugdan, basin maguol kang maghunahuna sa posibilidad nga makahibalag ug eskolmet samtang nagsangyaw. “Usa sa kinagrabehang mahitabo,” miangkon ang usa ka batan-ong Britaniko nga si Jennie, “mao nga makit-an ako sa usa sa akong mga eskolmet nga pormal ug sinina, nga nagdalag bag sa libro​—nga mas maayog pamiste kay sa anaa ako sa eskuylahan.”

Ang kahadlok nga makasugat ug eskolmet mahimong grabe kaayo nga ang ubang batan-ong mga Kristohanon migamit ug panglansis. Usa ka batan-on nga ginganlag Leon nag-ingon: “May nakaila kong usa ka batan-ong Saksi nga magsul-ob ug dyaket nga adunay pandong samtang magsangyaw, aron nga iya kanang ikatabon sa iyang nawong kon may masugatan siyang mga higala sa eskuylahan.” Ang uban pang mga batan-on maglikay na lang nga mosangyaw sa pipila ka dapit. “Nahinumdom kong nag-ampo  nga dili mi magsangyaw diha sa usa ka dalan,” nahinumdom ang usa ka batan-on nga ginganlag Simon, “tungod kay nahibalo ko nga daghang estudyante nga kaila nako ang nagpuyo nianang dapita.”

Normal nga mobating dili mahimutang kon makasugat ka ug kaila samtang nagsangyaw ka. Apan, ang pagtugot sa maong kahadlok nga mogahom kanimo makadaot lamang kanimo. “Dili gayod maayo ang akong tinamdan sa pagsangyaw,” miangkon ang usa ka batan-ong Aleman nga ginganlag Alicia, “nga kini adunay daotang epekto sa akong espirituwalidad.”

Apan, ngano man nga kinahanglan kang mosangyaw​—ilabina kon malisdan ka sa pagbuhat niana? Sa pagtubag, hisgotan nato kon nganong ang Diyos naghatag kanimo niini nga obligasyon. Dayon ipakita nato kon sa unsang paagi, uban sa paningkamot ug determinasyon, posibleng mabuntog nimo ang imong mga kahadlok.

Ang Obligasyon nga Mosangyaw

Una sa tanan, makatabang tingali kanimo ang pagkonsiderar sa kamatuoran nga walay bag-o o katingad-an bahin sa pagpaambit sa imong pagtuo sa uban. Sukad sa karaang kapanahonan, ang mahinadlokon-sa-Diyos nga mga lalaki ug babaye nagbuhat niana. Si Noe, pananglitan, nailado ingong magtutukod sa dako kaayong arka. (Genesis 6:14-16) Apan sumala sa 2 Pedro 2:​5, siya usab maoy “magwawali sa pagkamatarong.” Gibati ni Noe nga obligado siya nga mopasidaan sa uban bahin sa nagsingabot nga kalaglagan.​—Mateo 24:37-39.

Sa ulahi, bisan tuod ang mga Hudiyo wala hatagig tinong mga sugo sa pagsangyaw ngadto sa mga dili-Hudiyo, daghan ang nakig-ambit sa ilang pagtuo sa uban. Busa, ang usa ka langyaw nga ginganlag Ruth nakahibalo bahin kang Jehova. Mapasalamaton sa iyang Hudiyang ugangan nga si Noemi, si Ruth miingon kaniya: “Ang imong katawhan mahimong akong katawhan, ug ang imong Diyos akong Diyos.” (Ruth 1:16) Sa ulahi, gipakita ni Haring Solomon nga daghang dili-Hudiyo ang mangabot ug makadungog sa “dakong ngalan” ni Jehova ug mosimba diha sa Iyang templo.​—1 Hari 8:​41, 42.

Karon kon kining karaang mga alagad sa Diyos nagwali ngadto sa uban​—bisan pag wala mailalom sa direktang sugo sa pagbuhat niana​—labi na gayong bation sa mga Kristohanon karon nga obligado silang mosangyaw! Kon buot hunahunaon, kita gisugo sa pagsangyaw ‘niining maayong balita sa gingharian.’ (Mateo 24:14) Sama kita kang apostol Pablo, sa pagkaagi nga ang panginahanglan gipatong kanato nga mopahayag niining maayong balita. (1 Corinto 9:16) Nagdepende niini ang atong kaluwasan. Nag-ingon ang Roma 10:​9, 10: “Kon imong ipahayag sa dayag kanang ‘pulong sa imong kaugalingong baba,’ nga si Jesus maoy Ginoo, . . . ikaw maluwas. Kay pinaagi sa kasingkasing ang usa nagapasundayag ug pagtuo alang sa pagkamatarong, apan pinaagi sa baba ang usa nagahimog pagpahayag sa dayag alang sa kaluwasan.”

Asa man nimo buhaton kanang “pagpahayag sa dayag”? Bisan tuod ang pagsangyaw sa di-pormal nga paagi adunay iyang dapit, ang balay-sa-balay nga ministeryo mao gihapon ang usa sa labing epektibo nga mga paagi nga maabot ang uban. (Buhat 5:42; 20:20) Nahigawas ka ba sa obligasyon nga makigbahin niining buluhatona tungod kay ikaw batan-on pa? Wala gayod. Ang Bibliya naghatag niining sugoa sa Salmo 148:​12, 13: “Kamong mga batan-ong lalaki ug kamong mga ulay usab, kamong mga tigulang nga lalaki uban sa mga batang lalaki. Padayega sila sa ngalan ni Jehova.”

Ang Hagit sa Pagsangyaw Ngadto sa mga Katalirongan

Tinuod, mahimong maulaw ka ug dili ka mahimutang kon makasugat ka ug eskolmet samtang nagsangyaw. Kon buot hunahunaon, natural lang nga magtinguhang dawaton sa uban. Walay gustong sulogsulogon, insultohon, o butangbutangan. Ug sumala sa giingon sa usa ka batan-on nga ginganlag Tanya, “ang mga bata sa eskuylahan mahimong bangis kaayo!” Busa natural lang nga maghunahuna ka kon unsa kahay reaksiyon sa imong mga eskolmet kon makita ka nila nga maayog pamiste ug nagkupot ug Bibliya. Ikasubo, posible gayod nga bugalbugalan ka nila. “Dihay bayongbayong sa akong klase nga nagpuyo sa bilding nga akong gipuy-an,” nahinumdom ang usa ka batan-ong taga-Brazil nga ginganlag Felipe. “Siya moingon, ‘Nagdaladala na sab ka anang Bibliya! Bi, unsa may sulod sa imong bag?’”

Ang pagkahimong biktima sa maong pagsulogsulog dili tiaw. Ang Bibliya nag-ingon nga si Isaac, ang anak nga lalaki ni Abraham, nakaagom sa mapintas  nga pagsulogsulog sa kamot sa iyang igsoon sa amahan nga si Ismael. (Genesis 21:9) Wala pakamenosa ni apostol Pablo kining maong pagbugalbugal. Sa Galacia 4:​29, ang apostol tukmang nagtawag niana nga ‘paglutos.’

Sa susama, si Jesus nagpasidaan nga ang ubang mga tawo mahimong mabatokon sa iyang mga sumusunod. Siya miingon: “Kon ang kalibotan nagdumot kaninyo, kamo nahibalo nga kini nagdumot na kanako sa wala pa kini magdumot kaninyo. Kon kamo bahin pa sa kalibotan, higugmaon sa kalibotan ang mga iyaha. Karon tungod kay kamo dili man bahin sa kalibotan, apan gipili ko kamo gikan sa kalibotan, tungod niini ang kalibotan nagdumot kaninyo.”​—Juan 15:​18, 19.

Nan, ingong usa ka Kristohanon kinahanglang andam kang moantos sa usa ka sukod sa paglutos. (2 Timoteo 3:12) Bisan pag wala kay gisulti sa imong mga katalirongan bahin sa Bibliya, ang uban maglutos gihapon tingali kanimo tungod lang kay gihuptan nimo ang taas nga mga sukdanan sa panggawi ug dili moduyog kanila sa daotang panggawi. (1 Pedro 4:4) Apan, si Jesus naghatag niining makahupayng mga pulong: “Malipayon kamo sa dihang pakaulawan kamo sa mga tawo ug pagalutoson kamo ug sa binakak sultihan kamo sa tanang matang sa kadaotan tungod kanako.” (Mateo 5:11) Sa unsang paagi maposible nga ang pagsulogsulog ug panginsulto makapalipay nimo? Tungod kay nahibalo ka nga imong gilipay ang kasingkasing ni Jehova nga Diyos! (Proverbio 27:11) Ug pinaagi sa pagpahimuot sa Diyos, imong gilakip ang imong kaugalingon niadtong gantihan ug kinabuhing walay kataposan!​—Lucas 10:25-28.

Ikalipay, lagmit dili ang tanan​—o bisan ang kadaghanan​—sa imong mga eskolmet ang mabatokon kon masugatan mo sila diha sa ministeryo. Usa ka Britanikong batan-on nga ginganlag Angela nagpahinumdom kanato: “Sa dihang makahibalag ka ug eskolmet samtang nagsangyaw, kasagaran mas nahadlok sila kay kanimo!” Gani, ang uban tingali gusto gani kaayong mahibalo kon unsay imong isulti. Bisan unsa pa man, daghang batan-ong mga Kristohanon ang nakatagamtam ug dakong kalamposan sa pagsangyaw ngadto sa ilang mga isigkaestudyante. Ang among sunod nga artikulo niining seryeha maghisgot sa pipila ka paagi nga mahimo usab nimo kana.

[Hulagway sa panid 21]

Daghang batan-on ang nahadlok nga makasugat ug isigkaestudyante samtang nagsangyaw

[Hulagway sa panid 23]

Ayaw gayod tugoti ang pagsulogsulog nga makapaulaw nimo ang imong pagtuo