Kon sa Unsang Paagi Natuman ang Akong Damgo

SUMALA SA GIASOY NI ALENA Z̆ITNÍKOVÁ

Sa dihang nagdako ako sa Czechoslovakia, usa ka nasod nga sakop sa Sobyet, ang among pamilya nangandoy nga makita ang malinawong kalibotan nga gisaad sa Komunismo. Apan, ang damgo sa Komunismo nga magmugna ug malipayon, nahiusa nga katilingban natapos sa dihang ang Unyon Sobyet nabungkag sa 1991. Pahubita ko kon sa unsang paagi natuman ang akong damgo sa laing paagi.

SA Septiyembre 12, 1962, natawo ako diha sa usa ka pamilya sa debotadong mga Komunista nga nagpuyo sa Horní Benešov, usa ka balangay nga mga 290 kilometros gikan sa Prague. Ang akong amahan masaligon sa mga mithi sa Komunista ug nagkinabuhi sumala niana. Gimatuto usab niya ang akong duha ka magulang nga lalaki ug ang akong kaluha nga babaye ug ako sumala niining mga mithia. Gitudloan niya kami nga pinaagi sa dalayegong pamuo ug desenteng pagkinabuhi, makatabang kami sa pagmugna ug mas maayong katilingban. Giisip niya ang Komunismo nga kinamaayohang matang sa gobyerno ug aktibong nagpaluyo niana.

Si Papa kanunayng motambong sa mga tigom diin gibayaw ang Komunismo. Gitamay niya ang relihiyon tungod sa pagkasalingkapaw sa mga iglesya, ug kami gitudloan ug mituo nga walay Diyos. Si Papa nagtuo nga sa ngadtongadto, sa dihang ang tanang tawo mahatagan ug puy-anan ug igong pagkaon, sila mahimong mas maayong mga tawo ug magkinabuhi nga malinawon. Usa kana ka matahom nga palaaboton nga nadungog nako kanunay samtang ako nagdako. Mituo ako sa tanang gitudlo ni Papa kanamo, ug ako usab determinado nga paluyohan ang Komunismo.

Sa bata pa, nangandam ako aron mahimong payunir o mag-uuna, nga maoy pagtawag sa popular nga Komunistang organisasyon sa mga batan-on nga Young Pioneers. Ang mga payunir giawhag sa pag-ugmad ug maayong mga hiyas ug sa pagkahimong patriotiko. Sa nuybe anyos ako, gihimo nako ang akong solemneng panaad isip payunir ug gihatagan ug pulang bandana nga isul-ob. Gitugotan usab ako sa pag-sul-ob sa pormal nga uniporme sa usa ka payunir panahon sa espesyal nga mga okasyon. Naningkamot ako nga mahimong sulondang payunir. Kon madungog nako ang akong mga eskolmet nga magsultig bastos nga pinulongan, badlongon nako sila, nga magpahinumdom kanila nga ang mga babayeng payunir dili ingon nianag sinultihan.

Apan, ngadtongadto naamgohan nako nga daghang nag-angkong mga Komunista wala magpaluyo sa mga mithi sa Komunista. Inay pakigbisogan ang tawhanong kiling nga mahimong dalo ug masinahon, mangawat sila ug publikong propiedad. Daghan ang nag-awhag sa uban  nga mobuhat alang sa kaayohan sa mga tawo, apan wala nila buhata kana. Gani, ang panultihon nahimong popular: “Siya nga dili mangawat, naghikaw sa iyang pamilya.” Nakapangutana ko sa akong kaugalingon, ‘Nganong kaylap kaayo ang pagkasalingkapaw? Nganong diyutay lang kaayo ang naningkamot sa pagpaluyo sa maayong mga mithi sa Komunismo? Nganong ang mga paningkamot wala gayod magmalamposon?’

Usa ka Panahon sa Pagsusi Pag-usab

Sa dihang ako mga 15 anyos na, gigugol nako ang bahin sa akong bakasyon sa ting-init uban kang Alena, usa ka eskolmet. Usa ka gabii niana miduaw kanamo ang usa ka hamtong nga higala ni Alena nga ginganlag Tanya. “Kinahanglang makigsulti ako kaninyo bahin sa usa ka butang nga hinungdanon kaayo,” siya miingon. “Nakombinsir ako nga ang Diyos naglungtad.” Natingala kami nga nakab-ot niya ang maong konklusyon. Human maulii sa among kakurat, nagpusotpusot ang among mga pangutana kaniya. “Unsa may imong pamatuod niana?” “Unsay iyang hitsura?” “Asa man siya magpuyo?” “Nganong wala man siyay gibuhat?”

Giusausa pagtubag ni Tanya ang among mga pangutana. Iyang gisaysay kanamo nga orihinal nga katuyoan sa Diyos nga ang yuta mahimong paraisong puy-anan alang sa katawhan, ug iyang gihubit kon sa unsang paagi kining maong katuyoan matuman sa ngadtongadto. Sa dihang gipakita niya kanamo gikan sa Bibliya ang mga saad bahin sa usa ka hinlo nga yuta nga puy-an sa buotan, himsog nga mga tawo nga adunay pagtagad sa usag usa, misantop sa akong hunahuna nga susama kini sa mga saad nga akong gituohan. Apan nakaseguro ko nga kon sultian si Papa nga kining kahibulongang mga butang makab-ot pinaagi sa Gingharian sa Diyos​—dili pinaagi sa Komunismo​—dili gayod siya malipay.

Abi god ninyo, kas-a sa dihang ako mga siyete anyos pa, gipakuyog ako sa silingan namong batang babaye ngadto sa simbahan, nga wala mahibaloi sa akong mga ginikanan. Ang pari nag-asoy ug estorya sa Bibliya, ug giganahan kaayo ko niana nga gusto pa nakog dugang impormasyon. Mikuha gani akog pipila ka relihiyosong basahon. Sa dihang giingnan nako ang akong mga ginikanan, hugot nila akong gibaoran nga dili na moadto pag-usab sa simbahan, ug gidaot nila ang tanan nga gidala nako sa balay. Aron mapasiugda nga dili gayod sila gusto niana, gibunalan ko ni Papa.

Human niana, wala na gayod hisgoti ang Diyos sa among panimalay. Nagtuo ko nga ang yano, dili-edukado nga mga tawo lamang ang nagtuo sa Diyos ug nga ang relihiyon inimbento lang sa tawo. Sa eskuylahan gitudloan kami nga sanglit adunay talagsaong mga hitabo nga dili nato masabtan, giimbento na lang sa mga tawo ang ideya nga dunay Diyos. Apan ania si Tanya, usa ka intelihenteng babaye​—maestra pa gani​—ug siya nagtuo nga dunay Diyos! ‘Basig tinuod ang iyang gisulti!’ ako naghunahuna.

Si Tanya misulti sa makapadani gayod nga paagi nga nakombinsir kami nga siya nagtuo sa iyang giingon. Busa kami nangutana, “Tanya, unsa may nakapakombinsir nimo nga aduna gayoy Diyos?”

“Ang Bibliya,” siya mitubag. “Ang tanang pangutana nga inyong gipangutana gitubag sa Bibliya. Gusto ba ninyong mas masabtan pa kini?”

Nahibalo ko nga ang akong mga ginikanan dili malipay kon magtuon ko sa Bibliya. Apan, gusto gayod nakong makakat-on ug dugang pa. Busa gihatag ni Tanya nako ang adres ni Ludmila, usa sa mga Saksi ni Jehova nga nagpuyo duol sa among balay sa Horní Benešov. Samtang gisusi nako uban kang Ludmila ang mga saad sa Diyos bahin sa usa ka yutan-ong paraiso, akong pangutan-on ang akong kaugalingon, ‘Unsay garantiya nga matinuod kini?’

Si Ludmila miingon nga kinahanglang makakat-on pa akog dugang bahin sa Diyos aron motuo kaniya ug sa iyang mga saad. Gikan sa among pagtuon nakombinsir ako nga ang yuta ug ang daghang komplikadong matang sa kinabuhi diha niana wala motungha nga sulagma lamang. Kinahanglang ilhon nako nga aduna gayoy intelihente kaayong Maglalalang. Akong naamgohan nga makataronganon diay kaayo ang Bibliya sa dihang kini miingon: “Ang matag balay adunay nagtukod, apan siya nga nagtukod sa tanang butang mao ang Diyos.”​—Hebreohanon 3:4.

Gusto nakong mahibalo ang akong pamilya niining mga butanga. Apan, nagduda ko nga dili sila interesado, busa wala una nako sila tug-ani. Unya, usa ka adlaw niana, diha sa akong mga butang, ang akong inahan nakakita ug usa ka panid nga natangtang gikan sa karaang gubaon nga Bibliya nga gihatag kanako. Nabalaka pag-ayo ang akong mga ginikanan.

Kabildohay Uban sa Akong Amahan

Sa dihang nakompirmar ang pagduda ni Papa nga may kontak ako sa mga Saksi ni Jehova, gidapit  niya ako nga manglakaw mi. “Kinahanglang putlon dayon nimo ang imong relasyon niining mga tawhana,” siya nag-awhag. “Kay kon dili, dili na ko makapadayon sa pag-alagad ingong mayor sa atong balangay. Madaot ang akong karera tungod nimo. Kinahanglang mopahawa ko sa opisina ug mobalik sa pabrika diin ako nagtrabaho kaniadto. Pakaulawan mo ang tibuok pamilya.”

“Apan, Pa, ang Bibliya maoy makataronganong basahon, ug kini adunay maayo kaayong tambag bahin sa pagkinabuhi,” ako mihangyo.

“Dili Alenka,” matod pa ni Papa, “wala gayod ako magkinahanglan ug Bibliya o Diyos aron ako malipay. Gihimo nako ang tanan pinaagi sa akong kaugalingong mga kamot. Walay mitabang nako. Nahibulong ko kon nganong mituo ka nianang dakong binuang! Kinahanglan magkinabuhi kang normal, maminyo, ug manganak, ug unya makita nimo nga mahimong malipay ka nga walay Diyos.”

Ang pag-insistir ni Papa nakatandog kanako. Sa makadiyot nagsugod ako sa pagduhaduha sa akong pagtuo, nga wala pay lig-ong baroganan. Tinuod nga mas dugay nakong nakaila ang akong amahan kay sa mga Saksi ni Jehova, ug gibati gayod nako nga luwas ako sa balay. Segurado kong maayog tuyo ang akong Amahan. Nahibalo ko nga gimahal niya ako, busa misaad ako nga mohunong na ako sa pagtuon sa Bibliya. Wala madugay human niadto, sa dihang ako 18 anyos, migraduwar ko ug dayon mitrabaho sa Prague, ang kaulohan sa among nasod.

Ang Akong Kinabuhi sa Prague

Nakatrabaho ko sa usa ka bangko, ug naghinamhinam ko nga makasinati sa tinuod nga kinabuhi nga giingon ni Papa nga makab-ot pinaagi sa Komunismo. Apan, sa mubo lamang nga panahon nakita nako nga ang mga tawo sa siyudad sama ra ka masulub-on nianang sa among balangay. Gani, ang imoralidad, pagkasalingkapaw, kahakog, ug sobrang pag-inom maoy naandan.

Ngadtongadto, usa ka Saksi duol sa among balay sa Horní Benešov, nga miadto sa Prague, naghikay nga makontak ako sa mga Saksi. Niining paagiha ang akong pagtuon sa Bibliya nagpadayon sa Prague uban sa usa ka babaye nga ginganlag Eva. Sa pagkahuman sa matag pagtuon, si Eva mangutana, “Gusto ba nimong mobalik ako sa sunod semana?” Wala gayod niya ipugos nako ang iyang kaugalingong mga opinyon, bisan tuod may mga higayon nga ako siyang pangutan-on kon unsay iyang buhaton kon siya ang naa sa akong lugar.

“Dili ko ikasulti nimo kon unsay akong buhaton,” matod niya. Dayon iyang gidani ang akong pagtagad sa giingon diha sa Bibliya nga nakatabang kanako sa paghimog desisyon. Usa ka dakong problema ang akong relasyon sa akong mga ginikanan, busa nangutana ko kon mohunong ba ako sa pagpakig-uban kanila. Gipakli ni Eva ang Exodo 20:​12, diin ang Bibliya nag-ingon nga kinahanglang pasidunggan nato ang atong mga ginikanan. Dayon siya nangutana, “Apan, angay bang pasidunggan nato ang lain nga labaw pa kay sa atong mga ginikanan?”

Tungod kay dili ko makaseguro, iyang giablihan ang iyang Bibliya ngadto sa mga pulong ni Jesu-Kristo: “Siya nga adunay labawng pagmahal sa amahan o sa inahan kay kanako dili-takos kanako.” (Mateo 10:37) Busa nasabtan nako nga bisan tuod ang akong mga ginikanan angayng pasidunggan, si Jesus, maingon man ang iyang langitnong Amahan, angayng makadawat ug mas dakong pagmahal. Kanunayng ipunting ni Eva ang usa ka may-kalabotan nga prinsipyo sa Bibliya, ug dayon pasagdan niya nga ako ang mohukom.

Panagbangi sa mga Intereses

Ngadtongadto, sa Septiyembre 1982, gidawat ako ingong estudyante sa usa ka kolehiyo sa Prague, diin nagtuon ako ug agronomy. Apan, sa wala madugay akong nakaplagan nga dili kaayo nako mahatagag pagtagad ang akong mga kurso sa kolehiyo ug sa samang higayon mohatag sa pagtagad nga gitinguha nako nganha sa pagtuon sa Bibliya. Busa giingnan nako ang usa sa akong mga propesor nga naghunahuna kong moundang sa kolehiyo. “Paadtoon ti ka sa usa ka tawo nga makasabot ug motabang kanimo,” matod pa niya. Gihikay niya nga ang dekano sa kolehiyo makigsulti nako.

Gitimbaya ko sa dekano, nga nangutana: “Nganong ang among kinahaworang estudyante gusto mang moundang pagtungha?”

“Tungod kay wala na koy panahon para sa ubang mga butang nga nakapainteres usab kanako,” ako mitubag. Tungod kay ang mga Saksi ni Jehova gidili kaniadto sa Czechoslovakia, wala koy plano nga sultian siya kon nganong naghunahuna kong moundang. Apan human makig-estorya kaniya sulod sa mga duha ka oras, akong gihunahuna nga kasaligan siya. Busa ako siyang gisultian nga ako nagtuon sa Bibliya.

“Parehong tun-i ang Bibliya ug Marxismo,” matod niya. “Dayon mamili ka.” Morag gidasig pa gani niya ako sa pagtuon sa Bibliya!

 Nasumpo ang Usa ka Panagkunsabo

Apan, pagkasunod adlaw siya ug ang propesor mibiyahe paingon sa akong balangay aron moduaw sa akong mga ginikanan. Gipasidan-an nila sila nga ako dunay kontak sa usa ka peligroso ug gidili nga sekta ug giingnan sila nga gusto nakong moundang pagtuon sa kolehiyo. “Kon ang imong anak makahukom sa pag-undang,” misaad ang dekano kang Papa, “seguroon namo nga dili siya makatrabaho sa Prague, ug dayon kinahanglang mobalik siya ninyo ug putlon ang relasyon uban sa maong sekta.”

Sa Enero 1983, miundang gyod ko pagtungha. Usa ka higala nga nagtuon usab sa Bibliya mitabang kanako sa pag-abang ug lawak sa balay sa usa ka tigulang nga babaye. Tungod kay wala man koy kalibotan sa pagduaw sa dekano sa akong mga ginikanan o sa iyang saad kang Papa, wala ko mahibalo kon nganong ang tanan nakong mga paningkamot sa pagpangitag trabaho wala molampos. Ang tag-iya sa balay nga akong gipuy-an gusto usab mahibalo kon ngano, busa luyo sa akong kasayoran miadto siya sa dekano sa kolehiyo aron mangutana kaniya kon nganong miundang ko pagtungha.

“Pagbantay!” siya nagpasidaan. “Membro siya sa usa ka peligrosong sekta sa mga Saksi ni Jehova. Mao nang kinahanglan siyang moundang pagtungha. Kinahanglang mopauli siya ug hunongon na kini. Tinoon ko nga dili siya makatrabaho dinhi sa Prague!”

Sa dihang ang tag-iya sa balay mipauli nianang gabhiona, gitawag ko niya ug miingon: “Buweno, Alenka, miadto ko sa imong eskuylahan ganina.” Abi nakog mamutos na ako nianang gabhiona mismo ug mobiya sa iyang apartment. Apan siya miingon: “Wala ko makauyon sa gibuhat sa dekano. Mahimo kang motuo sa bisan unsa nga gusto nimo; ang hinungdanon mao ang imong pamatasan. Tabangan ti ka pagpangitag trabaho.” Sa pag-ampo nako nianang gabhiona, akong gipasalamatan si Jehova sa iyang tabang.

Wala madugay human niadto, si Papa miadto sa Prague aron papaulion ako. Apan niining higayona ang iyang mga argumento wala makapausab sa akong hunahuna. Ang akong pagtuo kang Jehova ug sa iyang mga saad mas lig-on nag pasukaranan. Sa kataposan, si Papa milakaw nga wala ko, ug sa unang higayon sa akong kinabuhi, nakita ko siyang mihilak. Bisan tuod makapatandog sa balatian ang maong panagkita, ang maong eksperyensiya nakapasuod kanako kang Jehova. Gusto nakong maiya na ug moalagad Kaniya. Busa, sa Nobyembre 19, 1983, akong gisimbolohan ang akong pagpahinungod kang Jehova pinaagi sa pagpabawtismo diha sa usa ka dulang nga puno sa tubig diha sa usa ka apartment sa Prague.

Gipanalanginan ang Akong Desisyon

Ngadtongadto, mitabang ako sa pagpatik sa gidiling literatura sa mga Saksi. Ang trabaho nagkinahanglag hilabihang pagkamabinantayon, tungod kay ang mga awtoridad nagbilanggo na sa pipila nga nasakpang nagbuhat niana. Ang akong unang trabaho mao ang pagmakenilya ug mga kopya sa Ang Bantayanang Torre nga gihubad ngadto sa Czech. Dayon kining mga kopyaha ihatag ngadto sa mga Saksi aron gamiton sa pagtuon sa Bibliya.

Sa ulahi, gidapit ako nga moduyog sa usa ka grupo nga nagtigom sa usa ka apartment sa Prague aron sa pag-asembol ug mga libro. Kadaghanan sa mga muwebles sa maong lawak gipagawas, ug unya mag-asembol mi ug tagsatagsa ka inimprentang mga panid diha sa taas nga lamesa nga gipahimutang sa tungatunga sa lawak. Dayon kining maong mga panid kolahon o tahion aron mahimong libro. Kasagaran, ako naghunahuna nga pagkanindot kaha kon buhaton kini nga bug-os-panahon.

Ingong payunir sa Komunistang organisasyon sa mga batan-on, naningkamot ako sa pagtudlo sa mga bata nga mahimong mas maayong mga tawo. Ingong usa sa mga Saksi ni Jehova, nagpadayon ako sa pagtrabaho uban sa mga batan-on ug nakatabang ug daghan kanila nga mahimong bawtismadong mga alagad ni Jehova. Bisan tuod wala pay membro sa akong pamilya nga nahimong Saksi, nakabaton ako, sumala sa gisaad sa Bibliya, ug daghang espirituwal nga mga amahan ug inahan ug mga igsoong lalaki ug babaye.​—Marcos 10:​29, 30.

Sa 1989 usa ka demokratikong gobyerno ang mipuli sa Komunistang gobyerno sa among nasod. Kining maong kausaban naghatag ug legal nga kagawasan sa mga Saksi ni Jehova, mao nga mahimo na kaming magtigom nga dayag alang sa pagtuon sa Bibliya, magsangyaw sa balaybalay nga walay peligrong madakpan, ug mobiyahe sa laing nasod aron motambong ug internasyonal nga mga kombensiyon. Dugang pa, dili na kami kinahanglan pang mabalaka bahin sa mga pagsukitsukit, pagpangdakop, o pagpanghadlok!

Pag-alagad Uban sa Akong Bana

Sa 1990, naminyo ako kang Petr, usa ka isigka-Kristohanon. Sa Abril 1992 nakab-ot namong duha  ang tumong nga mahimong mga payunir, nga maoy pagtawag sa mga Saksi niadtong anaa sa bug-os-panahon nga buluhatong pagsangyaw. Ngadtongadto, sa Hunyo 1994, gidapit kami sa pagtrabaho dinhi sa sangang buhatan sa mga Saksi ni Jehova sa Prague. Karon, imbes magpatik ug literatura sa Bibliya nga tinagotago, kami dayag nga makapakig-ambit sa pag-alagad sa espirituwal nga mga intereses sa mga tawo sa tibuok Republika sa Czech.

Pipila ka tuig kanhi, si Petr ug ako nalipay pag-ayo sa dihang gidawat sa akong mga ginikanan ang among imbitasyon nga moduaw sa mga pasilidad diin kami nagpuyo ug nagtrabaho uban sa mga 60 ka uban pang mga membro sa among pamilya sa sanga. Human makita ang among pinuy-anan ug mga opisina, si Papa miingon: “Oo, sa akong hunahuna dunay tinuod nga gugma sa inyong taliwala.” Mao kini ang kinanindotang mga pulong nga nadungog nako gikan sa akong amahan.

Pagtagamtam sa Gisaad sa Komunismo

Ang among paglaom nga makatagamtam ug mas maayong kalibotan pinaagi sa Komunismo sa pagkatinuod maoy damgo lamang. Ang kasaysayan sa katawhan nagpadayag nga bisan ang labing sinserong mga paningkamot sa mga tawo wala molampos sa pagmugna ug matarong nga katilingban. Ako nagtuo nga duna pay daghang tawo nga makaamgo nga ang tawo dili makatagamtam ug malipayong kinabuhi kon wala ang tabang sa Diyos.​—Jeremias 10:23.

Kanunay nakong mahinumdoman ang pangandoy ni Papa nga ako makatagamtam unta sa iyang gitawag ug “tinuod nga kinabuhi,” nga iyang gitudlo kanamo nga mahimong posible pinaagi sa Komunismo. Apan, naamgohan nako gikan sa pagtuon sa Bibliya nga ang gitawag niini ug “tinuod nga kinabuhi”​—ang kinabuhi sa matarong bag-ong kalibotan sa Diyos​—mao lamang ang seguradong saad nga niana makasalig ang mga tawo. (1 Timoteo 6:19) Nakaingon ko niini tungod kay, bisan tuod ug naulipon sa sala ug sa tawhanong pagkadili-hingpit, kadtong sinserong naningkamot sa pagpadapat sa mga pagtulon-an sa Bibliya diha sa ilang kinabuhi nakahimo sa pagpuyo nga magkauban nga malinawon diha sa talagsaong paagi. Sila milampos sa pagpakigbisog sa tanang paningkamot sa pagbungkag sa ilang panaghiusa o sa pagputol sa ilang debosyon kang Jehova, ang ilang Diyos.

Nasilsil kini sa akong hunahuna sa dihang ang  akong bana ug ako nakapribilehiyo nga malakip sa mga bisita nga mitambong sa dedikasyon sa bag-ong mga pasilidad sa sanga sa mga Saksi ni Jehova duol sa Lviv, Ukraine, sa Mayo 19, 2001. Didto nahimamat nako ang ubang mga Saksi nga mga membro kanhi sa Komunistang organisasyon sa mga batan-on nga Young Pioneers. Sila naglaom, sama kanako, nga ang Komunismo magdalag tinuod nga pakigdait ug panaghiusa taliwala sa tanang tawo. Si Vladimir Grigoriev, nga nag-alagad karon uban sa iyang asawa sa sangang buhatan sa Rusya, maoy usa usab ka Young Pioneer.

Karon morag kasukwahi nga sa dapit nga nagsilbi kanhing summer camp sa Young Pioneers, ang mga Saksi ni Jehova nagtukod didto sa ilang bag-ong sanga. Tungod kay gamay ra ang luna diha sa sanga, mga 839 ra ka tawo gikan sa 35 ka nasod ang makatambong sa programa sa dedikasyon. Apan, pagkaugma sa buntag 30,881 ang nagtigom sa usa ka estadyum sa saker sa Lviv aron mamati sa pagsubli sa programa sa miaging adlaw. * Ang uban kanila mibiyahe ug hangtod sa unom ka oras o kapin pa gikan sa lagyong mga dapit aron motambong.

Apan, sa dihang kining mga tawhana nakahibalo sa kahikayan nga mahimong mosuroy sa ilang bag-ong mga pasilidad sa sanga, nanakay sila sa daghang bus nga ilang gisakyan paingon sa estadyum. Pagkahapon ang mga bus nagsugod pagpangabot sa sanga​—diin ang akong bana ug ako nakapribilehiyo sa pag-estar​—aron mosuroy sa mga pasilidad. Nianang gabhiona, kapin sa 16,000 niining minahal nga mga isigkamagtutuo ang nakatapos sa ilang pagsuroy, nanakay sa ilang mga bus, ug nagsugod sa giisip sa daghan nga dugayng biyahe paingon sa ilang pinuy-anan!

Sa Ukraine, sama sa ubang mga nasod sa Sidlakang Uropa, milyonmilyon ang nagtuo nga ang Komunismo mao ang labing maayong paglaom sa pagmugnag malinawong bag-ong katilingban. Apan, karon dunay kapin sa 120,000 ka tawo sa Ukraine lamang nga nakigbahin sa pagsulti sa uban bahin sa Gingharian sa Diyos. Gani, daghan kanamo nga kanhing mga Komunista ang mituo nga kining gobyerno sa Diyos mao ang bugtong paglaom aron makab-ot ang tinuod nga panag-igsoonay ug pakigdait taliwala sa tanang tawo!

[Footnote]

[Hulagway sa panid 12]

Sa dihang ako diyes anyos, wala madugay human ako mianib sa Komunistang Young Pioneers

[Hulagway sa panid 16]

Uban sa akong bana, si Petr

[Hulagway sa panid 16]

Si Vladimir, usa ka kanhing Komunistang Young Pioneer nga akong nahimamat sa dedikasyon sa sanga sa Ukraine

[Hulagway sa panid 16, 17]

Kapin sa 30,000 ang namati sa pagsubli sa programa sa dedikasyon

[Hulagway sa panid 17]

Kapin sa 16,000 ang miduaw sa mga pasilidad sa sanga