Usa ka Timbang nga Panglantaw sa Trabaho

ANG usa ka dedikadong opisyal sa militar mipadayon pagtrabaho sa iyang panahon unta sa pahulay alang sa paniudto aron taposon ang dinaliang trabaho kay gikinahanglan sa iyang taas-ug-ranggong superyor nga opisyal. Sa namalik ang iyang mga kauban gikan sa pagpaniudto, ilang nakit-an nga siya namudmod sa iyang gitrabaho diha sa iyang talad​—nga patay na.

Wala dangtig duha ka oras sa ulahi, ang kauban niyang mga opisyal nakurat sa dihang ang ilang superyor mitelepono ug miingon: “Makapasubo ang nahitabo kang ———, apan nagkinahanglan akog usa ka kapuli ugma sa buntag!” Nakapahibulong kadto sa mga tumatan-aw, Ang trabaho nga gihimo sa opisyal mao ba lamang ang bililhon sa iyang superyor?

Ang maong tinuod nga kasinatian nagpasiugda sa usa ka kamatuoran​—ang bili sa usa ka tawo sagad ginasukod lamang sumala sa iyang pagkamapuslanon alang sa iyang amo. Kini basin moagak sa usa sa pagsukna: Nabuhi ba lamang ako aron motrabaho, o nagtrabaho ba ako aron mabuhi? Unsang mga bahin sa akong kinabuhi ang akong ginasakripisyo alang sa akong trabaho?

Paghimog Maalamong mga Pagpili

Duha sa gihunahuna sa pipila ka tawo nga maoy labing hinungdanong mga desisyon sa kinabuhi sagad gihimong mapahinaykon​—ang pagpilig usa ka kapikas ug ang pagpilig trabaho. Ang trabaho ug kaminyoon giisip kaniadto nga permanente. Busa gihatagag mainampingong pamalandong ang pagpili sa matag usa. Kasagaran, ang tambag sa mas edarang mga higala o mga ginikanan gitinguha.

Hinuon, karong mga adlawa ang daghang tawo daw mopilig mga kapikas sa kaminyoon nga halos ipasukad na lang sa lawasnon nga kamadanihon, uban sa panagana nga kon dili molampos, makapangita ka ug laing kapikas. Sa susama, ang daghang tawo mopilig trabaho pinasukad ilabina sa giisip nga maanindot, nga walay pagtagad sa posible nga  dili-maayong mga resulta. O labing menos daling isalikway ang dili-tilinguhaong mga posibilidad pinaagi sa paghunahuna, ‘Makadumala ra ako niana.’

Ikasubo, ang kababayen-an sa mas kabos nga kanasoran subsob madani sa makapahaylo nga mga anunsiyo alang sa mga trabahong nagsaad ug haruhay nga kinabuhi sa laing dapit. Hinunoa, sa ilang pag-abot sa laing nasod, sila sagad ipadala ngadto sa mga balay sa kahilayan diin ang ilang pagkinabuhi ingong mga pampam mas grabe kay sa ilang kinabuhi sa nangagi. Kining makalilisang nga matang sa modernong kaulipnan maoy usa ka “hampak nga dili mahanaw,” sumala sa usa ka artikulo sa World Press Review.

Ang mga tawo mahaylo ba usab sa pagdawat sa kasagarang tanyag sa trabaho ug unya mosangpot sa kahimtang nga gibati nilang naulipon? Kining butanga mismo nahitabo gayod! Pananglitan, ginatanyag sa pipila ka kompaniya ang talagsaong mga kaluhoan alang sa kaayohan sa ilang mga trabahante. Mahimong naglakip kini sa mga lawak-kan-anan nga magamit sa pamilya ug mga higala, libreng serbisyo sa taksi ug dry cleaning, mga dentista sulod sa dapit-trabahoan, libreng paggamit sa mga gymnasium, ug tinabangan-sa-pagbayad nga pagpangaon diha sa mahalong mga restawran.

“Usa ka kompaniya nagbayad gani sa usa ka ahensiya sa pagpakigdeyt alang sa nahago pag-ayo nga mga kawani niini,” mitaho ang tagsulat sa magasin nga si Richard Reeves. Apan pagbantay! Siya misaysay: “Ang maong mga kompaniya mogamit ug mga programa aron ang imong kinabuhi mas mahayahay, sa usa lang ka kondisyon​—nga imong ipakontrolar kanila ang imong kinabuhi; nga motrabaho kag 18-oras kada adlaw ug sa mga hinapos sa semana, mokaon, mag-ehersisyo, magdula, matulog pa diha sa opisina engkasog gikinahanglan ka aron modako pa ang ilang ganansiya.”

Pagpilig Mas Maayong Pagkinabuhi

Ang usa ka karaang proverbio mabasa: “Ang buhing iro mas maayo pa kay sa patay nga leyon.” (Ecclesiastes 9:4) Ang maong proverbio mopatungha sa pangutana, Ang akong trabaho mas bililhon ba kay sa akong kinabuhi o akong panglawas? Sa pagtubag, daghan ang nagtulotimbang pag-usab sa ilang kahimtang ug nakakaplag ug paagi nga itagana ang ilang igong mga panginahanglan​—ingon man sa ilang pamilya kon duna​—ug pagkinabuhi usab sa malipayon, makahuloganong kinabuhi.

Tinuod, sa paghimo niini gikinahanglan kasagaran ang pagkamakasaranganon ug pagdesidir kon unsay tinuod nga mga panginahanglan sa usa, inay  kon unsay dili-kinahanglanong mga gusto sa usa. Kadtong nagatinguha sa dungog ug pagkatinamod sa katilingban tingali mosalikway sa mas makasaranganong mga pagpili ug isipon pang buangbuang kadtong mopili niana. Apan unsay tinuod nga hinungdanon sa kinabuhi? Nakahunong ka ba karong bag-o pa sa pagpalandong niini?

Ang maalamong Haring Solomon, kinsa misulat sa gikutlo-sa-itaas nga proverbio, nakabaton ug labi pang daghang materyal kay ni bisan kinsang tawo. Apan sa pagsumaryo kon unsay tinuod nga hinungdanon, siya misulat ubos sa inspirasyon sa Diyos: “Kini ang kataposan sa butang, ang tanan nadungog na: Kahadloki ang matuod nga Diyos ug tumana ang iyang mga sugo. Kay kini mao ang tibuok nga obligasyon sa tawo.”​—Ecclesiastes 12:13.

Sa samang panahon, gipabilhan ni Solomon ang trabaho. “Wala nay laing mas maayo,” siya misulat, “alang sa tawo kay sa mokaon siya ug moinom ug himoon niya ang iyang kalag nga makapahimulos ug maayo sa iyang kahago.” (Ecclesiastes 2:24) Si Jesu-Kristo, ang Dakong Solomon, susamang nagpabili sa trabaho, sama sa iyang langitnong Amahan. “Ang akong Amahan nagpadayon sa pagbuhat hangtod karon, ug ako nagpadayon sa pagbuhat,” misaysay si Jesus.​—Juan 5:17; Mateo 12:42.

Ugaling lang, sa pagkakaron ang kinabuhi sa tawo maoy mubo. (Salmo 90:10) Apan si Kristo nahibalo nga ang malungtarong kinabuhi sa yuta mapahimuslan ilalom sa pagmando sa Gingharian, nga alang niana iyang gitudloan ang iyang mga sumusunod sa pag-ampo. Kana ang hinungdan nga siya miawhag diha sa iyang nabantog nga Wali sa Bukid: “Nan, magpadayon sa pagpangita pag-una sa gingharian ug sa pagkamatarong [sa Diyos], ug kining tanang ubang mga butang igadugang ra kaninyo.”​—Mateo 6:​9, 10, 33.

Mahitungod sa kinabuhi ilalom sa pagmando sa maong Gingharian, ang Bibliya nagsaad: “Sila magtukod gayod ug mga balay ug magpuyo niini; ug sila gayod magtanom ug kaparasan ug magkaon sa ilang mga bunga. Dili sila magtukod ug lain ang magpuyo; . . . gamiton sa bug-os sa akong mga pinili ang buhat sa ilang mga kamot.”​—Isaias 65:​21, 22.

Pagkakahibulongan nga kalaoman​—ang pagtagamtam sa kinabuhing mohangtod sa panahong walay tino nga naglakip sa makapatagbawng buluhaton! Ang usa ka seryosong pagtulotimbang sa atong kondisyon tingali mopadayag nga gikinahanglan natong hunahunaon pag-usab ang pipila ka bahin sa atong trabaho karon aron malikayan ang posibleng mga kapeligrohan nga mahimong makadaot sa posibilidad nga atong matagamtam ang “tinuod nga kinabuhi”​—ang umaabot nga kinabuhi ilalom sa Gingharian sa Diyos. (1 Timoteo 6:19) Busa hinaot atong ipakita diha sa atong trabaho, o bisan unsa nga atong ginabuhat, nga kita may pagtahod sa Usa nga mihatag kanatog kinabuhi.​—Colosas 3:23.

[Hulagway sa panid 8, 9]

Ilalom sa Gingharian sa Diyos, ang mga tawo magpahimulos sa trabaho nga luwas ug magantihon