Dugos—Usa ka Tam-is nga Mananambal

ANG pipila ka medikal nga tigpanukiduki madasigon bahin sa isog nga mga sangkap sa dugos nga makapatayg kagaw ug pangontra sa pagpanghubag. Ang mantalaan nga The Globe and Mail sa Canada nagtaho: “Dili sama sa suplay sa komplikadong mga antibiotiko nga dili moepekto sa mosukol-sa-antibiotiko nga mga mikrobyo, ang dugos makaarang sa pagpatay sa labing menos pipila niini kon maylabot sa naimpeksiyon nga mga samad.”

Unsay anaa sa dugos nga makaarang man kini sa pag-ayo? Ang tubag naglangkit sa trabahanteng buyog nga naniba sa dugos sa mga bulak. Ang laway sa buyog adunay glucose-oxidase, usa ka mahinungdanong enzyme nga motunaw sa glucose diha sa dugos. Ang resulta niini nga pagtunaw mao ang hydrogen peroxide, nga maoy naandang gigamit sa paglimpiyo ug pagdis-inpektar sa mga samad. Kasagaran, kadiyot ra ang epekto sa hydrogen peroxide sa dihang ipadapat sa samad; apan sa dugos, lahi ang epekto. “Sa dihang anaa na sa samad, ang dugos morag tunawon sa mga pluwido sa lawas, ug kini mopakunhod sa natural nga asido sa dugos,” matod sa taho sa Globe. Ang enzyme molihok dinhi niining wala kaayoy asido nga palibot. Ang pagkatunaw sa asukar diha sa dugos maoy hinay apan kanunay. Kini nga proseso anam-anam nga magpagawas ug hydrogen peroxide sa igoigong sukod aron mapatay ang bakterya nga anaa sa samad samtang dili mag-apektar pag-ayo sa himsog nga mga tisyu diha sa samad.

Ang dugos adunay daghang kinaiyahan nga makaayo sa samad, matod sa Globe. “Ang diyutayng dugos nga ihidhid makapahumok sa palibot sa samad nga magpanalipod sa panit ug makapugong nga maporma ang gahi nga kugan. Ang dugos makaaghat sa pagtubo ug pag-umol sa bag-ong gagmay nga mga ugat nga agian sa dugo ug magtukbil sa mga selula nga mopatunghag bag-ong panit aron motubo.” Dugang pa, ang mga anti-oxidant sa dugos adunay pangontra sa pagpanghubag nga makatabang aron “momenos ang paghubag, mapauswag ang sirkulasyon sa dugo ug magpugong sa samad nga dili magduga.”

“Apan ang dugos dili alang sa tanan,” mipasidaan ang taho. Gibanabana nga ang gagmayng mga bakteryang botulism anaa hangtod sa 5 porsiyento sa dugos. Ang mga ahensiya nga sama sa Health Canada’s Botulism Reference Service maingon man ang mga sosyedad alang sa mga bata nagtambag batok sa paghatag ug dugos ngadto sa mga bata nga wala pay usa ka tuig ang edad tungod kay “ang mga masuso wala pay igong mga mikroorganismo sa tinai nga mopanalipod kanila batok sa mga bakterya.”