Gikan sa Among mga Magbabasa

Tubig Matulon-anon kaayo ang serye nga “Tubig​—Aduna bay Igo?” (Hunyo 22, 2001). Apan, akong namatikdan ang inyong giingon nga “ang paggama ug usa ka toneladang asero makakonsumo ug 280 ka toneladang tubig.” Morag dunay sayop dinhi. Ingong usa ka konsultante sa tubig, nahibalo ako nga diha sa pipila ka pabrika sa puthaw sa India, makakonsumo lamang kami ug 20 ngadto sa 23 ka toneladang tubig.

N.K.K., India

Ang “Pagmata!” nagtubag: Ang numero nga among gikutlo sa pagkatinuod nagtumong kon unsa ka daghang tubig ang magamit sa paggamag asero​—dili kon unsa ka daghang tubig ang “nakonsumo.” Ang kadaghanang tubig nga gigamit sa paggamag asero wala diay nakonsumo kondili gigamit pag-usab. Gikasubo namo nga nakahatag ug sayop nga pagsabot.

Ang Bibliyang Dalmatin Samtang nagbasa sa artikulong “Ang Bibliyang Dalmatin​—Talagsaon Apan Wala Hikalimti” (Hunyo 22, 2001), nahingangha ako sa pagkabasa sa panid 15: “Dayag, siya [si Dalmatin] naghubad gikan sa orihinal nga mga pinulongan apan kanunayng nagsusi sa Alemang hubad sa Latin Vulgate ni Martin Luther.” Nagtuo ako nga si Luther naghubad gikan sa orihinal nga mga pinulongan sa Bibliya.

R. S., Alemanya

Ang “Pagmata!” nagtubag: Wala mi magpasabot nga migamit lamang gayod si Luther sa “Vulgate” sa dihang naghubad sa Hebreohanong Kasulatan. Bisag walay usa ang nahibalo sa tanang detalye bahin sa Alemang hubad ni Luther, kaylap kining gidawat nga ang “Vulgate” maoy usa sa mga tinubdan nga gigamit ni Luther sa pagsabot sa mga teksto sa orihinal nga pinulongan. Walay duhaduha nga migamit usab si Luther sa ubang mga tinubdan nga mabatonan sa maong panahon, sama sa Gregong hubad nga nailhang “Septuagint.”

Navajo Buot kong pasalamatan kamo sa makapadasig ug maayo kaayong artikulo nga “Ang Ngalan sa Diyos Nagpabag-o sa Akong Kinabuhi!” (Hulyo 8, 2001), sumala sa giasoy sa usa ka Navajo nga babaye, si Sandy Yazzie Tsosie. Ang iyang mga pulong nakapatandog pag-ayo kanako ug nakapalugmaw sa akong mga luha. Nakahatag kanakog paglaom ang pagbasa sa iyang panaw sa pagpangitag gugma ug kalipay ug sa pagbuntog sa iyang depresyon. Akong naamgohan nga kitang tanan gihigugma diay gayod ni Jehova nga Diyos!

A. S., Tinipong Bansa

Grabe Kaayo nga Trahedya Nagtuo ako nga ang pipila ka butang nahitabo lamang diha sa mga pelikula. Busa nakurat ako sa pagkabasa sa kasinatian nga “Pagsagubang sa Grabe Kaayo nga Trahedya.” (Hulyo 22, 2001) Pagkahuman nakog basa niini, ako miampo ug nangamuyo kang Jehova nga paluyohan si Jonathan, si Oscar, ug ang mga apohan ni Oscar. Ang mga kasinatian nga sama niini magdasig kanato nga mopadayon sa paghatag sa atong kinamaayohan ngadto kang Jehova sa dili pa modangat kanato ang “panahon ug ang wala damhang panghitabo.”​—Ecclesiastes 9:11.

E. P., Italya

Nakapatandog kaayo kanako ang pagbasa sa makalilisang nga estorya sa trahedya nga mihampak kang Theresa ug sa iyang pamilya. Buot gayod nakong mahibalo ang iyang pamilya nga ako usab dili makahulat sa paghalog kang Theresa didto sa bag-ong kalibotan nga gisaad ni Jehova.

L. T., Italya

Nagpanuko ako sa pagpabawtismo sulod na sa unom ka tuig. Wala akoy determinasyon nga mohimog mga kausaban. Apan ang kasinatian ni Theresa nakatukmod kanako sa pagpamalandong. Nakahinapos ako nga dili gayod ako mabuhi kon wala si Jehova, ug sinsero akong miampo kaniya. Bisan tuod ug makapasubo ang nasinatian sa ilang pamilya, kadto nakapadasig kanako.

M. L., Czech Republic

Nakurat ako nga usa sa mga Saksi ni Jehova ang nabiktima sa maong krimen, apan ang artikulo nagtabang kanako sa pagkaamgo nga si Jehova dili mohatag kanato ug panalipod sa milagrosong paagi. Wala ako masayod kon mohampak ba kanako ang trahedya, apan ang pagkasayod sa lig-ong pagtuo sa pamilya ni Theresa sa pagsagubang sa maong situwasyon naghimo kanakong determinado nga maisogong atubangon ang bisan unsang pagsulay.

S. O., Japan