Nganong Gusto Mang Mahimong Magtutudlo?

“Kadaghanang magtutudlo mopili sa ilang karera tungod kay kini maoy propesyon nga makatabang sa mga tawo. [Ang pagtudlo maoy] pagkakomitido sa paghimog dakong kausaban diha sa kinabuhi sa mga bata.”​—Teachers, Schools, and Society.

BISAN tuod ang ubang mga magtutudlo morag gisayonan lang niana, ang pagtudlo daghag kababagan nga kinahanglang buntogon​—pagdumala sa mga klase nga daghan kaayog estudyante, naghingaping klerikal nga trabaho, daghan kaayong kuskos-balungos, gahi mosanong nga mga estudyante, ug gamayng suweldo. Si Pedro, usa ka maestro sa Madrid, Espanya, nagpahayag niana niining paagiha: “Ang pagkamagtutudlo dili gayod sayon. Nagkinahanglan kinig dakong sakripisyo. Apan, bisan pa sa mga kalisdanan, giisip gihapon nako ang pagtudlo nga mas dakog balos kay sa trabaho diha sa kalibotan sa komersiyo.”

Ang suliran mahimong bug-at kaayo diha sa dagkong mga tunghaan sa siyudad sa kadaghanang nasod. Ang mga droga, krimen, luag nga moralidad, ug usahay ang pagkawalay-pagtagad sa ginikanan makaapektar pag-ayo sa atmospera ug disiplina diha sa tunghaan. Kasagaran kaayo ang rebelyosong mga tinamdan. Nan, ngano mang daghan kaayong kuwalipikadong mga tawo ang gustong mahimong mga magtutudlo?

Si Leemarys ug Diana maoy mga magtutudlo sa New York City. Sila nagtudlo sa mga bata nga gikan sa kindergarten hangtod sa diyes anyos. Silang duha makamaong mosultig Iningles ug Kinatsila ug sa panguna nagtudlo sa mga batang Katsila. Ang among pangutana mao . . .

Unsay Nagtukmod sa Usa nga Mahimong Magtutudlo?

Si Leemarys miingon: “Unsay nagtukmod kanako? Ang akong gugma sa mga bata. Nahibalo ko nga alang sa ubang mga bata ako lamang ang bugtong nagtabang kanila sa ilang mga paningkamot.”

Si Diana miingon: “Akong gitudloan ang akong otso-anyos nga pag-umangkong lalaki, nga naglisod sa tunghaan​—ilabina sa pagbasa. Dako kaayong katagbawan nga makita siya ug ang uban nga nakakat-on! Busa nakahukom ko nga gusto kong magtudlo, ug miundang ko sa akong trabaho sa bangko.”

Ang Pagmata! misukna sa mao gihapong pangutana sa mga magtutudlo sa ubay-ubayng nasod, ug ang mosunod maoy sampol sa mga tubag nga nadawat.

Si Giuliano, usa ka Italyano nga nag-edad ug mga 40 anyos misaysay: “Gipili nako kining maong propesyon tungod kay ako naikag niana sa dihang ako estudyante pa (sa tuo). Giisip nakong kini mamugnaon ug daghag kahigayonan nga makadasig sa uban. Ang akong kadasig sa sinugdan nakatabang kanako nga mabuntog ang mga kalisdanan nga akong nasinati sa unang yugto sa akong karera.”

 Si Nick, nga taga-New South Wales, Australia, miingon: “Gamay rag kalaoman nga makatrabaho sa akong natad sa kemikal nga panukiduki, apan daghag kahigayonan sa natad sa edukasyon. Sukad niadto akong nakaplagan nga nalingaw ko sa pagtudlo, ug ang mga estudyante morag nalingaw sab sa akong pagtudlo kanila.”

Ang panig-ingnan sa ginikanan kasagaran maoy dakong hinungdan alang niadtong mipili nga mahimong mga magtutudlo. Si William, nga taga-Kenya, mitubag sa among pangutana: “Ang akong tinguha sa pagtudlo naimpluwensiyahan sa dakong bahin sa akong amahan, nga usa ka magtutudlo niadtong 1952. Ang pagkahibalo nga akong ginaumol ang mga hunahuna sa mga batan-on maoy hinungdan nga midukot ako niining maong propesyon.”

Si Rosemary, nga taga-Kenya usab, miingon kanamo: “Kanunay kong nagtinguha sa pagtabang sa mga hinikawan. Busa kinahanglan akong mopili tali sa pagkahimong nars o magtutudlo. Unang miabot ang tanyag nga magtudlo. Ang kamatuoran nga ako usa usab ka inahan nagpauswag sa akong gugma niining propesyona.”

Si Berthold, nga taga-Düren, Alemanya, may laing motibo sa pagtudlo: “Ang akong asawa nagkombinsir nako nga mahimo kong maayong magtutudlo.” Ug husto diay siya. Siya midugang: “Ang akong propesyon karon nakahatag nakog dakong kalipay. Gawas kon ang usa ka magtutudlo nakombinsir sa bili sa edukasyon ug interesado usab sa mga batan-on, imposible nga siya mahimong maayo, malamposon, napalihok, ug tagbaw nga magtutudlo.”

Usa ka Hapones nga magtutudlo, si Masahiro, nga taga-Nakatsu City, miingon: “Ang nagtukmod nako nga mahimong magtutudlo mao ang pagkabaton ug maayo kaayong magtutudlo sa akong unang tuig sa hayskul. Gitudloan niya kami sa pagpakitag tinuod nga pagkakomitido. Ug ang pangunang rason nga ako nagpadayon sa akong propesyon mao nga akong gimahal ang mga bata.”

Si Yoshiya, karon 54 anyos ug taga-Japan usab, adunay dakog suweldo nga trabaho sa pabrika apan mibati nga siya naulipon niana ug sa pagbiyahe ngadto-nganhi sa trabahoan. “Usa ka adlaw niana naghunahuna ko, ‘Hangtod kanus-a nako ipadayon kining maong estilo sa kinabuhi?’ Mihukom ko sa pagpangitag trabaho nga mas nalangkit sa mga tawo kay sa mga butang. Ang pagtudlo talagsaon. Magtudlo ka sa mga batan-on. Kini makitawhanon.”

Si Valentina, nga taga-St. Petersburg, Rusya, nakaapresyar usab nianang bahina sa pagkahimong magtutudlo. Siya miingon: “Ang pagtudlo maoy gipili nakong karera. Nagtudlo ako sa elementarya sulod na sa 37 ka tuig. Malipay kong motudlo sa mga bata, ilabina sa mga bata pa kaayo. Nagustoan nako ang akong trabaho, ug mao kanay hinungdan nga wala pa ko moretiro.”

Si William Ayers, nga usa usab ka magtutudlo, misulat: “Ang mga tawo nadani sa pagtudlo tungod  kay gusto silag mga bata ug mga batan-on, o tungod kay gusto nilang makauban sila, nga makita silang mouswag ug motubo ug mahimong mas makaarang, mas hanas, mas gamhanan diha sa kalibotan. . . . Ang mga tawo magtudlo . . . ingong gasa niya sa uban. Ako nagtudlo sa paglaom nga ang kalibotan mahimong mas maayong dapit.”

Oo, bisan pa sa mga kalisdanan ug mga disbentaha, libolibo ka dedikadong mga babaye ug mga lalaki ang nadani sa pagkahimong magtutudlo. Unsa ang pipila sa dagkong mga problema nga ilang giatubang? Ang sunod nga artikulo maghisgot nianang pangutanaha.

[Kahon sa panid 6]

Mga Sugyot Aron Dunay Komunikasyon Tali sa Magtutudlo ug Ginikanan

✔ Ilailaha ang mga ginikanan. Dili kini pag-usik ug panahon. Kining paggahin ug panahon parehong makaayo kaninyo. Imo kining kahigayonan nga makasuod kadtong mahimong imong kinamaayohang mga magtatabang.

✔ Makigsulti sa paagi nga masabtan dayon sa mga ginikanan​—ayaw pakamenosa ang ginikanan. Likayi ang linaing mga bokabularyo nga gigamit sa mga magtutudlo.

✔ Kon maghisgot bahin sa mga bata, ipasiugda ang positibong mga bahin. Ang komendasyon mas epektibo kay sa pagsaway. Ipatin-aw kon unsay mahimo sa mga ginikanan sa pagtabang sa bata nga molampos.

✔ Pasultia ang mga ginikanan, ug dayon pamati pag-ayo.

✔ Sabta ang kahimtang sa panimalay sa bata. Kon posible, duawa ang ilang panimalay.

✔ Pagpili ug petsa para sa sunod nga pakigkabildohay. Hinungdanon ang pagpaloap. Kini magpakita nga tinuod ang imong kaikag.​—Binase sa Teaching in America.

[Hulagway sa panid 6]

‘Maestro sab ang akong amahan.’​—WILLIAM, KENYA

[Hulagway sa panid 7]

“Malipay kong motudlo sa mga bata.”​—VALENTINA, RUSYA

[Mga hulagway sa panid 7]

“Ang pagtudlo talagsaon. Magtudlo ka sa mga batan-on.”​—YOSHIYA, JAPAN