Pagtudlo—Ang Katagbawan ug ang Kalipay

“Nganong nakapadayon ko sa pagtudlo? Bisan tuod ang pagtudlo mahimong lisod ug kapoy, ang pagkakita sa mga bata nga naghinamhinam sa pagkat-on ug ang pagkakita sa ilang pag-uswag maoy nagtukmod nako nga magpadayon.”​—Leemarys, usa ka magtutudlo sa New York City.

BISAN pa sa tanang problema, mga babag, ug mga kahigawad, milyonmilyong magtutudlo sa tibuok kalibotan ang milahutay sa ilang piniling propesyon. Ug unsay nagtukmod sa libolibong estudyante sa pagpaningkamot nga mokuwalipikar nga mahimong mga magtutudlo sa dihang nahibalo sila nga mahimong dili nila madawat ang igong pag-ila? Unsay nakatabang kanila nga magpadayon?

Si Inna, usa ka magtutudlo sa Rusya, nag-ingon: “Makapalipayng kasinatian nga makita nimo ang imong kanhing mga estudyante nga hamtong na, nga madungog sila nga magpahayag nga ang ilang nakat-onan gikan nimo ilang napuslan. Makapadasig kaayo sa dihang sila moingon nga ilang gihandom ang katuigan nga ilang gigugol uban nimo.”

Si Giuliano, usa ka magtutudlo nga gikutlo sa nag-unang mga artikulo, nag-ingon: “Usa sa kinadak-ang katagbawan mao ang pagkaamgo nga milampos ka sa pagpukaw sa kaikag sa mga estudyante sa maong ulohan. Pananglitan, human nako gipatin-aw ang usa ka punto sa history, ang ubang mga estudyante miingon: ‘Ayawg hunong. Sultii pa mig dugang! ’ Kining kinasingkasing nga mga pahayag makapasanag sa usa ka dulom nga kabuntagon sa tunghaan tungod kay naamgohan nimo nga napukaw nimo ang pagbati sa mga batan-on nga bag-o kanila. Makapalipay kaayo ang pagtan-aw sa ilang mga nawong sa dihang ang ilang mga mata mosanag tungod kay nasabtan nila ang usa ka leksiyon.”

Si Elena, usa ka magtutudlo sa Italya, nag-ingon: “Ako nagtuo nga ang katagbawan mas subsob nga makita diha sa gagmayng ordinaryong mga butang, sa ginagmayng mga kalamposan sa mga estudyante, inay kay sa dagkong mga kalamposan, nga panagsa rang mahitabo.”

Si Connie, usa ka Australiana nga nag-edad ug mga 30 anyos, nag-ingon: “Dako kaayong balos kon ang estudyante nga nasuod nimo mogahig panahon sa pagpadalag sulat nga nagpahayag sa iyang apresasyon alang sa imong mga paningkamot.”

Si Oscar, nga taga-Mendoza, Argentina, susamag gibati: “Bation nakong mapuslanon kaayo sa dihang ang akong mga estudyante makasugat nako diha sa dalan o bisag asa ug magpakitag apresasyon sa akong gitudlo kanila.” Si Angel, sa Madrid, Espanya, miingon: “Ang kinadak-ang katagbawan alang kanako, nga nagdeboto sa bahin sa akong kinabuhi niining maanindot apan malisod nga propesyon mao, sa walay duhaduha, ang pagkakita sa mga bata nga akong gitudloan nga mahimong matarong nga mga lalaki ug babaye, sa bahin tungod sa akong mga paningkamot.”

Si Leemarys, nga gikutlo sa sinugdanan, miingon: “Gibati gayod nako nga ang mga magtutudlo maoy talagsaong mga tawo. Kami usab medyo talagsaon  kay miabaga nianang dako kaayong responsibilidad. Apan kon makahimo kag dakong kausaban​—sa napulo ka bata o kaha sa usa lang​—gibuhat nimo ang imong trabaho, ug nindot kaayo kining pagbatia. Gihimo nimo kini uban ang kalipay.”

Gipasalamatan Mo ba ang Imong mga Magtutudlo?

Ikaw ba, ingong estudyante o ginikanan, nagpasalamat sukad sa usa ka magtutudlo tungod sa panahon, paningkamot, ug kaikag nga iyang gipakita? O nagpadala ka ba bisag sulat-pasalamat na lang? Si Arthur, sa Nairobi, Kenya, mipahayag ug makataronganong punto: “Ang mga magtutudlo mouswag usab tungod sa komendasyon. Ang gobyerno, mga ginikanan, ug mga estudyante angayng mopabili kanila ug sa ilang mga serbisyo.”

Ang awtor-magtutudlo nga si LouAnne Johnson misulat: “Sa matag negatibong sulat nga akong nadawat bahin sa usa ka magtutudlo, nakadawat ako ug mga usa ka gatos ka positibong mga sulat, nga nagkompirmar sa akong pagtuo nga dunay daghan pang maayong mga magtutudlo kay sa mga dili maayo.” Makaiikag, daghang tawo ang manuhol gani ug detektib aron “motabang pagpangita ug kanhing magtutudlo. Ang mga tawo gustong mangita sa ilang mga magtutudlo ug pasalamatan sila.”

Ang mga magtutudlo nagpahiluna sa hinungdanong pundasyon alang sa edukasyon sa usa ka tawo. Bisan ang kinamaayohang mga propesor diha sa labing inila nga mga unibersidad may utang kabubut-on sa mga magtutudlo nga migahig panahon ug naningkamot sa pagpukaw ug pag-ugmad sa ilang tinguha alang sa edukasyon, kahibalo, ug pagsabot. Si Arthur, sa Nairobi, nag-ingon: “Ang tanang taas nga mga opisyal sa publiko ug pribadong mga sektor gitudloan sa usa ka magtutudlo sa usa ka yugto sa ilang kinabuhi.”

Angay gayod kitang magpasalamat nianang mga babaye ug lalaki nga nagpukaw sa atong pagkamaukiton, nagtukbil sa hunahuna ug kasingkasing, nagpakita kanato kon unsaon pagtagbaw ang atong kauhaw sa kahibalo ug pagsabot!

Angay gayod kitang magpasalamat pag-ayo sa Dakong Edukador, si Jehova nga Diyos, nga maoy nag-inspirar sa mga pulong sa Proverbio 2:1-6: “Anak ko, kon dawaton mo ang akong mga pulong ug tipigan mo ang akong mga sugo diha kanimo, aron sa paghatag ug pagtagad sa kaalam pinaagi sa imong igdulungog, aron ikiling mo ang imong kasingkasing sa katakos sa pag-ila; dugang pa, kon ikaw magasangpit sa pagsabot ug ikaw magapatugbaw sa imong tingog alang sa katakos sa pag-ila, kon ikaw magapadayon sa pagpangita niini ingon sa plata, ug ingon sa tinagong mga bahandi ikaw magapadayon sa pagpangita niini, nan imong masabtan ang pagkahadlok kang Jehova, ug imong makaplagan ang mismong kahibalo sa Diyos. Kay si Jehova magahatag ug kaalam; sa iyang baba nagagikan ang kahibalo ug ang katakos sa pag-ila.”

Matikdi ang kondisyonal nga “kon ” nga makita ug tulo ka beses nianang makapukaw-sa-hunahuna nga teksto. Handurawa ra, kon kita andam nga modawat nianang maong hagit, atong “makaplagan ang mismong kahibalo sa Diyos”! Seguradong mao kana ang kinamaayohang edukasyon sa tanan.

[Kahon sa panid 13]

Usa ka Malipayong Ginikanan

Ang mosunod nga sulat nadawat sa usa ka magtutudlo sa New York City:

“Buot ko ikawng pasalamatan nga kinasingkasing tungod sa imong nahimo alang sa akong mga anak. Pinaagi sa imong pag-atiman, kalulot, ug kahanas, natabangan nimo sila nga molampos nga segurado ako nga dili gayod nila masinati kon wala ka. Gihimo nimo akong mapasigarbohon sa akong mga anak​—usa ka kasinatian nga dili gayod nako makalimtan. Matinahoron, S. B.”

Duna bay magtutudlo nga mahimo nimong dasigon?

[Hulagway sa panid 12]

‘Makapalipay kaayo ang pagtan-aw sa mga mata sa mga estudyante nga mosanag tungod kay nasabtan nila ang usa ka leksiyon.’—GIULIANO, ITALYA

[Mga hulagway sa panid 13]

‘Dako kaayong balos kon ang estudyante mogahig panahon sa pagpadalag sulat sa apresasyon.’—CONNIE, AUSTRALIA