Gikan sa Among mga Magbabasa

Pagdumot Di pa dugay miduaw kanako ang akong igsoong lalaki. Wala ko mahibalo nga dayag diay niyang gipahayag ang iyang pagkapig-ot ug hunahuna. Naghisgot siyag lainlaing mga rasa ug mainitong nagtamay kanila. Buot kong tabangan siya, apan wala ko masayod kon unsaon nako paghisgot ang maong ulohan. Pagkakita nako sa Agosto 8, 2001, nga gula uban sa serye nga “Pagsumpo sa Siklo sa Pagdumot,” nahibalo ako nga mao kadtoy tubag sa akong pag-ampo.

L. B., Tinipong Bansa

Ang inyong gisulat dili gayod madawat sa usa ka rasonableng tawo. Kamo nag-ingon: “Ang Bibliya mismo nag-ingon nga ang dili-hingpit nga mga tawo gipanganak nga may daotang mga taras ug mga depekto. (Genesis 6:5; Deuteronomio 32:5) Tinuod, kanang mga pulonga mapadapat ngadto sa tanang tawo.” Apan kining mga tekstoha gitumong ngadto sa duha ka linaing mga grupo sa tinong mga panahon ug sa tinong mga dapit. Dili gayod kini mapadapat ngadto sa tanang tawo.

D. C., Czech Republic

Ang “Pagmata!” nagtubag: Tinuod nga kining mga pulonga dunay tinong kapadapatan ngadto sa mga tawo nga nabuhi sa wala pa ang Lunop ug ngadto sa nasod sa Israel. Hinunoa, ang Bibliya sublisubling nagpatin-aw nga “ang tanan nakasala ug wala makaabot sa himaya sa Diyos.” (Roma 3:23; 5:12; Job 14:4; Salmo 51:5) Busa, ang mga Israelinhon ug ang mga tawo nga nabuhi sa wala pa ang Lunop gikutlo ingong mga pananglitan sa pagkadili-hingpit sa tawo.

Mga Talaadlawan Wala mo masayod kon unsa ako kamalipayon nga nadawat ang artikulong “Ang Talaadlawan​—Usa ka Kasaligang Higala.” (Agosto 8, 2001) Ako 20 anyos ug ako nagatipig ug talaadlawan sukad sa 11 anyos pa ako. Mahanduraw ninyo kon unsay akong gibati sa dihang basahon ko ang akong kataw-anang mga buhat, ang una kong mga gikaibgan sa dihang tin-edyer na ako, mga balak, mga kaulaw, ug bisan ang adlaw sa akong bawtismo ug ang akong mga pagbati nianang adlawa.

L. C., Italya

Ingong usa ka biktima sa pag-abuso sa pagkabata, natabangan ako sa akong talaadlawan aron mas pa nakong masayran ang akong kaugalingon ug aron masagubang ang emosyonal nga kasakit. Nakahimo na akog pag-uswag sa espirituwal nga mga butang.

E. L., Tinipong Bansa

“Scleroderma” Kagahapon gipaagi ako sa emerhensiyang pagdisdis nga tingali makapahinabog kadaot sa akong panan-aw sa akong walang mata. Gibati ko ang kalisang ug depresyon. Paghiuli nako sa balay, miabot ang gula sa Agosto 8, 2001, nga may asoy sa kinabuhi ni Marc Holland nga “Ang Akong Pagsagubang sa ‘Scleroderma.’” Nadasig ako sa iyang reaksiyon bahin niining makalilisang nga sakit, ilabina sa iyang pagtuo ug determinasyon nga mopadayon sa pag-alagad kang Jehova. Daw gamay ra kaayo ang akong problema kon itandi sa iyaha.

L. B., Tinipong Bansa

Pag-ampo Salamat sa artikulong “Mga Batan-on Nangutana . . . Sa Unsang Paagi Makatabang Kanako ang Pag-ampo?” (Hulyo 22, 2001) Ang pagbasa kon sa unsang paagi nakatabang ang pag-ampo sa daghang batan-on sa pag-atubang sa ilang mga problema nakadasig kanako nga mas gawasnong makigkomunikar kang Jehova.

D. B., Italya

Ang artikulo nakatabang kanako aron makaamgo nga gikinahanglan nako ang usa ka suod nga relasyon uban sa Diyos. Sa akong edad nga 16, lisod kaayo kini. Daghan kaayong tentasyon ug pagpit-os sa isigkaingon. Naghunahuna ako kon posible ba akong makabaton ug Bibliya.

M. A., Tinipong Bansa

Ang “Pagmata!” nagtubag: Adunay mga kahikayan nga gihimo aron maduaw sa mga Saksi ni Jehova ang among magbabasa ug mahatdan siyag kopya sa Bibliya.

Nagustohan nako ang giingon sa batan-on nga si Paul, kinsa miingon nga mihangyo siya kang Jehova ug kalinaw sa hunahuna. Kanunay akong naghangyo kang Jehova nga tabangan ako nga magmatimbang kanunay sa akong adlaw-adlaw nga pagkinabuhi ug sa mga desisyon nga kinahanglan nakong himoon. Karon mohangyo usab ako ug kalinaw sa hunahuna. Daghan kitag makat-onan gikan sa atong mga batan-on. Ako 62 anyos na.

M. P., Australia