Kon Mas Mainitan Ka sa Adlaw Mas Maayo ang Imong Pagkatulog

MAGLISOD ka ba pagkatulog? Tingali ang problema mao ang pagkadili-kaayo mainitan sa adlaw, ilabina kon tigulang ka na. Di pa dugay, ang mga tigdukiduki sa Japan mihimo ug usa ka pagtuon sa mga residente sa balay amomahan nga nag-antos sa pagkadili-makatulog, ug ilang nadiskobrehan nga walay maayong kinatulgan ang mga residente tungod kay dili kaayo sila mainitan sa adlaw. Sa samang panahon, ang mga pagsusi sa dugo nagbutyag nga kining tigulang nga mga residente dunay ubos nga sukod sa hormone nga melatonin.

Ang melatonin himoon diha sa pineal gland sa utok. Ilalom sa normal nga mga kahimtang, ang adlaw-adlaw nga paghimo ug melatonin makapadaghan niini diha sa dugo “sa magabii ug halos dili mamatikdan sa maadlaw,” matod sa taho sa The Journal of Clinical Endocrinology & Metabolism. Apan, kon dili kaayo mainitan ang mga tigulang sa adlaw, mous-os ang gidaghanon sa melatonin diha sa dugo. Mopatim-aw nga kon maylabot sa lawas, kining pagkadili-kaayo mainitan sa adlaw maoy hinungdan nga dili maklaro ang kalainan sa adlaw ug gabii, nga gituohan sa mga tigdukiduki nga makaapektar sa maayong pagkatulog.

Sa dihang ang dili makatulog nga mga tigulang mainitan ug upat ka oras sa sanag nga artipisyal nga kahayag sa tungatunga sa adlaw (alas diyes hangtod sa udto ug alas dos hangtod sa alas kuwatro) sulod sa upat ka semana, ang ilang melatonin mouswag “ngadto sa gidaghanon nga susama nianang iya sa grupo sa mga batan-on nga gieksperimentohan nga nagsilbing sukdanan,” matod sa taho. * Sa samang panahon, mas maayo na ang ilang pagkatulog.

Tungod niining maong mga resulta ang mga tigdukiduki “nagtuo nga ang mga tigulang, ilabina ang mga EI [elderly insomniacs o mga tigulang nga dili makatulog], nga naggugol sa dakong bahin sa ilang matag adlawng kinabuhi sa sulod sa ilang lawak, dili kaayo mainitan sa adlaw maong dili takdo ang ilang circadian timing system [ang biolohikanhong orasan sa ilang lawas].” Tungod kay ang pipila ka tigulang nagtomar man ug melatonin nga mga supplement aron makatulog, ang taho nag-ingon: “Tungod sa posibleng segundaryong mga epekto sa dugayng pagtomar ug melatonin, ang pagbulad sa kainit sa adlaw sa tungatunga sa adlaw mahimong magtaganag mas maayo, epektibo, luwas, ug makontrolar-sa-kaugalingon nga paagi sa pagtambal alang sa mga EI nga diyutay rag melatonin.”

Busa kon ikaw anaa lang kanunay sa sulod sa balay ug maglisod sa pagkatulog, nganong dili nimo sulayan nga dugangan ang panahon nga magsuroysuroy sa gawas​—o labing menos pasudlon ang igong kahayag sa adlaw nganha sa imong balay, ug ayaw sug-i ang imong lawak katulganan sa magabii. Makaplagan nimo nga kon mas mainitan ka sa adlaw mas maayo ang imong pagkatulog.

[Footnote]