Mga Linog, Tagna sa Bibliya, ug Ikaw

SA WALA pa siya mamatay, gitagna ni Jesus ang mga hitabo ug mga kahimtang nga magpamatuod nga kining kalibotana anaa na sa “kataposan sa sistema sa mga butang.” Kanang yugtoa, matod niya, pagatiman-an sa mga butang sama sa mga kamatay, kanihit sa pagkaon, ug dagkong gubat. Gihisgotan usab niya ang “dagkong mga linog” nga mahitabo sa “nagkalainlaing mga dapit.” (Mateo 24:​3, 7; Lucas 21:​10, 11) Gitumong ba ni Jesus ang atong adlaw?

Daghan ang nag-ingong wala. Sila nangangkon nga ang gidaghanon sa mga linog wala kaayo mouswag sa di pa dugayng mga dekada. Gani, ang National Earthquake Information Center sa T.B. nagtaho nga ang gidaghanon sa mga linog nga may gikusgong 7.0 ug kapin pa “halos mao lang gihapon” sulod sa ika-20ng siglo. *

Apan, matikdi nga ang katumanan sa tagna ni Jesus wala magkinahanglan ug pag-uswag sa gidaghanon o puwersa sa mga linog. Ang giingon lamang ni Jesus mao nga adunay dagkong mga linog sa nagkalainlaing mga dapit. Dugang pa, siya miingon nga kining mga hitaboa magtimaan sa “sinugdanan sa mga kaul-ol sa kasakit.” (Mateo 24:8) Ang kasakit sukdon, dili sa gidaghanon sa mga linog o kon pilay sukod niini diha sa Richter nga sukdanan, kondili sa epekto niini nganha sa mga tawo.

Sa pagkatinuod ang mga linog nagpahinabog dakong kasakit sa atong adlaw. Gani, sa ika-20ng siglo, milyonmilyon ang nangamatay o nawad-ag puy-anan tungod niini nga mga katalagman. Ang mga eksperto nag-ingon nga daghan niini nga mga kamatayon malikayan unta. “Diha sa nagakaugmad nga mga nasod,” nagtaho ang BBC News, “ang mga lagda labot sa pagpanukod subsob isipon nga dili kaayo hinungdanon kon itandi sa panginahanglan sa barato, paspas pagkatukod nga mga balay nga makatagbaw sa mga panginahanglan sa tulin nga urbanisasyon.” Sa pagkomento bahin sa duha ka di pa dugayng mga trahedya, si Ben Wisner, usa ka eksperto sa mga katalagman sa siyudad, nag-ingon: “Ang mga linog dili mao ang nakapatay niining mga tawhana. Ang nakapatay kanila mao ang kombinasyon sa kasaypanan, kawalay-pagtagad, korapsiyon, ug kadalo sa tawo.”

Oo, usahay ang labing makamatayng mga epekto sa linog mao ang kahakog ug pagpasagad sa tawo. Makaiikag nga ang maong mga taras gipasiugda sa laing tagna sa Bibliya bahin sa “kataposang mga adlaw” niining sistemaha. Nianang panahona, nag-ingon ang Bibliya nga ang mga tawo “mahunahunaon sa kaugalingon, mahigugmaon sa salapi,” ug “dili-mabination.” (2 Timoteo 3:1-5, The Amplified Bible) Duyog sa mga pulong ni Jesus maylabot sa kataposan sa sistema sa mga butang, kining tagnaa nagtagana ug klarong ebidensiya nga kita nagkaduol na sa panahon sa dihang ang Diyos maghatag ug kahupayan sa sinakit nga katawhan gikan sa tanang presenteng mga hinungdan sa kasakit ug pag-antos​—lakip na sa dagkong mga linog.​—Salmo 37:11.

Buot ba nimong mahibalo ug dugang bahin niining binase-sa-Bibliya nga paglaom? Kontaka ang mga Saksi ni Jehova sa imong dapit, o pagsulat ngadto sa nahiangay nga adres sa panid 5.

[Footnote]