Mga Batan-on Nangutana . . .

Sa Unsang Paagi Makasangyaw Ako sa Akong mga Eskolmet?

“Nagsangyaw ko sa dihang wala damha gikahibalag ko ang usa nako ka kaila. Gidaog ako sa kahadlok! Ang akong kauban sa pagsangyaw kinahanglang mosalga ug makig-estorya alang kanako.”​—Alberto.

 “Nahibalo ko nga usa sa akong mga klasmet nagpuyo niining dalana, busa ang akong magulang nga lalaki maoy akong gipasulti diha sa tanang pultahan. Taudtaod gikapoy na siya ug gihangyo ko nga maoy makigsulti sa sunod nga pultahan. Nanuktok ko, ug​—puwerteng tayminga​—ang ako gayong klasmet ang miabli! Hilabihan gayod nakong kuyawa!”​—James.

ANG mga batan-on sagad mobati nga dili normal ang paghisgot bahin sa relihiyon. Apan, taliwala sa matuod nga mga Kristohanon, gipabilhan sa mga batan-on ang ilang hinatag-sa-Diyos nga pribilehiyo nga ipaambit ang ilang pagtuo sa uban. Busa libolibo ka batan-ong mga Saksi ni Jehova ang nakig-ambit sa balay-balay nga buluhatong pagsangyaw. Apan ang pipila mosangyaw uban ang kahadlok nga basig ikahibalag nila ang usa sa ilang mga eskolmet. “Mahadlok gihapon akong makahibalag ug mga eskolmet,” matod ni Jennifer, bisan tuod migraduwar na siya sa hayskul pipila na ka tuig ang milabay.

Kon ikaw usa ka batan-ong Kristohanon, ingon usab niana tingali ang imong bation usahay. Siyempre, kitang tanan dili buot nga isalikway, busa normal lamang gayod nga mobatig diyutayng kabalaka kon makig-estorya bahin sa relihiyon ngadto sa usa ka eskolmet. * Apan walay katarongan nga magpadaog ka sa kahadlok. Nahinumdom ka ba sa tawong ginganlan sa Bibliya ug “Jose nga taga-Arimatea”? Mituo siya sa mga butang nga iyang nakat-onan gikan kang Jesus. Apan, ang Bibliya naghubit kang Jose ingong “usa ka tinun-an ni Jesus apan sa tago tungod sa iyang kahadlok sa mga Hudiyo.” (Juan 19:38) Karon, unsa kahay imong bation bahin sa usa ka higala nga buot molilong sa inyong panaghigalaay? (Lucas 12:​8, 9) Nan, dili ikatingala nga ang Diyos nagdahom nga ang tanang Kristohanon mohimog “pagpahayag sa dayag” sa ilang pagtuo. (Roma 10:10) Naglakip kana sa pagpakig-estorya sa mga batan-on diha sa imong eskuylahan.

Nabuntog ni Jose nga taga-Arimatea ang iyang kahadlok, labing menos sa gilapdon nga nangayo siyag pagtugot nga malubong ang lawas ni Jesus. Sa unsang paagi mabuntog nimo ang imong kahadlok?

Pag-ugmad sa Kaikag sa Pagsangyaw

Si apostol Pablo wala gayod maulaw sa pagpakig-ambit sa iyang pagtuo sa uban. Sa Roma 1:​15, gihubit niya ang iyang kaugalingon ingong maikagon sa pagwali sa mensahe sa Bibliya. Unsay hinungdan sa maong kaikag? Siya nag-ingon, sumala sa narekord sa bersikulo 16: “Wala ko ikaulaw ang maayong balita; kini, sa pagkatinuod, gahom sa Diyos alang sa kaluwasan sa matag usa nga may pagtuo.” Komosta ang bahin kanimo? Imo bang napamatud-an gayod ang kamatuoran sa imong kaugalingon ? (Roma 12:2) Nagtuo ka ba mismo nga ang mensahe sa Bibliya maoy “gahom sa Diyos alang sa kaluwasan”?

Ang pagtambong lamang sa Kristohanong mga tigom uban sa imong mga ginikanan dili pa igo. “Sayon lang ang pagtambong sa mga tigom,” matod sa usa ka batan-on nga ginganlag Deborah, “tungod kay mao man kanay giingon sa imong mga ginikanan nga imong buhaton. Apan sa dihang pangutan-on ako sa mga tawo bahin sa Bibliya, wala ko mahibalo sa mga tubag.” Ingon usab niana ang giangkon sa usa ka batan-on nga ginganlag Mi Young: “Angay natong pamatud-an sa atong kaugalingon nga kini mao ang kamatuoran.”

Unsay makatukmod kanimo sa pagpaambit sa imong nahibaloan sa Bibliya ngadto sa uban? Ang personal nga pagtuon sa Bibliya. Usa ka batan-on nga ginganlag Sean nag-ingon: “Sa dihang magsugod ka sa imong personal nga pagtuon sa Bibliya, magsugod ka paghimo sa kamatuoran nga imo na. Nagtuon ka alang sa imong kaugalingon.” Matuod, dili tanan ang kinaiyanhong mahiligon sa pagtuon. “Dili ko gustong mobasa,” miangkon si Shevon. “Busa sa sinugdan nalisdan ko sa pagbasa sa Ang Bantayanang Torre ug Pagmata! o pagbasa sa Bibliya sa adlaw-adlaw. Apan sa kadugayan, nagustohan na nako kana.”

Unsay moresulta gumikan nianang makugihon nga pagtuon? Si apostol Pablo nag-ingon: “Ang pagtuo mosunod sa butang nga nadungog.” (Roma 10:17) Samtang motubo ang imong pagtuo ug kombiksiyon, mausab gayod ang imong tinamdan. Usa ka batan-on nga taga-Brazil nga ginganlag Elisângela mihinapos: “Ang pagkahimong Kristohanon maoy usa ka dungog, dili usa ka butang nga ikaulaw.” Sa pagkatinuod, samtang magkadako ang imong pagtuo, matukmod ka sa pagpakig-estorya sa uban​—lakip na sa imong mga klasmet. Si Pablo miingon: “Kami . . . nagapasundayag ug pagtuo ug busa kami nagasulti.” (2 Corinto 4:13) Gawas pa, sa unsang paagi ikaw mahimong “hinlo gikan sa dugo” sa uban kon imong ihikaw ang nagahatag-ug-kinabuhi nga kahibalo gikan sa mga batan-on nga imong ikahibalag matag adlaw?​—Buhat 20:​26, 27.

Hinuon, ang pipila ka batan-ong mga Kristohanon mibating wala masangkapi sa pagpakig-estorya sa uban bahin sa Bibliya. “Kon wala ka mahibalo kon unsay imong isulti,” matod sa usa ka batan-on nga ginganlag Joshua, “ang pagsangyaw dili gayod makapahimuot.” Sa makausa pa, ang pagkuhag mas lalom nga kahibalo sa Bibliya motabang kanimo sa pagbuntog niini sa bug-os. (2 Timoteo 2:15) Diha sa mga kongregasyon sa mga Saksi ni Jehova, ang mga batan-on makaduol sa mga ansiyano sa kongregasyon ug makahangyog personal nga tabang aron maugmad ang mga katakos sa pagpanudlo. Matod sa usa ka batan-on nga taga-Alemanya nga ginganlag Matthias: “Sa dihang nakig-estorya na gayod ako sa mga tawo​—dili kay motanyag lang ug literatura sa Bibliya​—nalipay na akong mosangyaw.”

Sa kataposan, makaampo ka sa Diyos aron tabangan ka nga makasulti uban ang kaisog. (Buhat 4:29) Personal nga nasinati ni apostol Pablo ang tabang sa Diyos niining bahina. Sa 1 Tesalonica 2:​2, siya nag-ingon: “Kami nakabaton ug kaisog pinaagi sa atong Diyos nga isulti kaninyo ang maayong balita sa Diyos uban ang hilabihang pakigbisog.”  Sumala sa usa ka reperensiya, kining mga pulonga mahimong hubaron nga “ang Diyos nagkuha sa kahadlok gikan sa among mga kasingkasing.” Busa nganong dili moampo ug hangyoon ang Diyos nga kuhaon ang kahadlok gikan sa imong kasingkasing?

Ipaila ang Imong Kaugalingon

Kaharmonya sa maong pag-ampo, makahimo ka ug maisogon kaayo nga lakang. Nagtambag ang usa ka batan-ong taga-Britanya nga ginganlag Chic: “Tug-ani ang imong mga eskolmet nga ikaw usa ka Kristohanon.” Dili nimo buot nga mahimong usa ka ‘tinun-an sa tago.’ Giangkon sa usa ka batan-on nga ginganlag Rebecca nga kuyawan siya kaniadto nga makahibalag ug kaila diha sa buluhatong pagsangyaw. Apan siya miingon nga iyang nadiskobrehan nga “kon tug-anan nimo sila nga ikaw usa ka Kristohanon ug nga ikaw mamalaybalay, usahay mangutana sila, ‘Unya, makaadto ka kaha sa akong balay?’”

Apan nganong hulaton pa man nimong magkahibalag kamo nga wala damha? Pangitag mga kahigayonan nga mapaambit nimo ang imong pagtuo diha sa eskuylahan. Hinumdomi ang mga pangutanang gisukna ni apostol Pablo: “Unsaon . . . pagbutang nila ug pagtuo kaniya kinsa wala nila madunggi? Unsaon, sa baylo, nila pagkadungog kon walay magwali?” (Roma 10:14) Ikaw ang anaa sa kinamaayohang kahimtang sa pagtabang sa imong mga klasmet nga makadungog. Usa ka batan-on nga ginganlag Iraida nag-ingon: “Ang eskuylahan maoy usa ka teritoryong sangyawanan nga kaming mga estudyante lang ang makaabot.” Busa daghang batan-on ang nagpahimulos sa ilang situwasyon pinaagi sa pagsangyaw sa di-pormal nga paagi.

Apan, usahay dunay mga asaynment sa klase nga makahatag kanimog kahigayonan sa pagpaambit sa mga kamatuoran sa Bibliya. Usa ka dalagita nga taga-Britanya nga ginganlag Jaimie nag-ingon: “Gihisgotan namo ang ebolusyon sa klase sa science, ug gipahayag ko ang akong pagtuo. Usa sa mga lalaki nagbiaybiay kanako ug miingon nga ang mga Saksi ni Jehova ubos ug kinaadman ug dili takos mahiapil sa sistema sa eskuylahan. Apan, dihadiha ang ubang mga bata sa klase misugod sa pagpanalipod kanako.” Dayag nga nagbunga ang iyang reputasyon ingong sulondang Kristohanon. Si Jaimie midugang: “Ingong resulta, nakapahimutang akog usa ka kopya sa librong Is There a Creator Who Cares About You? ngadto sa usa ka klasmet.” *

Usa ka 14-anyos nga dalagita sa Romania nga ginganlag Roxana miasoy ug susamang kasinatian: “Ang akong magtutudlo nagpahibalo nga dunay panaghisgot sa klase bahin sa alkoholikong ilimnon, tabako, ug mga droga. Busa gidala nako ang Marso 22, 2000, nga gula sa Pagmata! nga may ulohang ‘Kon sa Unsang Paagi Ikaw Makahunong sa Pagpanabako.’ Nakita sa akong klasmet ang magasin, gikuha kini, ug nagdumili sa pag-uli niini kanako. Human mabasa kini, siya miingon nga determinado na siyang mohunong sa pagpanabako.”

Dili ka tingali makasinati kanunay ug ingon niana nga paborableng sanong. Apan ang Ecclesiastes 11:6 nag-awhag kanato: “Sa buntag ipugas ang imong binhi ug hangtod sa gabii ayaw papahulaya ang imong kamot; kay ikaw wala masayod kon diin kini magmalamposon.” Kon wala gayoy paborableng sanong, ang pagpaambit sa imong pagtuo diha sa eskuylahan mopahiluna ug sukaranan alang sa mas maayong panaghisgot kon makahibalag ka ug eskolmet diha sa balay-balay nga ministeryo. Matod sa usa ka batan-ong taga-Britanya nga ginganlag Jessica: “Ang pagpamatuod ngadto sa imong mga kaila sa eskuylahan sa pagkatinuod mas sayon tungod kay kaila na nimo sila.” Mahimong matingala ka na lang kon unsa ka maukit-ukiton ang pipila sa imong mga eskolmet bahin sa imong mga gituohan.

Tinuod, dili tanan ang modawat kanimo sa malulotong paagi. Apan si Jesus mihatag niining praktikal nga tambag: “Kon adunay dili magpadayon kaninyo o magpatalinghog sa inyong mga pulong, sa paggula nianang balaya . . . itaktak ang abog gikan sa inyong mga tiil.” (Mateo 10:14) Sa laing pagkasulti, dili nimo angayng hunahunaon nga ikaw mao ang gisalikway. Biya lang nga malinawon ug pangitag laing tawo nga mas andam maminaw. Sa madugay o sa madali makakaplag ka ug mga tawong matinud-anog-kasingkasing nga gutom sa kamatuoran ug andam maminaw. Dili ba makapalipay kon usa kanila imong isigkaestudyante? Kon mahitabo kana, malipay ka nga nabuntog nimo ang imong kahadlok sa pagpaambit sa imong pagtuo ngadto sa imong mga klasmet.

[Mga footnote]

[Blurb sa panid 12]

“Sa dihang magsugod ka sa imong personal nga pagtuon sa Bibliya, magsugod ka paghimo sa kamatuoran nga imo na.”​—Sean.

[Hulagway sa panid 10]

Ayawg kahadlok sa pagpaila sa imong kaugalingon ingong usa ka Kristohanon

[Hulagway sa panid 10]

Ang mga asaynment sa klase kasagarang mohatag ug mga kahigayonan sa pagpaambit sa mga kamatuoran sa Bibliya