Gikan sa Among mga Magbabasa

Post-traumatic Stress Disorder (PTSD) Sa dihang akong nadawat ang Agosto 22, 2001, nga gula sa Pagmata!, nga nag-ulohag “Pagsagubang sa ‘Post-traumatic Stress,’” nasorpresa gayod ako mao nga dili ako makahunong sa paghilak. Ako nag-ampo kanunay nga tudloan ako ni Jehova sa pagsagubang sa akong PTSD. Ako nagtuo nga ako walay pulos, ug nagsugod pagkawala ang akong pagtahod sa kaugalingon. Karong adlawa akong nadawat ang tubag sa akong mga pag-ampo. Walay mga pulong nga makapahayag sa kahinungdanon niining mga artikuloha alang kanako, sa espirituwal ug sa emosyonal.

C. K., Japan

Ako maoy usa ka 40-anyos nga hamtong nga nag-antos gumikan sa post-traumatic stress disorder tungod sa mga kasinatian sa bata pa ako. Gitubag sa inyong mga artikulo ang akong mga pag-ampo. Kini makapadasig ug mapuslanon. Salamat sa maong maalamong mga artikulo. Padayon kamo sa pagpatik ug ingon niana nga mga artikulo!

R.D.M., Tinipong Bansa

Ang kasakit sa pagkinabuhi ug pag-antos gumikan niining sakita lisod kaayong ipahayag. Ang akong amahan maoy usa ka alkoholiko, ug sukad sa pagkabata kanunay akong mabiktima sa iyang kasuko ug kabangis. Giabusohan usab ako sa sekso. Nalipay ako nga gihisgotan niining artikuloha nga kadtong dunay PTSD may kiling nga maghusga sa ilang kaugalingon ug nanginahanglan ug dakong pagdasig. Ako kinasingkasing nga nagpasalamat kang Jehova ug kaninyong tanan tungod niining nindot nga mga artikulo.

Y. S., Japan

Ang mga artikulo sama niini motabang kanamo sa pagsagubang sa emosyonal nga paagi ug mopalig-on usab sa among hunahuna, aron mouswag kami. Palihog ipadayon ang pagsulat sa maong kinahanglanong mga artikulo nga motabang kanamo sa pagsabot sa among kaugalingon!

C. L., Tinipong Bansa

Ako nadayagnos nga dunay PTSD, apan ang nahibaloan lang nako bahin sa maong diperensiya mao nga motunghag kalit ang nangaging mga hitabo diha sa panumdoman. Ang inyong artikulo nagdetalye bahin sa mga simtoma. Gibasol nako ang akong kaugalingon kaniadto tungod sa akong pagkaluya sa espirituwal. Apan nakatabang ug dako ang punto nga angay natong hunahunaon, dili kon unsay atong panglantaw sa atong kaugalingon, kondili kon unsay panglantaw ni Jehova kanato.

J. S., Japan

Malisod ang pagbasa niining artikuloha, tungod kay gibasa ko kini nga naghilak. Sa miaging duha ka tuig, akong mahinumdoman ug kalit ang mga hitabo ug ang makahahadlok nakong mga damgo bahin niadtong gabhiona nga namatay ang akong lolo diha sa akong mga bukton tungod sa atake sa kasingkasing. Mas daghan ang panahon nga maghilak ako diha sa Kristohanong mga tigom. Kining impormasyona nakatabang kanako sa pagsabot kon nganong sakit gihapon kaayo ang akong pagbati. Karon ako nasayod kon asa modangop alang sa tabang​—ngadto sa akong labing mahigugmaon ug mahangawaon nga langitnong Amahan ug sa iyang organisasyon.

P. T., Australia

Lima ka tuig kanhi namatay ang akong bana tungod sa aksidente sa sakyanan, ug usa ka tuig sa ulahi ako nagsugod sa pagsinatig talagsaong mga simtoma sa lawas. Sa dihang akong nadawat kining artikuloha, gibati ko gayod nga ang labawng nakasabot niining kahimtanga mao si Jehova ug ang iyang organisasyon. Ang pagbaton lamang niining pagbatia nakahatag kanakog bag-ong kusog nga akong gikinahanglan aron makapadayon. Dawata ang akong kinasingkasing nga pasalamat tungod sa tanang paningkamot nga inyong gihimo!

A. K., Japan

Pagbasa sa Bibliya Kinasingkasing akong nagpasalamat kaninyo tungod sa artikulong “Mga Batan-on Nangutana . . . Unsaon Nako Paghimo nga Mas Makalingaw ang Pagbasa sa Bibliya?” (Agosto 22, 2001) Ako maoy 17 anyos. Wala ko gayod matapos pagbasa ang tibuok Bibliya. Usahay mohunong ako tungod lang kay akong gibati nga ako puliki kaayo, ug usahay ako nagtuo nga ang akong gibasa dili gayod mapuslanon kanako. Apan ang mga batan-on sa maong artikulo nalipay gayod sa ilang pagbasa sa Bibliya ug nakabenepisyo niini. Nakadasig gayod kana kanako sa pagkabaton ug gana sa pagbasa usab niini. Karon buot ko nga magpadayon sa pagpaningkamot ug dili molunga.

Y. T., Japan