Pagsagubang sa Hagit sa Pagkainahan

Tungod kay ang mga anak naghawas sa umaabot nga kaliwatan, nan ang mga babaye nga nag-umol kanila, ang ilang mga inahan, takos gayod nga tahoron, pasidunggan, ug paluyohan. Bisan tuod ang modernong kalibotan naghulagway sa pagkainahan sa nagkasumpaking mga paagi, ang Bibliya nagpamatuod nga ang mga anak maoy panalangin gikan sa Diyos ug mahimong tuboran sa kalipay alang sa mga ginikanan. (Salmo 127:3-5) Bisan pa niana, ang Kasulatan naghisgot usab sa tinuod nga kahimtang sa pagkainahan. Natala sa Bibliya ang daghan sa mga problema niini.

Ang mga desisyon nga himoon sa mga ginikanan labot sa pagkaginikanan ug pagkainahan dunay dulot ug dumalayon nga impluwensiya diha sa kinabuhi ug kinaiya sa ilang mga anak. Kining maong mga desisyon mahimong magpahinabo ug dagkong kausaban sa estilo sa kinabuhi sa mga ginikanan, mao nga kinahanglang himoon kini sa maampingong paagi. Naglakip kini sa mga pangutana sama sa: Angay bang motrabaho ang inahan sa gawas sa balay? Kon oo, unsa ka dugay? Kinsay mag-atiman sa mga anak samtang ang inahan nanarbaho? Sa kataposan, angayng himoon sa mga ginikanan ang ilang gituohan nga labing maayo alang sa ilang mga anak ug kon unsa usab ang husto atubangan sa Diyos.

 Bisan pa niana, ang mga inahan dili angayng mobati nga nag-inusara sa pagpakigbisog sa paghimog maalamong mga desisyon. Makabaton silag dakong kahupayan sa mga pulong sa Isaias 40:​11, nga nagpaila nga ang Diyos dunay linaing kaikag sa mga panginahanglan sa mga inahan nga dunay mga masuso, kinsa iyang “agakon uban ang pag-amping.” Gipasundayag sa Diyos ang dako kaayong kaikag pinaagi sa pagtagana diha sa Bibliya ug daghang lagda nga makahimo sa pagkainahan nga makapalipay ug malamposon.

❖ Magmakataronganon: Ang mga Kristohanon kinahanglang mailado sa ilang pagkamakataronganon. (Filipos 4:5) Si Janet Penley, usa ka magsusulat ug inahan, nakakat-on sa bili niining prinsipyoha. “Gisugdan nako ang pagkainahan uban ang taas kaayong mga panahom,” siya miingon. “Maoy tuyo nako nga mahimong kinamaayohang inahan sukad. Gibasa nako ang tanang libro ug namati sa tanang eksperto. Apan inay mobating malamposon ug hanas, mibati na hinuon akong nakulangan ug naugtas.” Siya miingon nga “ang pagpaningkamot nga matuman ang mga panahom sa uban ug mopahiuyon sa usa ka ‘hingpit’ nga sukdanan makapaluya ug makapahinabog kabalaka ug kahasol sa konsensiya.”

❖ Himoang yano: “Ang gipameligro sa mga pamilya nga mawala niining hilabihan ka puliki nga estilo sa kinabuhi,” misulat ang magasing Newsweek, “mao ang hinungdanong bahin ug linaing kasinatian sa panahon sa pagkabata ug ang kalipay sa pamilyahanong kinabuhi.” Maoy hinungdan nga daghang inahan ang nangandoy ug mas yanong kinabuhi. Sa unsang paagi makab-ot nimo kini? Una, hikaya ang mga prioridad, nga magtagad sa “mas hinungdanong mga butang,” lakip na sa panahon ug personal nga pag-atiman nga gikinahanglan sa imong mga anak. (Filipos 1:​10, 11) Ikaduha, analisaha ang imong estilo sa kinabuhi. Kinahanglan tingali nimong ihiklin ang mga kalihokan ug mga kabtangan nga dili gayod hinungdanon.

 Unsay labing hinungdanon sa imong kinabuhi? Ang pagbaton ba sa tanan dihadiha, o mahimo bang ioktaba ang pipila ka tumong samtang mangagpas sa uban? Si Carolyn, usa ka kabos nga inahan, nag-asoy kon sa unsang paagi siya nakasagubang: “Gipayano nako ang mga butang ug gimenosan ang mga galastohan.” Si Gloria, usa ka inahan nga tulo ang anak, nahinumdom: “Wala miy kuwarta para sa mga sinina nga mahalon ug nunot sa uso, apan magtahi ko ug mga sinina alang sa mga bata, ug giingnan nako sila nga kini espesyal tungod kay wala silay kaparehas.”

Ang Pulong sa Diyos nag-ingon nga ang tawo nga “nagabantay sa katakos sa pag-ila makakaplag ug maayo.” (Proverbio 19:8) Gikinahanglan ang pagsabot aron matimbangtimbang ang daghan kaayong kalingawan, mga gamit, ug mga uso nga tungod niana nabug-atan ang mga inahan ug mga anak. Si Judith, usa ka inahan nga taga-Habagatang Aprika, mipatugbaw: “Kanunay kaming naladlad sa bag-ong mga produkto, mas maayong teknolohiya, ug dugang mga serbisyo!” Gipakita dinhi kon giunsa pagsagubang ang maong hagit ni Angela, taga-Alemanya nga inahan sa upat ka anak: “Kinahanglang tinoon nimo kon unsay hinungdanon ug mapuslanon alang kanimo, ug tabangi ang imong mga anak sa pagbuhat sa ingon.”

 ❖ Himoa ang mga kausaban nga posibleng buhaton: “Gamita ang sentido komon ug maayong panghukom,” nagtambag ang Bibliya. (Proverbio 3:​21, Contemporary English Version) Kon sa pagkakaron nanarbaho ka sa gawas sa balay, ang imo bang pamilya makasustiner nga magsalig lamang sa kinitaan sa imong bana? Aron matabangan ka sa pagtubag niining pangutanaha, tinoa kon pilay limpiyong kita human kana maibani sa mga buhis, galastohan sa pag-atiman sa bata, plete sa pagngadto-nganhi sa trabahoan, besti, pagpangaon diha sa restawran, ug uban pang mga galastohan. Dugang pa, ang kita sa imong bana mahimong buhisan ug dako kon tungod sa inyong tiningob nga kita mahilakip kamo sa grupo nga mas taas ug kita. Matingala ka tingali nga gamay na lang kaayo ang mahibilin.

Ang uban manarbaho ug pipila lang ka oras o diha lang sa duol sa balay, nga magpasabot ug mas menos nga kita apan mas dakong panahon uban sa mga bata. Kon mohukom ka nga moundang ug trabaho ug kon ang imong trabaho hinungdanon kanimo tungod sa imong pagtamod-sa-kaugalingon ug pagbati nga duna kay nalampos, hunahunaa kon sa unsang paagi mahuptan nimo kining hinungdanong mga elemento samtang anaa ra sa balay.

❖ Pangayog tabang: Ang Pulong sa Diyos subli-subling nagpakita nga ang “pagtuaw alang sa tabang” magpahinabog mga resulta. (Exodo 2:​23, 24; Salmo 34:15) Ang pagpangayo ug tabang sa usa ka inahan angayng magtukmod sa bana nga motabang. Pinaagi sa iyang tabang makaestablisar ka tingali ug sistema sa pagtinabangay sa buluhaton sa panimalay aron nga duna kamoy panahon sa pagtuman sa mga tumong nga giplano ninyong duha​—sama sa pagkaanaa kanunay aron sa pagtabang sa mga bata. Kon posible, ang usa ka inahan angay usab mangayog tabang sa lainlaing mga tawo, lakip na sa pamilya ug kasaligang mga higala, nga pareho niyag gikaikagan ug mga tumong.

Daghang inahan ang nakadawat ug bililhong tabang gikan sa lokal nga Kristohanong kongregasyon sa ilang mga isigkamagtutuo. Si María, nga inahan sa tulo ka anak, nakaamgo nga “ang pagpakigsuod sa kongregasyon” maoy usa sa mga paagi nga “ang Diyos nagpakita kanatog gugma ug kaluoy ug nagpakita kanato nga siya may kahingawa kanato.”

❖ Paglingawlingaw: Bisan si Jesus, nga usa ka hingpit nga tawo nga dagaya sa kusog, nag-awhag sa iyang mga tinun-an sa pag-adto nga ‘silasila ra sa usa ka mingaw nga dapit ug mopahulay makadiyot.’ (Marcos 6:30-32) Ang kalamposan ingong inahan nagdepende sa imong katakos sa pagpabiling timbang latas sa malisod nga mga panahon. Tinuod nga ang imong mga anak nagkinahanglan kanimo, apan gusto usab nila nga ikaw malipay ug mahimong tagbaw. Nagkinahanglan ka ug igong pagpahayahay.

Si Angela, nga gihisgotan ganina, dunay plano alang sa pagpahayahay: “Maggahin ko ug hilom nga panahon sa buntag. Mogugol ko ug labing menos tunga sa oras alang sa akong kaugalingon. Ug ang akong bana ug ako dunay usa o duha ka gabii kada semana sa dihang ang among mga anak gidahom nga moadto sa laing bahin sa balay ug magbuhatbuhat didto nga dili maglangaslangas. Sa ingon dunay usa ka oras nga kamikami ra.”

❖ Hatagig prioridad ang espirituwalidad: Napanid-an nga ang mga hagit sa pagkainahan gipasamot sa pagkalimot sa katuyoan sa pagkainahan ug sa kakulang sa mga prioridad. Ang Kristohanong mga pamilya makatagamtam ug kalipay kon magtambayayongay sila sa pag-una sa Diyos diha sa ilang kinabuhi. Si apostol Pablo misulat: “Ang diyosnong pagkamahinalaron mapuslanon sa tanang butang, kay naghupot kini ug saad sa kinabuhi karon ug sa umaabot.” (1 Timoteo 4:8) Ang usa ka pamilya nga magkinabuhi uban ang diyosnong pagkamahinalaron ug magsunod sa giya sa Diyos nga anaa sa Bibliya makakaplag ug kalipay. Bisan pag usa lang ka membro sa pamilya ang magpadapat sa mga prinsipyo sa Bibliya, ang mga kahimtang mas maayo kay sa wala gayoy magpadapat niana.

Si Adele, usa ka Kristohanong inahan nga bug-os-panahong nagtrabaho, nakakita sa mga benepisyo sa pagkamahunahunaon sa espirituwal nga mga butang. Siya nag-ingon: “Aduna kitay daghan kaayong lagda ug impormasyon diha sa pinasukad-sa-Bibliya nga mga publikasyon nga nag-edukar kanato kon unsay giatubang sa atong mga anak ug kon sa unsang paagi kita makatabang kanila. Ang pagkakita sa imong mga anak nga midawat sa imong gipakaon kanila sa espirituwal makapahimo nianang takos sa pagsakripisyo. Kon makita nimo ang gagmay, positibo nga mga butang sa ilang panggawi ug paagi sa pagpangatarongan, maamgohan nimo nga sila nakasabot niana ug ang imong mga paningkamot nagbunga ra.” *

Oo, posible nga molampos sa lumba sa paglabang sa babag sa pagkainahan. Ang Diyos mismo naghatag sa makapahupayng pasalig nga ang mga paningkamot sa makugihon ug nagsakripisyo-sa-kaugalingon nga mga inahan nga nagsalig kaniya dili makawang. Ang mga inahan nga nag-ugmad ug personal nga relasyon uban kaniya makakaplag ug kahupayan sa iyang saad nga ‘hatagan ug gahom ang gikapoy.’​—Isaias 40:29.

[Footnote]

[Kahon sa panid 10]

Ang Impluwensiya sa Inahan

Ingong inahan, usahay maghunahuna ka tingali kon unsa ka dako ang impluwensiya nimo diha sa kinabuhi sa imong anak. Usahay, ang impluwensiya sa mga katalirongan, magtutudlo, kalingawan, mga dula sa video, ug musika daw mas puwersado kay sa imoha.

Tagda ang pananglitan ni Jochebed, ang inahan ni Moises. Nagkinabuhi siya sa malisod kaayo nga panahon ug limitado ra ang iyang mahimo labot sa kon unsay dangatan sa iyang anak. Bisan pa niana, gigamit niya ang mga kahigayonan nga iyang nahuptan sa pag-impluwensiya sa pagtubo sa iyang anak. Una, nagpasundayag siya ug maisogong pagtuo pinaagi sa paghimog mga paagi nga dili mamatay si Moises. Gigantihan sa Diyos ang iyang pagtuo dili lamang pinaagi sa pagtipig sa kinabuhi sa bata kondili usab pinaagi sa paghikay sa mga sirkumstansiya nga nagtugot kang Jochebed nga magsilbing iyang iwa​—ug inahan.​—Exodo 1:​15, 16; 2:1-10.

Dayag nga si Jochebed nakatabang sa pag-impluwensiya sa personalidad sa iyang anak. Ang kamatuoran nga ang hamtong nga Moises nasuod sa mga Hebreohanon ug sa ilang Diyos bisan pa sa iyang harianong kalambigitan sa Ehipto nagpamatuod sa impluwensiya sa iyang mga ginikanan samtang nagdako siya.​—Hebreohanon 11:24-26.

Ingong inahan, lagmit mas daghan ka pag mga kahigayonan kay kang Jochebed sa pag-impluwensiya sa imong anak. Gipahimuslan ba nimo ang pipila ka tuig sa pagkabata sa imong anak sa pagtagana ug dumalayon, diyosnong instruksiyon? O gitugotan ba nimo ang presenteng kultura nga moapektar ug dako sa pagtubo sa imong anak?

[Mga hulagway sa panid 10]

Patabanga ang uban sa buluhaton sa balay, paggahin ug panahon nga kamokamo ra, ug hatagig prioridad ang espirituwalidad