Gikan sa Among mga Magbabasa

Pagkamagul-anon Kaayo sa Tin-edyer Pagkadako sa akong kalipay sa pagkadawat sa seryeng panghapin sa Pagmata! nga “Tabang Alang sa Magul-anong mga Tin-edyer”! (Septiyembre 8, 2001) Nakigbisog ako niining maong balatian sulod na sa ubay-ubayng katuigan. Salamat niining magasina nga nakatabang sa malisod nga panahon.

L. D., Pransiya

Usa ako ka nars sa mga bata. Ang gilapdon sa pagkamagul-anon kaayo gipakamenos sa daghang tawo apan wala ninyo kini pakamenosa. Nagpedido ako ug usa ka gatos ka kopya niining magasina. Nagplano kong iapod-apod kini ngadto sa tanang doktor sa mga bata ug sa mga mental-health worker niining dapita.

B. P., Tinipong Bansa

Daghan kog paryente nga gidayagnos nga nagmagul-anon kaayo o dunay bipolar disorder. Ang pag-ila niini ingong mga balatian inay kay mga kahuyangan dakog ikatabang sa pagpasig-uli sa dignidad nga nawala sa daghang tawo. Ang inyong mga sugyot motabang kanamong tanan nga mahimong mabination ug mapaluyohon.

C. M., Canada

Sa nadawat ko kining magasina, gisugdan dayon nako kinig basa. Nakahilak ko sa kalipay tungod sa kamatuoran nga gimahal ninyo ang mga batan-on ug naggahin kamog 12 ka panid alang sa maong ulohan. Daghan kaayong salamat!

M. M., Austria

Kining artikuloha nakatabang gayod kanako sa pagkahimong kalmado ug malinawon. Dugang pa, nakapaamgo kini kanako nga dili lang diay ako ra ang nag-antos niining maong balatian. Nag-ampo ako nga hatagan unta ni Jehova ug kahupayan ug tabang ang tanang tawo nga nag-antos sa pagkamagul-anon kaayo.

Y. T., Japan

Magdaladala ko kanunay ug suplay niining gulaa. Mao gayod kiniy gikinahanglan sa atong mga tin-edyer, ug nagtuo ako nga motabang kini sa daghan kanila ug sa ilang mga ginikanan nga makalabang sa tukma ninyong pagkahubit ingong usa ka sakit. Lagmit makaluwas kini ug kinabuhi.

R. F., Tinipong Bansa

Nahupayan ko sa pagkahibalo nga kining emosyonal nga kasakit dili gumikan sa usa ka kakulangan sa espirituwal. Migaan ang akong pamati, ug mihilak ako sa dihang nabasa nako nga “si Jehova haduol niadtong dugmok ug kasingkasing.”​—Salmo 34:18.

A. I., Japan

Ako 16 anyos, ug magsugmat-sugmat ang akong pagkamagul-anon kaayo sulod na sa daghang tuig. Kining magasina mao gayoy akong gikinahanglan! Kining mga artikuloha naghatag kanako sa tambag nga akong gikinahanglan.

L. B., Australia

Ako kanhi usa ka tin-edyer nga magul-anon kaayo, ug wala gayod nako tug-ani ang akong mga ginikanan o si bisan kinsa nga gusto nakong magpakamatay. Dako kining sayop. Hinungdanon ang pagpangayog tabang kon ikaw magul-anon kaayo. Salamat sa inyong pagpakitag pagtagad ug kahingawa alang sa mga batan-on.

S.G.C., Tinipong Bansa

Asero Nagtrabaho ako sa pabrika ug asero, ug akong gitanyag ang artikulong “Gahi, Apan Humok Usab” (Septiyembre 8, 2001) ngadto sa akong teknikal nga direktor. Miingon siya nga bisag ang artikulo naghisgot sa usa ka komplikadong ulohan, kini klaro ug tukma, nga wala maggamit ug daghan kaayong teknikal nga mga termino. Ang mga artikulong sama niini nakapaarang kanamo sa pagtabang sa uban nga masinati sa Pagmata!

G. B., Italya

Tungod kay bag-o pa lang akong gibansay sa trabaho nga magtesting ug mga metal, wala kaayo ko ganahing mobasa ug artikulo bahin sa paghimog asero. Apan nalingaw gayod ako sa paagi sa paghisgot ninyo sa ingon niana ka masangkaron ug komplikado kaayong ulohan.

M. F., Alemanya