Usa ka Lawalawa nga Nagtakobang Hulmigas

DUNAY usa ka gamayng lawalawa nga mokamang paingon sa bungdo sa hulmigas ug mopuyo nga magtakoban taliwala sa mga kaaway niini. Aron dili madiskitahan, usbon niini ang panagway ug linihokan niini aron dili mamatikdan. Hinungdanon kini tungod kay kon kini matugaw, ang mga hulmigas hayan mahimong mangtas kaayo. Tungod kay ang lawalawa lahi mag lawas kay sa hulmigas, dili kini sayon.

Ang hulmigas adunay unom ka tiil ug duha ka siwil, samtang ang lawalawa adunay walo ka tiil ug walay siwil. Busa sa unsang paagi ang lawalawa makahimo sa kaugalingon niini nga morag hulmigas tan-awon? Aw, maglibotlibot kini sa bungdo sa hulmigas ginamit ang unom ka tiil, ug ipataas niini ang duha niini ka tiil aron morag siwil tan-awon.

Dugang pa, palihokon sa lawalawa ang duha niini ka minaomao nga siwil nga morag tinuod gayod nga siwil. Lisolisoon niini ang duha ka tiil sa paagi nga masaypan kining siwil sa mga hulmigas. Kining batid nga tigtakoban makahimo pa gani sa pagsundog sa liksi, ekis-ekis nga linaktan sa mga hulmigas!

Paningkamotan sa lawalawa nga mapareho gayod sa hulmigas sa tanang paagi, sanglit ang pagkanailhan ingong molupyo sa bungdo sa hulmigas hinungdanon sa kahilwas niini. Diha sa bungdo sa hulmigas, ang lawalawa makadawat ug proteksiyon batok sa kinaiyanhong mga kaaway niini, nga naglakip sa mga buyog nga mokaog lawalawa. Ang mga siloy, nga nag-isip sa lawalawa nga kinaham nga kalan-on, dili na usab mosulay sa pagkaon niini. Bisan ang mga lawalawa nga mokaon sa ubang mga lawalawa malimbongan tungod sa “siwil” sa nagtakobang lawalawa.

Apan, kon adunay langgam, halo, o uban pang mga linalang nga moatake sa mga hulmigas, hukason dayon sa lawalawa ang iyang takoban ug moikyas. Mas maayog panan-aw ang mga lawalawa kay sa mga hulmigas, ug makalukso pa kini, samtang ang mga hulmigas dili​—nga tanan niini magpasayon sa mga lawalawa sa pag-ikyas.

Sa adlawan pa, ang lawalawa mohimo sa labing maayong maarangan niini sa pagpabiling dili madiskitahan diha sa bungdo sa hulmigas. Apan, inigkagabii, kini aktibo ug manakop ug mga hulmigas sa mismong bungdo sa hulmigas nga gipuy-an niini! Kon madiskobrehan ang kalihokan sa lawalawa, pahimuslan niini ang walo niini ka tiil ug moikyas dayon.

Ang laki nga lawalawa mahimong ubanan sa baye nga lawalawa diha sa bungdo sa hulmigas. Ipakita sa baye nga lawalawa dili lamang ang pagkamaunongon ngadto sa pares niini kondili usab ang pagkamamugnaon gayod niini. Ang baye maghimog balay sa lawalawa ingong proteksiyon diha sa bungdo sa hulmigas, nga manalipod dili lang sa pares niini kondili sa mga itlog usab niini.

Walay duhaduha nga aduna pay daghang makat-onan bahin niini nga lawalawa. Apan, wala usab kaayo silay nahibaloan bahin sa daghang uban pang mga espisye sa mga mananap dinhi sa yuta. Pagkaanindot gayod nga makakat-on ug daghan pa sa umaabot bahin sa makaiikag nga mga kalalangan sa Diyos!

[Hulagway sa panid 31]

Usa ka lawalawa taliwala sa duha ka hulmigas

[Credit Line]

Bill Beatty