Gibaslan ang Iyang Inisyatiba

DAGHANG BATAN-ON TALIWALA SA MGA SAKSI NI JEHOVA naghatag ug maayong panig-ingnan sa pagsulting maisogon bahin sa ilang pagtuo. Tagda si Stella, usa ka tin-edyer nga taga-Salonika, Gresya. “Panahon sa usa sa atong Kristohanong mga tigom,” siya miingon, “gihisgotan ang mga paagi sa paggamit sa atong mga video aron tabangan ang uban nga makaila kang Jehova. Ako naghunahuna bahin sa usa ka paagi nga akong magamit ang video nga Jehovah’s Witnesses​—The Organization Behind the Name. Pagkaugma ako nakigsulti sa prinsipal sa eskuylahan, ug akong gisugyot nga ang video isalida diha sa eskuylahan. Sa akong katingala, siya dili supak​—basta ang mga magtutudlo mosugot.

“Sa ulahi niadtong adlawa mismo, gisultihan ako sa prinsipal nga ikapasalida ang video sa sunod semana​—apan pagkahuman lamang sa klase. Gibati ko ang kapakyasan kay gihunahuna ko nga dili isakripisyo sa akong mga klasmet ang ilang libreng panahon aron motan-aw sa video. Bisan pa niana, pagkaugma gidapit ko ang tanan sa pagtan-aw. Dili lang nga midawat sila kondili nangimbitar usab silag mga estudyante gikan sa ubang mga klase. Unom ka magtutudlo​—lakip ang usa ka teologo​—nangadto sa pagtan-aw usab sa video.

“Ang tanan namatig maayo. Human niadto, gidapit ako sa prinsipal sa pagdumala sa usa ka pangutana-ug-tubag nga panaghisgot. Daghang estudyante ang nakadayeg sa boluntaryong buluhaton nga gihimo diha sa hedkuwarter sa mga Saksi ni Jehova, nga gisalida diha sa video. ‘Bisan pag sila dili sinuweldohan, malipayon silang nagtuman sa ilang mga buluhaton!’ mipatugbaw ang usa ka estudyante.

“Gisultihan ko ang tanang nanambong bahin sa atong binase-sa-Bibliya nga mga basahon. Gipang-apod-apod ko usab ang Kingdom News Num. 36, ‘Ang Bag-ong Milenyo​—Unsay Imong Kaugmaon?’ Ang prinsipal nangayog dugang kopya aron iyang ikahatag ngadto sa mga magtutudlo nga dili presente.

“Human niadto, daghang estudyante misugilon sa ilang mga higala bahin sa video. Nalipay ako nga gipahimuslan ko ang maong higayon sa paghatag ug usa ka pamatuod. Ang akong mga klasmet nagpakita kanakog labaw nga pagtahod; apan mas hinungdanon, sila nagpakitag pagtahod alang sa Diyos nga akong gisimba!”