Gikan sa Among mga Magbabasa

Pagkabalaka Buot kong ipahayag ang pagpasalamat sa artikulong “Mga Batan-on Nangutana . . . Sa Unsang Paagi Mapugngan Ko ang Sobrang Pagkabalaka?” (Septiyembre 22, 2001) Ako 17 anyos, ug kada adlaw ako maghunahuna kon unsay akong umaabot human sa akong paggraduwar sa hayskul. Gipaningkamotan ko ang pagtago sa akong mga kabalaka kay dili ko gustong modisturbo sa uban, busa ako nag-antos sa kahiladman. Ang artikulo mitabang kanako sa pagkasabot sa bili sa pagpakigsulti sa akong inahan ug sa mga hamtong diha sa kongregasyon.

L. R., Tinipong Bansa

Ako 17 anyos. Kanunay akong mabalaka bahin sa panglawas sa akong inahan, akong asaynment sa eskuylahan, ug mga trabaho sa balay. Ang akong inahan kanunayng magsiko kanako panahon sa Kristohanong mga tigom sa dihang ginahatag ang tambag bahin sa pagkabalaka. Busa ako nagpasalamat sa praktikal nga mga sugyot diha sa artikulo bahin sa mga prioridad sa akong panahon ug bahin usab sa pagtuman sa dili-nindot nga mga buluhaton inay ioktaba kana. Salamat sa maong artikulo.

H. H., Tinipong Bansa

Isip usa ka amahan ug Kristohanong ansiyano, akong masabtan nga ang atong mga batan-on mabalak-on bahin sa umaabot. Ang inyong tambag nga hisgotan ang mga butang uban sa mga ginikanan ug pag-atubang dayon sa mga suliran maoy maayo. Salamat sa inyong nagpadayong kaikag sa atong mga batan-on.

R. H., Canada

Magul-anong mga Tin-edyer Ako may usa ka asaynment sa eskuylahan sa pagsulat ug usa ka komposisyon bahin sa usa ka suliran sa komunidad nga nahiangay sa mga tin-edyer. Gigamit ko ang Septiyembre 8, 2001 nga serye sa hapin, “Tabang Alang sa Magul-anong mga Tin-edyer.” Adunay daghang magul-anong mga tin-edyer sa dapit nga akong gipuy-an. Nakagamit ako sa Pagmata! sa nangagi mahitungod sa ubang mga asaynment​—ug nakuha ko ang maayo kaayong mga grado!

S. H., Australia

Ang among tin-edyer nga anak lalaki nakaagom ug impeksiyon sa iyang kasingkasing ug utok. Ang sakit natambalan, apan ang mas dakong kapeligrohan​—ang nag-ubang depresyon​—wala matiktiki. Ang among anak nagtubok. Bisan pag ulahi na kaayo ang pagtabang kaniya, ang maong serye nakatabang hinuon kanamo ug dako sa pagsabot sa iyang sakit. Kami mapasalamaton kaayo nga gihisgotan ang maong ulohan ug kamo nagpakitag dakong mahigugmaong pagtagad alang sa atong mga batan-on.

G. & G. R., Alemanya

Adunay mga panahon nga ako mobating magul-anon kaayo ug maghunahuna nga ako walay kapuslanan. Gibati ko ang kaulaw nga makigsulti bahin sa akong mga gibati uban sa akong Kristohanong mga ginikanan o sa mga ansiyano sa kongregasyon. Bisan pa niana, sa dihang nabasa ko ang tudling-pulong nga nag-ingon, “Dili ka mabasol sa imong kahimtang,” ako nahupayan pag-ayo! Ug nakaamgo na usab ako nga wala ako mag-inusara sa maong suliran.

H. T., Hapon

Pagpaniid sa Kalibotan Ako nagsulat sa pagpahalipay kaninyo bahin sa makalingaw kaayong mga dibuho nga giapil diha sa “Pagpaniid sa Kalibotan.” Kana makatabang kanako sa paghinumdom sa mga balita nga ilang giilustrar ug, labaw sa tanan, tungod niana ako makapahiyom. Ipadayon ang inyong ekselenteng buluhaton!

A.I.P.B., Espanya

Ang Kalendaryo sa mga Maya Nagtuo ako nga namatikdan ko ang usa ka sayop diha sa artikulong “Ang Maya​—Kaniadto ug Karon.” (Septiyembre 8, 2001) Ang letratong anaa sa kahong “Ang Kalendaryo sa mga Maya” sa aktuwal mao ang kalendaryong Aztec sa adlaw. Mas tino pa, kini ang sentrong bahin sa kalendaryo, nga naghulagway sa adlaw-diyos sa Aztec.

R. S., Tinipong Bansa

Ang “Pagmata!” nagtubag: Maorag husto ang among magbabasa. Lagmit, ang letrato nasayop pagngalan sa komersiyal nga tigsuplay niini. Ikasubo, ang sayop wala matiktiki una mapatik ang magasin. Pasayloa kami tungod sa sayop.