Kahupayan Alang Niadtong Nagbangotan

ANG mga pag-atake sa mga terorista niadtong Septiyembre 11, 2001, sa New York City ug sa Washington, D.C., nakapahadlok sa mga tawo sa tibuok kalibotan. Sa usa ka adlaw, linibo ang nangamatay, lakip sa gatosan ka maisogong mga bombero, polis, ug mga paramedik.

Sukad sa maong hitabo, ang mga Saksi ni Jehova naghimog hiniusang paningkamot sa paghupay niadtong nawad-an sa ilang mga minahal gumikan sa maong trahedya. Gihimo nila kini aron “sa pagbugkos sa mga may gun-ob nga kasingkasing” ug “sa paghupay sa tanang nagbangotan.”​—Isaias 61:​1, 2.

Latas sa katuigan, nakaplagan sa mga Saksi ni Jehova nga kadtong namatyan sa ilang mga minahal sagad nagpalandong sa mga pangutana nga nalista sa ubos. Anaa sa Bibliya ang mga tubag. Nganong dili nimo susihon ang Kasulatanhong mga reperensiya sa ubos diha sa kaugalingon nimong kopya sa Bibliya?

Gitino na bang daan ang kamatayon sa usa ka tawo?

Sa Ecclesiastes 9:​11, ang Bibliya nag-ingon nga “ang panahon ug ang wala damhang panghitabo” (“kahigayonan,” New English Bible) modangat sa tanang katawhan. Kon ang kamatayon gitino nang daan, nganong ang Bibliya nagdasig man kanato nga mohimog mga panagana alang sa kaluwasan?​—Pananglitan, tan-awa ang Deuteronomio 22:8.

Nganong kita mamatay?

Ang unang tawhanong magtiayon, si Adan ug Eva, gipapuyo sa usa ka yutan-ong paraiso. Kon sila nagpabilin pa untang masinugtanon, dili unta sila mamatay. Mahitabo lamang ang kamatayon kon ang mga tawo mosupak sa Diyos. (Genesis 1:28; 2:15-17) Ikasubo nga si Adan ug Eva misupak gayod sa ilang Maglalalang. Ingong resulta, gibayran nila ang silot​—kamatayon. Sanglit ang tanang tawo gikan man kang Adan ug Eva, ang tanan nakapanunod sa sala ug kamatayon. Ang Bibliya nagpatin-aw: “Ang sala misulod sa kalibotan pinaagi sa usa ka tawo [si Adan] ug ang kamatayon pinaagi sa sala, ug sa ingon ang kamatayon mikaylap sa tanang tawo.”​—Roma 5:12.

Unsa ang kahimtang sa patay?

Human sa pagrebelde ni Adan, ang Diyos miingon: “Ikaw mobalik sa yuta, kay gikan niini ikaw gikuha. Kay abog ikaw ug sa abog ikaw mopauli.” (Genesis 3:19) Busa, ang kamatayon maoy usa ka kahimtang sa bug-os nga kawalay-panimuot​—nga wala gayod maglungtad. Ang Bibliya nag-ingon: “Ang mga buhi nasayod nga sila mamatay; apan bahin sa mga patay, sila walay nahibaloan nga bisan unsa.” (Ecclesiastes 9:5) Nag-ingon usab ang Bibliya nga sa dihang ang tawo mamatay, “mobalik siya sa iyang yuta; nianang adlawa mahanaw ang iyang mga hunahuna.”​—Salmo 146:​3, 4.

Dili ba aduna man kitay kalag nga magpabiling buhi human sa kamatayon?

Ang Bibliya tin-awng nagtudlo nga ang imong kalag mao gayod ikaw, dili usa ka lisod sabton nga butang nga magpabiling buhi human sa imong kamatayon. (Genesis 2:7; Proverbio 2:10; Jeremias 2:34) Sanglit mao man kini ang kahimtang, kita makaingon nga sa dihang ang tawo mamatay, ang kalag namatay. Ang Bibliya tin-awng nag-ingon: “Ang kalag [nga mao, ang tawo] nga makasala . . . mamatay.”​—Ezequiel 18:4.

Unsay paglaom niadtong nangamatay?

Gibutyag sa Bibliya nga katuyoan sa Diyos nga hatagag kinabuhi pag-usab ang mga patay pinaagi sa pagkabanhaw ngadto sa usa ka paraisong yuta, diin wala nay sakit ug kamatayon. Si Jesus nag-ingon: “Ang takna nagsingabot nga ang tanan nga anaa sa handomanang mga lubnganan makadungog sa iyang tingog ug manggula.”​—Juan 5:​28, 29; Pinadayag 21:1-4.

Sa dihang naghisgot bahin sa iyang di pa dugay nga namatayng higala nga si Lazaro, si Jesus nagtandi sa kamatayon ngadto sa pagkatulog. (Juan 11:11-13) Dugang pa, human siya banhawa ni Jesus, walay gisulti si Lazaro nga nahiadto siya sa usa ka dapit sa pagsakit o sa dapit sa himaya sulod sa mubong panahon sa iyang pagkamatay. (Juan 11:37-44) Kini masabtan, kay ang patay walay panimuot. Sila dili makasinati ug pag-antos kondili nagpaabot sa “takna” nga sila pagabanhawon. Labing hinungdanon, ang pagbanhaw ni Jesus kang Lazaro nagpakita nga ang patay mabuhi pag-usab. Sa pagkatinuod, pinaagi sa maong milagro gipakita ni Jesus sa gamay nga sukod kon unsay mahitabo sa yuta ilalom sa pagmando sa Gingharian sa Diyos. (Buhat 24:15) Pagkadakong kahupayan niana alang niadtong namatyan sa ilang mga minahal niining magubot nga panahon!