Mga Batan-on Nangutana . . .

Unsaon Ko Pagkakaplag ug Kauban sa Lawak nga Akong Ikasinabot?

“Kon wala pa akoy mga kauban sa lawak, dili unta ako makaalagad ingong bug-os-panahong ebanghelisador ug makabayad sa abang sa balay ug sa mga serbisyo sa koryente, tubig ug uban pa.”​—Lynn. *

SA DIHANG ang mga batan-on maglain na, kasagaran matingala sila sa pagkasayod nga dako diay kaayo ang galastohan sa pagkinabuhi diha sa ‘tinuod nga kalibotan.’ Alang sa daghan, ang usa ka paagi nga masagubang ang dakong galastohan sa pagkinabuhi mao ang pagpakigbahin sa mga galastohan uban sa usa o kapin pa nga mga kauban sa lawak.

Apan sumala sa gipunting sa miaging artikulo niining seryeha, ang pagpuyo kauban sa lain​—ilabina sa dili gayod nimo kaila​—mahimong usa ka dakong suliran. * Matuod kini bisan taliwala sa batan-ong mga Kristohanon nga nag-uban pagpuyo aron makaalagad ingong bug-os-panahong mga ebanghelisador. Bisag unsa pay imong partikular nga kahimtang, kon naghunahuna ka nga mokuhag kauban sa lawak, makataronganon lamang nga gamiton nimo ang “praktikal nga kaalam” sa pagpili sa maong kauban. *​—Proverbio 3:21.

Ang Kapeligrohan sa Daotang Pakig-uban

Daghan sa bag-o pang mga nahingkod ang modangop sa mga paskinanan, sa panganunsiyo diha sa mga mantalaan, ug sa Internet aron makakaplag ug posible nga mga ikauban sa lawak. Apan alang sa batan-ong mga Kristohanon, ang maong mga tinubdan adunay grabeng mga kapeligrohan. Mahimong motultol kini sa imong pagkahibalag ug mga indibiduwal nga dili sama nimog pagtuo, mga prinsipyo, o mga sukdanan. Pagkahiktin ba ug pangisip o pagkadili-mahigalaon kon ang imo lamang pilion nga ikauban sa lawak maoy tawo nga sama nimog tinuohan? Dili, kana maoy maalamon. Ang Bibliya mismo nagpasidaan: “Ang daotang pakig-uban makadaot sa mapuslanong pamatasan.”​—1 Corinto 15:33.

Tagda ang usa ka batan-ong babaye nga ginganlag Lee. Dili pa siya bawtismadong Kristohanon sa dihang siya misugod pagpuyo diha sa dormitoryo sa unibersidad. “Peligroso kadto nga palibot,” siya nahinumdom. “Inigpauli sa ubang mga babaye maabtan nila ang ilang kauban sa lawak nga nakigsekso.” Ang pagpuyo didto sa wala madugay nakadaot sa espirituwalidad ni Lee. “Nakapalta na ako sa kadaghanan sa Kristohanong mga tigom,” siya miangkon. Dili ikatingala, ang iyang panggawi nag-anam-anam ka daot. “Usa ka adlaw niana, ako nakapamalikas, ug usa sa mga babaye miingon: ‘Giuyonan ba kana ni Jehova?’” Pagkamakauulaw! Maayo na lang, si Lee mibiya sa maong dili maayong palibot ug misugod sa pag-uswag sa espirituwal. Apan ang iyang eksperyensiya nag-ilustrar sa kapeligrohan sa pagpuyo uban sa mga tawo nga wala magtahod sa imong mga sukdanan.

Pagkaplag ug mga Kauban sa Lawak nga Ikasinabot

Nan, asa ka man mangita? Sugdi diha sa imo mismong kongregasyon sa mga Saksi ni Jehova. Makaiikag, kadtong bug-os-panahong mga ebanghelisador sagad makahimamat ug laing mga batan-on nga  mahunahunaon sa espirituwal diha sa nagkalainlaing mga tunghaan ug mga tigom nga sa linain gihimo alang sa bug-os-panahong mga magwawali. * Ang mga ginikanan, lokal nga mga ansiyano sa kongregasyon, nagapanawng mga magtatan-aw, ug uban pa makatabang usab; basin may kaila silang ubang mga batan-on nga mahimong mga kauban sa lawak nga ikasinabot.

Ang pagpahibalo sa uban nga nanginahanglan kag kauban sa lawak mahimong usa usab ka epektibong paagi. Kon mas daghang tawo ang nakahibalo sa imong panginahanglan, mas dako ang imong kahigayonan nga makakaplag ug ikauban sa lawak. (Ecclesiastes 11:6) Labaw sa tanan, pangayog tabang kang Jehova sa pagpangitag kauban sa lawak, ug salig kaniya sa pagpanalangin sa imong mga paningkamot.​—1 Juan 5:​14, 15.

Pagsusi sa Hinungdanong mga Impormasyon

Kay nakakaplag ug posible nga kauban sa lawak, tingali naghinamhinam kang ikauban na siya sa dili madugay. Apan maalamon nga mohimo unag pipila ka pagsusi. Kana bang tawhana ‘may maayong panghimatuod sa mga igsoon’ sa iyang kongregasyon? (Buhat 16:​1, 2) Tingali ikaw ug ang imong mga ginikanan direktang makapakig-estorya sa kuwalipikado-sa-espirituwal nga mga tawo nga nakaila kaniya. Mahimo kang mangutana: ‘Unsa may reputasyon niining tawhana? Kini bang tawhana lig-on sa emosyonal ug sa espirituwal? Nakig-ambit ba siya sa pagsangyaw ngadto sa uban ug sa pagkomento panahon sa mga tigom? Kini bang tawhana nailhan ingong maayog panggawi?’

Hinumdomi, “siya nga nagalakaw uban sa mga tawong maalamon mahimong maalamon.” (Proverbio 13:20) “Ang akong kauban sa lawak mahunahunaon kaayo sa espirituwal,” matod ni David. “Kana nagtabang nako nga mamentinar ang akong espirituwalidad.” Sa susama, si Renee, kinsa adunay daghan nang nakauban sa lawak, miingon: “Ang uban nakong mga kauban sa lawak mosugyot nga dungan namong basahon ang usa ka kapitulo sa Bibliya kada gabii. Sanglit ang akong mga ginikanan dili man mga Saksi, wala gayod kamiy pagtuon sa Bibliya sa pamilya. Busa ang pagkaadunay ‘pagtuon sa pamilya’ duyog sa akong mga kauban sa lawak maayo gayod alang kanako!” Oo, ang pagkaadunay kauban sa lawak nga nahigugma usab sa espirituwal nga mga butang sama kanimo mahimong usa gayod ka panalangin.

 Hisgoti ang mga Butang sa Madayganong Paagi

Sunod, pakigkita kaniya ug hisgoti ang mga butang. Ang maong mga panaghisgot makatabang kanimo sa pagtino kon magkabagay ba ang inyong mga personalidad. Makaiikag, gibutyag sa usa ka pagtuon nga gitaho sa basahon nga Communication Research Reports nga ang mga magkauban sa lawak nga susamag hiyas sa pagpakigkomunikar “gikataho nga natagbaw ug nahimuot pag-ayo nga adunay kauban sa lawak.” Busa kon ikaw prangka, masanduroton, mapadayganon nga matang sa tawo, basin masugamak ka sa problema kon ang imong kauban sa lawak hilomon, way timik, o gustong mag-inusara.

Bisan tuod dili nimo buot nga ang inyong panag-estorya mahimong sama nianang pagsukitsukit sa polis, makatabang ang paghisgot sa presenteng mga tumong ug mga plano sa umaabot nga ikauban sa lawak. Siya ba nagtinguha nga mouswag sa espirituwal o basig gusto lang makaeskapar sa dili maayong kahimtang panimalay? Gipunting ni Lynn ang laing problema nga mahimong motungha: “Aduna koy gikauban sa lawak nga nakigdeyt, ug anaa kanunay ang iyang trato, nga gabii na kaayong mopauli.” Gibati ni Lynn nga wala na mahiangay ug makapatugaw ang ilang mga parayganay. Hinuon, ang maong mga problema usahay malikayan kon mohimo daan ug sukaranang mga lagda. Pananglitan, matod ni Renee: “Aduna miy lagda nga ang mga lalaki dili mahimong magpabilin kon lapas na sa gitakdang oras.” Maayo usab kon kamong magkauban sa lawak magkasabot nga dili mag-inusara diha sa lawak o apartment uban sa kaatbang sa sekso.

Makaayo usab ang paghisgot tingali sa mga butang sama sa mga pasatiempo, kagustohan, ug gustong musika. “Gusto kong ikauban sa lawak ang tawo nga gusto usab sa mga butang nga akong nagustoan, kinsa susama nakog personalidad, kinsa gustong mobuhat sa mga butang nga akong ginahimo,” matod ni Mark. Siyempre, ang lainlaing mga kagustohan wala magpasabot nga dili na mo puwedeng mag-uban pagpuyo. Ang tinuod nga kahimtang mao, Unsa ka mapailin-ilinon kamong duha? Andam ba mong modawat sa mga kalainan ug mohimog mga pagpasibo aron mahatagag konsiderasyon ang mga kagustohan ninyong duha?

Si Lee nagsugyot: “Angay usab nimong pangutan-on kon unsay panahom sa imong posibleng ikauban maylabot sa inyong pag-uban ug puyo. Ang uban nagdahom nga mahimo ka nilang labing suod nga higala ug kauban. Apan dili kana mao ang akong gusto.” Sa susama, si David nag-ingon: “Gusto kog kauban sa lawak nga mahimong ikauban nako sa pagbuhatbuhat sa mga butang apan kanang dili mobati nga kinahanglang magsige siyag kuyog-kuyog nako kon gusto kong mobuhat sa mga butang uban sa laing mga tawo.” Sa susama, susiha kon ang maong tawo interesado ba nga mahimo mong kauban sa buluhatong pagsangyaw o kon siya aduna bay laing gihunahuna, sama sa pag-alagad diha sa usa ka kongregasyon nga langyaw ug pinulongan.

Sa kataposan, seguroa nga dili nimo kalimtan ang mga isyu sama sa pagluto (kahibalo bang moluto ang bisan hain kaninyo?), ang pag-angay-angay sa mga buluhaton sa balay, ang paggamit sa personal nga mga kasangkapan, luna sa kabinet, muwebles, luna sa tipiganan, ug mga binuhing hayop. Kon mahisgotan ang maong mga butang, malikayan ang dili pagsinabtanay ug mga kahiubos. Ang Proverbio 20:18 nag-ingon: “Pinaagi sa tambag ang mga plano lig-on nga matukod.”

“May Kahapsay ug Pinaagig Kahikayan”

Ang lain pang makatabang nga prinsipyo makaplagan sa Lucas 14:​28, diin kini nag-ingon: ‘Kuwentaha ang gasto.’ Oo, kalkulaha ang inyong mga galastohan. Pila kahay magasto sa abangan sa balay? Pagkaon? Suga ug tubig? Mag-ambitay ba mo ug telepono? Kon mao, unsaon ninyo pagtunga ang bayranan? “Ako gayong seguroon nga makabayad ang maong babaye sa iyang bahin sa galastohan sa dili ko pa siya kuhaon nga kauban sa lawak,” matod ni Lynn. Ang magasing The Next Step nga mabasa diha sa kompiyuter hustong nag-ingon: “Ang mga kauban sa lawak nga dili motabang pagbayad sa abang sa balay o pagkaon . . . o maoy hinungdan nga modako ang mga bayranan sa suga ug tubig makahatag kanimo ug wala kinahanglanang kabug-at.”

“Usahay ang problema dili kon pilay bayranan,” matod ni Renee, “kondili kanus-a mobayad!” Siya nagpatin-aw: “Ang among abang sa balay kinahanglang bayran sa ikatulong adlaw sa bulan. Apan usahay ang akong kauban sa lawak mobakasyon sa hinapos sa semana sa wala pa niya ikahatag ang iyang bahin, ug kinahanglan kong mangayog dispensa sa tag-iya sa balay.” Tin-aw nga maalamong buhaton ang tanang butang nga “may kahapsay ug pinaagig kahikayan” ug dili ipamasin ang hinungdanong mga butang. (1 Corinto 14:40) Kasagaran, maalamong buhatag kasulatan ang mga gikauyonan.

Ang pagkamabinantayon ug pagkamaalamon magpauswag sa posibilidad nga makaplagan mo ang usa ka kauban sa lawak nga makahatag kanimog kaayohan ug dili makapabug-at. Apan, komosta kon motungha ang mga problema ug mga kasungian sa kinaiya? Ang umaabot nga artikulo maghisgot niining mga situwasyona.

[Mga footnote]

[Hulagway sa panid 26]

Adunay mga kapeligrohan sa pagpuyo uban sa mga tawo nga wala magsunod sa mga prinsipyo sa Bibliya

[Hulagway sa panid 26]

Sa dili pa mouyon sa pagpakig-uban ug puyo sa usa ka tawo, pakigkita kaniya ug hisgoti ang hinungdanong mga isyu