Gikan sa Among mga Magbabasa
Gikan sa Among mga Magbabasa
Gikan sa editor: Ang seryeng panghapin nga “May Kapuslanan ang Kinabuhi” (Oktubre 22, 2001) nakapukaw ug kaylap nga reaksiyon gikan sa magbabasa. Makapahimuot gayod kini, tungod kay ang “Pagmata!” naningkamot sa paghatag ug praktikal, binase-sa-Bibliya nga impormasyon nga motabang sa mga tawo sa tanang nasodnon, rasanhon, ug relihiyoso nga mga kagikan sa pagsagubang sa mga problema karong adlawa.
Dugay na akong tigbasa ug Pagmata! apan ang seryeng “May Kapuslanan ang Kinabuhi” nakatandog pag-ayo kanako. Usa ka tuig kanhi gidaog ko sa kawalay-paglaom, ug gusto ko nang mamatay. Kining mga artikuloha nagpasalig kanako nga ang Diyos nakasabot sa atong mga kahuyangan.
S. H., Japan
Ako naguol pag-ayo sa dihang giatake sa mga terorista ang Twin Towers sa New York. Usahay nakahunahuna kong maghikog apan wala gayod nako ilha ang kamatuoran nga aduna koy problema. Mangayo ko ug gikinahanglang tabang ug sundon ang mga sugyot nga gilaraw diha sa artikulo.
M. M., Tinipong Bansa
Tungod sa akong dili maayong panglawas, nakahunahuna kong maghikog na lang. Mosulti ako bahin niana, usahay sa kinomedyang paagi, aron masuta ang reaksiyon sa uban. Nakahilak ko sa dihang akong nabasa nga ang Diyos anaa kanunay aron sa pagpatalinghog kanato ug nga siya adunay pagtagad. Kining magasina bug-os nga nag-usab sa akong panglantaw sa kinabuhi.
T.E.J., Canada
Ako nagmagul-anon kaayo sulod sa daghang katuigan, ug di pa dugay ako seryosong nakahunahuna sa paghunos sa akong kinabuhi. Sa dihang mogawas na unta ako sa pultahan, nahinumdoman nako nga ang kataposang artikulo sa serye sa Pagmata! nag-ingon nga makigsulti sa laing tawo. Busa akong gitug-anan ang akong bana sa akong tuyo. Ang maong pagkalangan nakapugong kanako sa paghimo sa akong giplano. Kining seryeha nakatabang sa pagluwas sa akong kinabuhi!
M. B., Tinipong Bansa
Pipila ka semana sa wala pa moabot kining magasina, nagtan-aw ako sa tasa nga puno sa tabletas nga pangpakatulog ug nag-atubang sa suliran nga gihubit sa artikulo: “Ako ba kining tomaron o dili?” Tungod sa inyong magasin nabatonan ko ang gikinahanglang determinasyon aron mabuhi. Ang ubang mga balatian nakaapektar sa hunahuna hangtod sa punto nga dili na kita gustong mabuhi pa, apan makapatandog ang pagkahibalo nga ang Diyos nagpakita gani ug interes bisan sa mga tawo nga daw wala na magpabili sa gasa sa kinabuhi.
E. S., Italya
Akong napaambit ang impormasyon niining mga artikuloha sa akong doktor. Giingnan ko siya nga dako kinig natabang kanako. Ang pasalig lang nga ako bililhon sa Diyos nagtukmod kanako nga mabuhi. Ako kanunayng nag-ampo nga magsulat pa kamog dugang mga artikulo nga sama niini!
J. S., Tinipong Bansa
Nagtuo ako nga walay gayoy tawong nakasabot kanako, ug misugod ako sa paghunahuna nga mas maayo pa tingaling mamatay na lang ko. Apan tungod niining mga artikuloha, akong nahinumdoman ang labing hinungdanong butang sa kinabuhi. Dili na ko maghunahuna pang mamatay!
M. M., Japan
Gikulata nga mga Babaye Salamat sa panghapin nga seryeng “Tabang Alang sa Gikulata nga mga Babaye.” (Nobyembre 8, 2001) Sa bata pa ko, nakita ko kon giunsa pagkulata sa akong amahan ang akong inahan kada adlaw. Unya, ang akong mga igsoong babaye ug ako mao na usab ang iyang atakehon. Nagdako ako nga may dulot nga kayugot sa mga lalaki. Apan, sa ngadtongadto, nagsugod mi sa pagtuon sa Bibliya uban sa mga Saksi ni Jehova. Nalisdan ang akong Amahan sa pag-usab sa iyang mga dalan, apan uban sa tabang ni Jehova iyang naamgohan nga dili niya mapahimut-an ang Diyos kon iyang dagmalan ang matahom Niyang kalalangan. Anam-anam ang mga kausaban, apan karon ang akong amahan sama na sa usa ka aghop nga karnero. Mahimo ko na siyang higugmaon nga kinasingkasing.
G. B., Tinipong Bansa