Ang Pagpainit Makapamenos sa Risgo sa Impeksiyon

ANG RISGO NGA ANG SAMAD MAIMPEKSIYON human sa operasyon maoy usa ka sulirang wala mawala. Bisan pa niana, “ang pagpainit sa mga pasyente una pa sa naandang mga operasyon makapamenos ug kapig 60 porsiyento sa risgo sa impeksiyon,” nagtaho ang The Times sa London.

Ang mga tigdukiduki sa University Hospital sa North Tees, Inglaterra, nagbahin sa tulo ka grupo sa kapig 400 ka pasyente nga operahanan ug suso, namurot nga ugat, o danlak. Ang usa ka grupo wala painiti, ug ang laing duha ka grupo may lokal lang o katibuk-ang pagpainit sulod sa labing menos tunga sa oras una pa sa ilang mga operasyon. Unsay resulta?

Human sa operasyon, 5 porsiyento lamang sa gipainitan nga mga pasyente ang nakaagom ug mga impeksiyon sa samad, kon itandi sa 14 porsiyento niadtong wala painiti. Mamatikdan nga ang pagpainit napamatud-an nang epektibo sa pagpamenos sa gidaghanon sa impeksiyon alang sa mga pasyente nga gioperahan sa dakong tinai o sa butbot.