Sa Dihang Wala na ang Pagpangulipon!

KAGAWASAN! Diyutay rang mga pulong ang labawng makapatandog sa kasingkasing sa tawo. Ang mga tawo nakig-away ug nag-antos, nabuhi ug namatay, sa pagtinguhag kagawasan. Apan, ikasubong daghan ang naghimo niana nga wala makakitag matuod nga dakong kauswagan ngadto sa ilang tumong. May paglaom ba gayod alang sa kagawasan gikan sa pagkaulipon​—paglaom nga dili mosangpot sa kapakyasan ug kahiubos? Aduna.

Si apostol Pablo gidasig sa pagsulat bahin sa saad sa Diyos: “Ang kalalangan usab ipagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.” (Roma 8:21) Apan sa unsang paagi matino nato nga ipahinabo gayod sa Diyos ang maong “mahimayaong kagawasan”? Ang usa ka paagi mao ang pagsusi sa mga pagpakiglabot sa Diyos uban sa katawhan sa tibuok kasaysayan.

“Kon asa gani ang espiritu ni Jehova, adunay kagawasan,” nag-ingon ang Bibliya. (2 Corinto 3:17) Oo, ang espiritu o aktibong puwersa sa Diyos hilabihan ka gamhanan. Gigamit niya kini aron ihatag ang kagawasan sa daghang paagi sa taas nga panahon. Sa unsang paagi? Buweno, kinahanglang atong hinumdoman nga adunay daghang matang sa pagpangulipon. Nahisgotan na nato ang usa sa labing mapintasong mga matang, diin ang kusgan nag-ulipon sa mahuyang sa pakusog ug mapintasong paagi. Apan tagda ang pipila ka laing matang sa pagkaulipon.

 Ang mga tawo mahimong makapaulipon sa ilang kaugalingon sa nagkalainlaing mga pagkagiyan nga napamatud-ang lisod kaayo ang paglingkawas niana. Ug ang mga tawo mahimong maulipon sa mga kabakakan ug panglimbong, nga nalimbongan ngadto sa kinabuhing naulipon sa bakak nga mga pagtulon-an. Labing malinglahon sa tanan, adunay usa ka matang sa pagkaulipon nga ang matag usa kanato maoy apektado​—nahibalo man kita o wala​—ug ang mga epekto niini makapatay. Bisan pa niana, ipasiugda gayod nga bisan pag atong gihugpong ang ubay-ubayng mga matang sa pagkaulipon niini nga panaghisgot, wala gayod nato isipa nga kini sila managsama. Kini sila magkalain kaayo. Bisan pa niana, adunay usa ka hinungdanong elemento nga gikahiusahan. Sa kataposan, tinoon sa Diyos sa kagawasan nga ang kabug-at niining tanang matang sa pagkaulipon mahanaw gikan sa katawhan.

Sa Dihang ang mga Pagkagiyan Makapaulipon

Matikdi kon giunsa pagbatbat sa librong When Luck Runs Out ang lunod-patay nga pagpanugal: “Usa ka sakit diin ang indibiduwal aghaton sa puwersado kaayo ug di-mapugngang agda sa pagsugal. Mapinadayonon ang agda ug mouswag ang gikusgon ug kamapugsanon . . . hangtod nga sa kataposan kini mosuhop, modaot ug sagad nga molaglag sa tanang butang nga mapuslanon sa iyang kinabuhi.” Walay nahibalo kon pila ka tawo ang nahimong mga ulipon sa pagpanugal. Ang banabana alang sa usa lamang ka nasod, ang Tinipong Bansa, maoy mga unom ka milyon.

Ang pagkanagiyan sa alkoholikong ilimnon maoy sama, kon dili man labaw, ka malaglagon ug sa kadaghanang dapit mas kaylap. Sa usa ka dakong nasod, abot sa katunga sa hamtong nga mga lalaki ang nag-antos sa usa ka sukod sa alkoholismo. Si Ricardo, kinsa nahimong alkoholiko 20 ka tuig kanhi, misaysay kon unsay kahulogan sa maong matang sa alkoholismo: “Sukad sa panahon sa imong pagmata, ang imong lawas mangayog alkoholikong ilimnon​—sa pagpakalma kanimo, sa pagkalimot sa imong mga suliran, o paghatag lang kanimog igong pagsalig-sa-kaugalingon aron makasagubang sa kinabuhi. Kanunay kang maghunahuna nga makainom ug alkoholikong ilimnon, apan imong paningkamotan ang pagpatuo sa imong kaugalingon ug sa ubang alirong nimo nga ang imong panggawi maoy normal.”

Ang alkoholikong ilimnon dili lang mao ang makagiyan nga substansiya nga mag-ulipon sa mga tawo. Sa tibuok kalibotan, adunay minilyong tawo nga nagaabuso sa ilegal nga mga droga. Dugang pa, mga 1.1 ka bilyong tawo naggamit ug tabako​—nga nakabaton sa usa sa labing makapagiyan sa tanang droga. Daghan ang gustong mohunong sa bisyo, apan gibati nila nga naulipon. Si Jehova ba napamatud-ang usa ka epektibong Tigpagawas sa katawhan gikan nianang puwersadong mga matang sa pagkaulipon? *

Tagda ang panig-ingnan ni Ricardo. “Mga napulo ka tuig kanhi, nakaamgo ako nga ang alkoholikong ilimnon maoy nagkontrolar sa akong kinabuhi,”  misaysay si Ricardo. “Kadto nagdaot sa akong kaminyoon, akong trabaho, ug akong pamilya, ug ako nahibalo nga dili gayod nako masulbad ang akong mga suliran gawas kon ako makalingkawas sa gahom niini. Gumikan sa pagtuon sa Bibliya, akong nahibaloan nga ang kakabos​—literal ug espirituwal—​nagsakit sa sobra ka palainom. (Proverbio 23:​20, 21) Gusto nakong makabaton ug maayong relasyon uban sa Diyos, ug tungod sa akong sinserong mga pag-ampo nga nangayo sa tabang sa Diyos ako nagmatinud-anon sa akong kaugalingon. Usa ka tawo maoy nagtuon sa Bibliya uban nako ug nahimong usa ka minahal nga higala. Sa dihang ako mibalik sa pag-inom, wala niya wad-a ang paglaom kanako, apan sa mapailobon ug malig-ong paagi gipakita kanako ang dalan nga gilatid sa Diyos alang sa matuod nga mga Kristohanon.”

Karong adlawa si Ricardo mibating nahigawas na sa iyang pagkaulipon kanhi​—hinuon sa relatibong diwa. Siya moadmitir dayon nga sa sinugdan nakaagom siyag panagsang pagbalik sa pag-inom. “Apan bisan pa sa maong mga kapakyasan,” siya nag-ingon, “ang akong tinguha sa pag-alagad nga matinumanon kang Jehova, uban sa pagpaluyo sa akong asawa ug ubang kaubang mga Kristohanon, nakatabang kanako sa pagkontrolar sa kahimtang. Ako nagalantaw sa panahon nga gisaad sa Diyos sa dihang ‘walay moingon, “Ako masakiton”’ ug ang alkoholismo mahimong usa ka butang sa kagahapon. Kasamtangan, ipadayon ko ang akong matag-adlaw nga pagpakigbisog sa pagtugyan sa akong lawas ingong ‘usa ka halad nga buhi, balaan, dalawaton sa Diyos.’”​—Isaias 33:24; Roma 12:1.

Sa tibuok kalibotan linibong tawo ang personal nga nakasinati sa tabang sa Diyos samtang naningkamot sila nga mahigawas gikan sa nagkalainlaing mga pagkagiyan. Tinuod, sila may dakong bahin sa ilang kaugalingong pagkaulipon, tingali nagpadaog sa nagkalainlaing mga kapit-osan o mga tentasyon. Bisan pa niana, ilang nadiskobrehan nga si Jehova maoy mapailobon kaayong Tigpagawas. Siya andam motabang ug mopalig-on sa tanan nga gusto gayong moalagad kaniya.

“Ang Kamatuoran Magpagawas Kaninyo”

Unsa man ang bahin sa pagkaulipon sa kabakakan ug panglimbong? Si Jesu-Kristo nagpasalig kanato nga ang pagkagawas gikan niana maoy posible. “Kon magpabilin kamo sa akong pulong,” matod niya, “kamo tinuod gayod nga akong mga tinun-an, ug kamo mahibalo sa kamatuoran, ug ang kamatuoran magpagawas kaninyo.” (Juan 8:​31, 32) Panahon sa iyang pagsulti, daghan sa iyang mga tigpatalinghog naulipon sa estriktong kalagdaan sa mga tradisyon sa mga Pariseo. Sa pagkamatuod, si Jesus miingon bahin sa relihiyosong mga pangulo sa iyang panahon: “Sila magbugkos ug bug-at nga mga luwan ug magbutang niini diha sa mga abaga sa mga tawo, apan sila dili buot motarog niini pinaagi sa ilang tudlo.” (Mateo 23:4) Ang mga pagtulon-an ni Jesus nagpagawas sa katawhan gikan sa maong pagkaulipon. Giyagyag niya ang relihiyosong kabakakan kon unsa gayod kana, nga nagpaila pa sa tinubdan niana. (Juan 8:44) Ug gipulihan niyag kamatuoran ang kabakakan, nga nagpadayag sa tin-aw sa makataronganong mga kinahanglanon sa Diyos alang sa katawhan.​—Mateo 11:28-30.

Sama sa mga tinun-an ni Jesus, nasayran sa libolibong tawo karong adlawa nga sa tabang sa Diyos sila makagawas gikan sa relihiyosong kabakakan ug bakak nga mga tradisyon nga nag-ulipon kanila. Human makakat-on sa makapaluag-sa-dughan nga mga kamatuoran sa Bibliya, nasayran nila nga sila nahigawas na gikan sa makapabug-at nga kahadlok sa mga patay, nahigawas gikan sa kalisang sa walay-kataposang pagsakit diha sa kalayonhong impiyerno, ug nahigawas sa pamit-os nga ibayad ang hinagoan pag-ayong kuwarta alang sa relihiyosong mga serbisyo nga gihimo sa mga klerigo nga nag-angkong naghawas kang Kristo​—siya nga miingon: “Nadawat ninyo nga walay bayad, ihatag nga walay bayad.” (Mateo 10:8) Dugang pa, ang mas dakong kagawasan haduol nang moabot.

Ang Labing Malinglahong Pagkaulipon

Matikdi kon giunsa pagbatbat ni Jesus ang usa ka malinglahong matang  sa pagpangulipon, nga gihisgotang sayosayo, nga nag-apektar sa tanang lalaki, babaye, ug bata sa yuta: “Sa pagkatinuod gayod ako magaingon kaninyo, Ang matag mamumuhat sa sala maoy ulipon sa sala.” (Juan 8:34) Kinsay makaingon nga siya dili makasala? Bisan si apostol Pablo miadmitir: “Ang maayo nga buot nakong buhaton wala nako buhata, apan ang daotan nga dili nako buot buhaton mao ang akong ginabuhat.” (Roma 7:19) Bisan tuod walay usa ang makapagawas sa iyang kaugalingon gikan sa mga gapos sa sala, ang atong kahimtang dili ingong walay paglaom.

Si Jesus nagpasalig sa iyang mga tinun-an: “Kon ang Anak magpagawas kaninyo, kamo tinuod nga mahigawas.” (Juan 8:36) Ang katumanan niining saara magkahulogan gayod sa tinuod nga kagawasan gikan sa labing makadaot sa tanang matang sa pagkaulipon. Aron masabtan kon sa unsang paagi makalingkawas kita niini, kinahanglang sabton una nato kon sa unsang paagi naulipon kita sa sinugdan.

Ang Bibliya nagpadayag nga ang Diyos naglalang sa tawo nga may kagawasan sa pagpili, nga walay kiling nga makasala. Apan ang usa ka hakog, dili-makitang espiritung anak sa Diyos buot nga mogahom sa katawhan, nga walay pagsapayan sa tawhanong pag-antos ingong silot niana. Sa pagkab-ot sa maong tumong, ang maong rebelyosong manulonda, kinsa sa ulahi ginganlag Satanas nga Yawa, nagpatalikod sa atong unang tawhanong mga ginikanan, si Adan ug Eva, gikan sa Diyos. Human nga tinuyong gisupak ni Adan ang tinong mga instruksiyon sa Diyos, siya dili lamang nahimong makasasala kondili nagpasa sa pagkadili-hingpit ug kamatayon ngadto sa tanan niyang kaliwat. (Roma 5:12) Sa ngadtongadto, si Satanas nahimong ‘ang magmamando sa kalibotan,’ ug ‘ang sala nagmando sa katawhan ingon nga hari uban ang kamatayon.’​—Juan 12:31; Roma 5:21; Pinadayag 12:9.

Sa unsang paagi mapagawas kita? Pinaagi sa pagkahimong mga tinun-an ni Jesus, kita makabenepisyo sa haladnong kamatayon ni Kristo, nga may gahom sa ‘pagwagtang sa usa nga may gahom sa pagpahinabog kamatayon, nga mao, ang Yawa’ ug “mapagawas ang tanan nga tungod sa kahadlok sa kamatayon nailalom sa pagkaulipon sa tibuok nilang kinabuhi.” (Hebreohanon 2:​14, 15) Tiaw mo na​—kagawasan gikan sa pagkaulipon sa sala ug kamatayon! Dili ba makapadani ang paghunahuna sa maong kagawasan?

Apan, unsa na man ang bahin sa matang sa pagkaulipon nga atong gihisgotan sa sinugdan? Mahanaw ba gayod ang pinugos nga pag-ulipon sa katawhan nga supak sa ilang kabubut-on?

Seguradong Pasikaranan sa Paglaom

Segurado, makasalig kita nga wagtangon ang maong mangil-ad nga matang sa pagpangulipon. Nganong ingon man? Buweno, tagda kini: Si Jehova nga Diyos maoy direktang responsable sa labing talagsaong pagmartsa paingon sa kagawasan sa tibuok kasaysayan sa tawo. Tingali sinati ka sa asoy sa kasaysayan.

Ang nasod sa Israel giulipon sa Ehipto, nga gipugos sa pagtrabaho ug bug-at nga trabaho ug gipaagom sa mapintasong tratasyon. Sila mituaw ngadto sa Diyos alang sa tabang, ug tungod sa iyang dakong kaluoy, iyang gidungog sila ug milihok siya. Nga gigamit si Moises ug Aaron ingong iyang mga tigpamaba, si Jehova mihatag ug mando sa Ehiptohanong Paraon nga pagawson ang mga Israelinhon. Kadtong hambogirong hari balikbalik nga midumili, bisan human ipahamtang ni Jehova ang sunodsunod nga malaglagong mga hampak ibabaw sa yuta. Sa kataposan, gipahinabo sa Diyos nga si Paraon mosurender ug gipalakaw ang mga Israelinhon. Sa kataposan ang mga Israelinhon nahigawas na!​—Exodo 12:29-32.

Dili ba kini makapaukyab nga asoy? Apan tingali mahibulong ka kon nganong ang Diyos wala magbuhat ug susamang butang sa atong kapanahonan.  Nganong wala siya mosalga sa tawhanong mga kahikayan ug magwagtang sa pagpangulipon? Hinumdomi, si Jehova dili ‘ang magmamando sa kalibotan’ kondili si Satanas. Tungod sa mga hagit nga gipatungha balik didto sa Eden, gitugotan ni Jehova kining daotang Kaaway sa pagmando sulod sa limitadong panahon. Ang pagpangulipon, pagpanglupig, ug pagpamintas mao lamay mga timaan sa pagmando ni Satanas. Ubos sa maong impluwensiya, ang tawhanong pagmando napamatud-ang dakong kapakyasan. Ang Bibliya nagsuma sa mubo sa maong asoy: “Ang tawo nagmando sa tawo alang sa iyang kadaotan.”​—Ecclesiastes 8:9.

Apan hangtod kanus-a? Ang Bibliya nagpatin-aw nga kita nagkinabuhi sa “kataposang mga adlaw,” usa ka panahon nga kaylap ang kahakog ug kadalo. (2 Timoteo 3:​1, 2) Nagpasabot kini nga sa dili na madugay ang Gingharian sa Diyos, nga maoy gitudlo ni Jesus nga iampo nato, magtukod ug matarong nga katilingban diin idili na ang pagpangulipon. (Mateo 6:​9, 10) Si Jesu-Kristo, ang tinudlo sa Diyos nga Hari, molihok aron pagdugmok sa matag bahin sa pagpangulipon hangtod nga ang kataposang kaaway, ang kamatayon, mawala na.​—1 Corinto 15:​25, 26.

Sa dihang moabot na gayod ang maong adlaw, ang matinumanong katawhan makasabot nga ang pagpagawas sa katawhan sa Diyos gikan sa pagkaulipon sa Ehipto mao lamay gamayng pasiunang hulagway niining labi pang dakong pagpagawas. Oo, ngadtongadto, “ang kalalangan ipagawas usab gikan sa pagkaulipon sa pagkadunot.” Sa kataposan, ang tanan makapahimulos sa bug-os sa “mahimayaong kagawasan sa mga anak sa Diyos.”​—Roma 8:21.

[Footnote]

[Hulagway sa panid 7]

Ang gibanabanang unom ka milyong tawo naulipon sa pagpanugal sa Tinipong Bansa lamang

[Mga hulagway sa panid 7]

Ginatos ka milyon ang naulipon sa mga droga, alkoholikong ilimnon, ug tabako

[Mga hulagway sa panid 8, 9]

Sama kang Ricardo, libolibo ang nakasinati sa tabang sa Diyos aron makagawas gikan sa mga pagkagiyan

[Mga hulagway sa panid 10]

Maingon nga ang mga Israelinhon sa kakaraanan napagawas gikan sa pagkaulipon, sa dili na madugay ang matuod nga mga magsisimba sa Diyos magpahimulos ug labi pang dakong pagpagawas