Gikan sa Among mga Magbabasa

Gambalay sa Kinabuhi Ako 11 anyos, ug gusto gayod ako ug mga mananap. Sa dihang nadawat ko ang serye nga “Kinsay Manalipod sa Gambalay sa Kinabuhi?” (Nobyembre 22, 2001), naghinamhinam gayod ako sa pagbasa niini. Naluoy kaayo ko sa laagang albatross, nga makita sa panid 7. Makapasubo nga sila nangalumos tungod kay dili-tinuyong nasangit sa gipan-an nga mga taga sa palangri. Nagustohan ko usab ang kataposang hulagway diha sa maong panid, ang amaspas sa tab-ang o “sawfish.” Palihog padayona ang pagpatik ug mga artikulo nga sama niini!

S. V., Tinipong Bansa

Mga Bilanggoan Dili matukib sa mga pulong ang akong gibati sa pagbasa sa artikulong “Mga Sugilanon sa Pagtuo Gikan sa Makasaysayanhong Bilanggoan.” (Nobyembre 22, 2001) Aduna koy anak lalaki nga nabilanggo tungod kay nanulis ug bangko. Ikaduha na niya kining pagkabilanggo. Akong ipadala kining artikuloha kaniya. Nag-ampo ako nga kini makatandog unta sa iyang kasingkasing ug magdasig kaniya sa pagdawat sa gugma nga gibati ni Jehova alang kanatong tanan. Salamat sa inyong paghupay kanamo.

C. M., Tinipong Bansa

Paghikog Daghang salamat sa serye nga “May Kapuslanan ang Kinabuhi.” (Oktubre 22, 2001) Sa dihang hayskul na ako, nakasinati kog grabeng kahigwaos. Si Jehova nagpaluyo gayod kanako pinaagi sa Bibliya ug Kristohanong panag-ubanay. Bisan pa niana, gibati ko gihapon nga ako dili-takos. Sa dihang nabasa nako ang kahon nga nag-ulohang “‘Pasayloon ba Ako sa Diyos Tungod sa Akong Gibati?’” morag direktang nakig-estorya si Jehova kanako. Pagkamakalilipay ang pagkahibalo nga dili kalimtan ni Jehova ang mga tawo nga sama kanako!

S. H., Japan

Buot kong isulti kaninyo ang akong kalipay human mabasa kining seryeha. Pagkamalipayon ko nga wala ako sermoni niining mga artikuloha, sama sa akong gidahom human mabasa ang panghapin nga ulohan! Mora kog kahilakon sa kahon nga “‘Pasayloon ba Ako sa Diyos Tungod sa Akong Gibati?’” Tungod niining artikuloha, nakapakig-estorya na ako sa usa ka Kristohanong igsoong babaye bahin sa mga kalisdanan nga akong naeksperyensiyahan. Salamat sa mainampingong paghisgot niining ulohana.

A. F., Pransiya

Kawalo na nako nabasa kining seryeha. Sa dihang hayskul pa ako, naghunahuna kong maghikog. Morag tam-is ang kamatayon alang kanako. Gitabangan ko niining seryeha sa pagkaamgo nga bisan tuod tingali dili malipayon ang akong adlaw-adlaw nga kinabuhi, may kapuslanan gihapon ang kinabuhi. Dili ako usa sa mga Saksi ni Jehova, apan dugaydugay na kong nagbasa sa mga magasing Ang Bantayanang Torre ug Pagmata! Pagkadalayegon gayod ninyo!

S. M., Japan

Gikulata nga mga Babaye Salamat sa serye nga “Tabang Alang sa Gikulata nga mga Babaye.” (Nobyembre 8, 2001) Ang ulohan sa panid 3​—“Basin Magbag-o na Siya Karon”​—nagpahayag sa akong paglaom sulod sa daghang tuig. Makapamatuod ako sa katinuoran sa inyong giingon sa panid 4, nga kanunay gayong gipakitaag simpatiya ang nangulata inay ang biktima.

S. M., Alemanya

Makapadasig kaayo kining seryeha. Sama sa gibuhat gayod sa uban, mihilak ako pag-ayo sukad sa unang panid tungod kay nahinumdoman ko ang kalisdanan ug kasakit nga kas-a akong giantos. Gipabilhan ko pag-ayo ang ideya nga si Jehova nag-isip sa matag usa kanato nga bililhon. Ingong bug-os-panahong ebanghelisador, nakaplagan ko nga buot gayod sa mga tawo nga nagpuyo sa dapit diin ako nagsangyaw nga basahon kining artikuloha, mao nga kinahanglan kong mohangyo ug dugang pang mga kopya. Daghan kaayong salamat sa pagtagana sa maong bililhong impormasyon.

K. J., Australia

[Picture Credit Line sa panid 30]

Butterfly: Butterfly House, Mittagong, Australia