Gikan sa Among mga Magbabasa

Artraytis Natandog ako pag-ayo sa seryeng “Paglaom Alang sa Nag-antos sa Artraytis.” (Disyembre 8, 2001) Ako 21 anyos, ug ako nag-antos sa grabeng artraytis ug sa mga epekto niini duolan nag 15 ka tuig. Kining seryeha nakadasig gayod kanako, ug nagpalig-on kini sa akong determinasyon nga mopadayon sa paglahutay.

A. F., Pransiya

Nag-alagad ako ingong bug-os-panahong ebanghelisador, usa ka pribilehiyo nga akong gipabilhan apan nagkaanam ka lisod tumanon. Ang akong kahimtang gidayagnos nga osteoarthritis. Gibati ko ang kasakit adlaw-adlaw, ug usahay, ang kapakyasan nga akong gibati makapaguol pag-ayo kanako. Salamat sa tukma-sa-panahong artikulo ug sa pahinumdom nga ang atong tinuod nga kahupayan nagagikan sa pagdawat sa saad ni Jehova sa usa ka bag-ong kalibotan.

H.M.A., Tinipong Bansa

Ako nag-antos sa rheumatoid arthritis, ug sa pagkakaron ako nagpahiuli pa gikan sa grabeng pag-atake niining sakita. Kining mga artikuloha tukmang naghubit sa pag-antos nga naeksperyensiyahan sa usa nga nakaagom niining sakita. Makatabang ang pagkat-on ug dugang bahin niini ug kon unsay mahimo sa pagpamenos sa mga epekto niini.

G.F.F., Portugal

Ako 21 anyos, ug akong nahibaloan nga duna koy juvenile rheumatoid arthritis sa dihang 10 anyos pa lamang ako. Nakabasa na kog daghang eksperyensiya diha sa medikal nga mga magasin, apan walay usa niini ang motumbas sa akong nabasahan bahin sa akong espirituwal nga mga igsoong lalaki ug babaye nga nakaeksperyensiya sa mga butang sama sa akong naeksperyensiyahan. Sama kang Katia, nga gihisgotan sa mga artikulo, wala ako makaarang sa pagpadayon sa akong karera ingong bug-os-panahong ebanghelisador. Dako kaayo ang ikatabang sa pagbasa kon sa unsang paagi nasagubang sa uban ang pagbati sa kahigawad ug pagkasad-an tungod kay wala makabuhat ug dugang pa diha sa pag-alagad kang Jehova.

H. M., Tinipong Bansa

Ang akong sugmatsugmat nga rheumatoid arthritis nadayagnos usa ka tuig na ang milabay, sa dihang ako nag-edad ug 24. Kinahanglan kong moundang sa pag-alagad ingong bug-os-panahong ebanghelisador. Naguol ako pag-ayo. Tungod sa grabeng kasakit ug kakapoy, katunga na lay akong mahimo karon kay sa akong naandang mahimo. Nahupay ako niining artikuloha sa pagkahibalo nga gibati usab sa uban ang samang pisikal ug emosyonal nga kasakit. Nalipay usab ako sa praktikal nga impormasyon bahin sa pagbuhat kutob sa akong maarangan. Ako nagpaabot sa adlaw sa dihang “ang bakol mosaka ingon sa laking osa.”​—Isaias 35:6.

T. U., Japan

Usa ka tuig ang miagi nagsugod ako sa pagkabatyag ug grabeng kasakit diha sa akong mga lutahan. Sanglit edaran na ako, wala ko maghunahuna nga artraytis diay kadto. Ang inyong artikulo nakatabang kanako sa pagsabot nga kinahanglang magmabalanse ug magmakataronganon kon unsay akong dahomon sa akong kaugalingon.

B. P., Tinipong Bansa

Ako 19 anyos, ug may artraytis ang akong mga pulso, buolbuol, ug tuhod. Ako nalingaw ilabina sa sub-ulohang “Tagda ang Imong mga Limitasyon.” Ako nahiabot sa Ecuador gikan sa Tinipong Bansa uban sa tuyo nga moalagad ingong bug-os-panahong ebanghelisador dinhi. Apan tungod sa kaluya, kakapoy, ug kasakit, dili ko makasangyaw ug dugay. Nakahukom ko nga mopauli aron magpatambal, ug nanghinaot ako nga mahibalik dinhi sa dihang maayo na ako.

J. S., Ecuador

Fêng Shui Salamat sa artikulong “‘Fêng Shui’​—Alang ba Kini sa mga Kristohanon?” (Disyembre 8, 2001) Usa ako ka interior designer, ug bag-o lang akong gihangyo sa usa ka kliyente nga gamiton ang fêng shui diha sa disenyo. Nabalaka ako, tungod kay wala ako masayod bahin sa maong buhat. Tayming kaayo ang pag-abot sa maong artikulo! Karon ako nakahukom na nga dili mag-apil-apil niining maong pilosopiya sa disenyo.

C. V., Tinipong Bansa