Likayi ang Lit-ag sa Pagpanugal

“Ang pagpanugal wala makaapektar sa akong pisikal nga kahimtang, ug kanunay nakong makontrolar kon pilay kuwarta ang akong magasto sa pagpanugal. Apan akong angkonon nga kon modula ako sa loteriya, kanunay nakong pilion ang akong giisip nga akong suwerte nga mga numero.”​—Linda.

DAGHANG sugarol ang nakaugmad ug pagtuo sa suwerte nga mga numero o mga anting-anting. Tingali wala sila maghunahuna nga gihatagan nilag dako kaayong pagtagad ang ilang mga patuotuo, apan sila tingali magpadayon gihapon niana.

Ang ubang mga sugarol moampo pa gani sa Diyos, nga mohangyo nga tabangan sila nga makadaog sa ilang gipiling dula. Apan, naundan ang Bibliya sa paghukom sa Diyos niadtong nag-angkon nga nagsimba kaniya apan “nag-andam ug usa ka lamesa alang sa diyos sa Suwerte.” (Isaias 65:11) Oo, gidumtan sa Diyos ang mga buhat nga nagpasiugda ug matuotuohong pagtuo sa suwerte. Ang pagpanugal, sa kinaiyanhon,  nagdasig ug binuta nga pagsalig sa gitawag ug Diyosa sa Suwerte.

Ang pagpanugal sa kawalay-ulaw nagpasiugda usab ug gugma sa salapi. Sa katilingban karon nga nag-anam ka walay-pakabana sa espirituwal nga mga butang, ang salapi mismo nahimong kapuling diyos, ug ang pagpanugal maoy popular nga paagi sa pagsimba niana. Ang bag-ong mga katedral mao ang dagkong mga kasino, ug ang bag-ong prinsipyo mao nga ang kadalo maayo. Nakaplagan sa mga tigdukiduki nga ang kinabag-an sa mga tawo nga mag-adtoan sa mga kasino nag-ingon nga gibuhat nila kana, dili tungod sa kalingawan o sa atmospera, kondili aron makadaog ug “dako kaayong kantidad sa kuwarta.” Apan, ang Bibliya nagpasidaan: “Ang gugma sa salapi maoy gamot sa tanang matang sa makadaot  nga mga butang, ug tungod sa pagpangab-ot niini nga gugma ang pipila nahisalaag gikan sa pagtuo ug nagtusaktusak sa ilang kaugalingon sa daghang kasakitan.”​—1 Timoteo 6:10.

Sa 1 Corinto 6:​9, 10, ang Bibliya klarong nag-ingon: “Ayaw pagpahisalaag. Walay . . . mga tigsimbag idolo . . . ni mga tawong dalo . . . nga makapanunod sa gingharian sa Diyos.” Ang kadalo dili lamang usa ka makapaluya nga sakit sa katilingban; kini maoy makamatay nga espirituwal nga sakit​—apan usa ka sakit nga walay tambal.

Ilang Nakaplagan ang Kalig-on sa Pagbag-o

“Makadaghan na kong misulay sa paghunong sa pagpanugal,” nahinumdom si Kazushige, nga gihisgotan sa pangbukas nga artikulo. “Akong naamgohan nga ang akong pagpanugal uban sa akong mga higala diha sa karerahan sa kabayo nagdaot sa akong pamilya. Kanunay nakong mapildi ang bisan unsang kuwarta nga akong madaog. Napildi pa gani sa sugal ang kuwarta nga gitigom sa akong asawa alang sa iyang pagpanganak sa among ikaduhang anak nga lalaki, ug ngadtongadto gisugdan nako pagsugal ang pondong salapi sa akong kompaniya. Tungod niini, bug-os nga nahanaw ang akong pagtahod sa kaugalingon. Ang akong asawa kanunayng maghilak ug mangaliyupo nga mohunong na ko sa pagsugal, apan dili gayod ako makahunong.”

Dayon si Kazushige misugod pagtuon sa Bibliya uban sa mga Saksi ni Jehova. Siya miingon: “Sa pagsige nakog basa sa Bibliya, mas masaligon ako nga adunay Diyos ug nga makabenepisyo ako sa pagpatalinghog kaniya. Ako determinado nga uban sa gahom nga itagana sa Diyos, ako mohunong sa pagpanugal. Sa akong katingala, dili lang kay nakahunong ako sa pagpanugal kondili naugmad usab nako ang pagdumot niana. Karon sa dihang maghunahuna ako sa kagul-anan nga gipahinabo sa pagpanugal nganha sa akong pamilya, mosakit ang akong dughan. Pagkadako sa akong pasalamat kang Jehova nga Diyos nga iya akong gitabangan sa pag-undang sa akong pagkagiyan sa sugal ug nga iya akong gitabangan nga makabaton ug makahuloganong kinabuhi!”​—Hebreohanon 4:12.

Si John, nga gihisgotan usab sa pangbukas nga artikulo, misugod usab pagtuon sa Bibliya. Siya nahinumdom: “Ang akong pagtuon sa Bibliya nakatabang kanako sa pagtimbangtimbang pag-usab sa akong mga kahimtang. Sa unang higayon, ang akong mga mata nabuka gayod sa kadaot nga gipahinabo sa akong pagpanugal nganha sa akong pamilya ug kanako. Nasabtan nako nga ang pagpanugal nagpalambo ug hakog, dinalo nga tinamdan diha sa mga tawo​—mga hiyas nga gidumtan ni Jehova. Samtang nagpadayon ako sa akong pagtuon, ang akong gugma kang Jehova naghatag kanako ug kalig-on sa paghunong sa pagpanugal. Misugod ako sa pagpanugal tungod kay nangandoy ako nga makakaplag ug mas maayong kinabuhi. Karon nga mihunong na ko sa pagpanugal ug malipayon nang nag-alagad kang Jehova, natuman ang akong gipangandoy.”

Si Linda, nga asawa ni John, nakahukom usab sa paglikay sa pagpanugal. “Dili kadto sayon,” matod niya. “Apan human ang akong bana ug ako magsugod sa pagtuon sa Bibliya uban sa mga Saksi ni Jehova, nakakat-on ako sa paghatag ug dakong pagtagad sa mas hinungdanong mga butang sa kinabuhi. Akong nakat-onan nga dili lang kay higugmaon ang mga butang nga gihigugma sa Diyos kondili dumtan usab ang mga butang nga iyang gidumtan, lakip na ang tanang matang sa kadalo. Dugang pa sa pagtagamtam ug mas makahuloganong kinabuhi, mas daghan pa kog kuwarta karon.”​—Salmo 97:10.

Pinaagi sa pag-ugmad ug relasyon uban kang Jehova nga Diyos, ikaw usab makakaplag ug kalig-on ug kaalam nga gikinahanglan sa paglikay sa lit-ag sa pagpanugal. Ang pagbuhat niana magpauswag sa imong pinansiyal, emosyonal, ug espirituwal nga kahimtang. Unya malipay ka sa pag-eksperyensiya mismo sa katinuoran sa giingon sa Proverbio 10:22: “Ang panalangin ni Jehova​—mao kana ang makapadato, ug dili niya kana dugangan ug kasakit.”

[Blurb sa panid 11]

Ang kadalo dili lamang usa ka makapaluya nga sakit sa katilingban; kini maoy makamatay nga espirituwal nga sakit

[Kahon/Mga hulagway sa panid 9]

Ang Pagpanugal ug ang Labaw-Tawhanon

Sa usa ka taho ngadto sa National Gambling Impact Study Commission, ang mga tigpanukiduki sa Duke University nagpasumbingay sa koneksiyon tali sa paagi sa pag-anunsiyo sa pagpanugal ug sa pagtuo sa labaw-tawhanon. Ang taho nag-ingon: “Daghang paanunsiyo [sa loteriya] ang naghatag ug dakong pagtagad sa materyal nga mga butang . . . Apan dili kini ang materyalismo nga misangpot gumikan sa paghago ug paglahutay kondili kini sama ra sa pagsalig sa labaw-tawhanong mga puwersa, nga gipasukad sa mga panahom, mga damgo ug patuotuo. Ug ang matag manedyer sa loteriya nahibalo nga daghan sa iyang kinamaayohang mga kustomer nagbase sa ilang mga pusta sa personal nga mga patuotuo, mga tsart sa astrolohiya, mga mananagna, ug sa gitamod nga ‘mga basahon sa mga damgo’ nga naglista sa mga numero nga katumbas sa mga ngalan, petsa, ug mga damgo. Imbes ipasiugda nga ang tanang numero dunay susamang purohan nga mapili ug ang pagpanugal ginamit ang popular nga mga numero magpakunhod sa gidahom nga bahin sa daog sa usa ka tawo, ang mga ahensiya sa loteriya nagdasig sa mga magdudula sa pagpili (ug pagpabilin) sa gituohan sa usa nga makahuloganong mga numero.”

[Mga hulagway sa panid 10]

“Ang akong gugma kang Jehova naghatag kanako ug kalig-on sa paghunong sa pagpanugal.”​—John

“Dugang pa sa pagtagamtam ug mas makahuloganong kinabuhi, mas daghan pa kog kuwarta karon.”​—Linda

[Mga hulagway sa panid 10]

“Sa akong katingala, dili lang kay nakahunong ako sa pagpanugal kondili naugmad usab nako ang pagdumot niana.”​—Kazushige