Mga Batan-on Nangutana . . .

Unsay Mahimo Ko Aron Mahimong Mas Madanihon?

“Dili sayon o relaks ang pagpadayon sa pakig-estorya sa mga dalaga. Wala ako mahibalo kon unsay ilang gihunahuna, kon unsay ilang gibati, o kon unsay ilang panglantaw sa mga butang.”​—Tyler.

UNSANG mga hiyas sa mga ulitawo ang labing magustohan sa mga dalaga? “Pagsalig,” matod sa tin-edyer nga ginganlag Emily. Si Robyn, laing tin-edyer, nagbutang sa pagkasiawan ingong una sa iyang listahan. Ug unsang mga hiyas ang labing maangayan sa mga ulitawo diha sa mga dalaga? Dili katingad-anan, ang usa ka surbi nagpadayag nga ang pagkaguwapa nag-una sa ilang listahan. Ang pagbaton ug samang mga interes ug mga prinsipyo maoy ikaunom sa listahan.

Ang mga artikulo ug mga surbi nga naghisgot sa mga relasyon sa ulitawo ug dalaga kasagarang makita diha sa mga magasing pangbatan-on. Tin-aw, daghang batan-on kanunayng maghunahuna​—o tingali mabalaka pa​—kon unsa ang hunahuna sa kaatbang nga sekso bahin kanila. Tingali ikaw mismo usahay mabalaka niana. Wala magpasabot nga ikaw andam nang magminyo sa dili madugay. Ang katarongan mao nga walay usa nga gustong mahimong dili madanihon o dili maangayan! Si Tyler miingon: “Kon ikaw tin-edyer, gusto nimong magmadanihon sa tanan. Gusto nimong mauyonan ka sa imong mga isigkaingon, lalaki ug babaye.” Gawas pa, basin bation mo nga sa usa ka adlaw gusto nimong makakitag angayang kapikas sa kaminyoon. Kon kanang panahona moabot na, natural lang nga buot nimong magmadanihon alang nianang tawhana.

Ugaling lang, isip Kristohanong batan-on, tingali wala kay dakong eksperyensiya sa pagpakiglabot sa kaatbang nga sekso. Dugang pa, tingali mobati ka sa pagpit-os sa imong mga isigkaingon nga magmadanihon sa lawasnon. Tungod sa daghang pasundayag sa labing maayong mga modelo ug mga aktor nga maskulado kaayo nga imong makita sa TV ug mga magasin, dili katingad-ang mobati ka nga kulang sa pagsalig ug wala makakab-ot sa gidahom nga mga sukdanan! Nan, unsay gikinahanglan aron magmadanihon sa uban​—lakip kadtong sa kaatbang nga sekso​—sa makataronganon ug makapalig-ong paagi?

Ang Kabuangan sa Paglaom sa Gituohang “Hingpit” nga Lawas

Ang sikologong si William S. Pollack nag-ingon nga tungod sa impluwensiya sa industriya sa kalingawan, daghang batan-on “nagagugol ug di-maihap nga mga oras sa pagdiyeta, pag-alsag bug-at nga mga puthaw, ug pag-ehersisyo, ang tanan sa paningkamot nga mausab ang gidak-on ug porma sa ilang mga lawas.” Ang pipila sa kapeligroso nagpasobra pa, sama sa halos pagpagutom sa ilang kaugalingon, aron makab-ot kanang “hingpit” nga lawas. Bisan pa niana, ang Social Issues Research Centre nag-ingon: “Ang sumala-sa-media nga mithianong katahom alang sa mga babaye makab-ot sa ubos sa 5% sa populasyon sa kababayen-an​—ug kana kon bahin lang sa timbang ug gidak-on. Kon gusto pa nimo ang mithianong porma, nawong ubp., lagmit kini makab-ot sa 1% lang.”

Busa ang tambag sa Bibliya sa Roma 12:2 maoy praktikal: “Ayaw itugot nga ang kalibotan alirong nimo magpuga kanimo aron masulod ka sa hulmahan niini.” (Phillips) Hinuon, wala kini magpasabot nga dili ka angayng magtagad sa imong hitsura. Makataronganon lamang ang pag-atiman sa imong lawas pinaagig kasarangang ehersisyo ug balanseng diyeta. (Roma 12:1; 1 Timoteo 4:8) Ang hustong pahulay ug katulog  makatabang usab kanimo aron ang imong hitsura ug pagbati maoy labing maayo. Sa samang panahon, hatagig pagtagad ang imong pagpanghindik ug personal nga pagpatahom. Usa ka Britanikong batan-on nga ginganlag David miingon: “Adunay usa ka dalaga nga madanihon, apan siya may suliran sa baho. Ang mga tawo molikay kaniya tungod niana.” Busa kaligo kanunay. Ang limpiyong mga kamot, buhok, ug mga kuko makapauswag sa imong panagway.

Bisan pag ang Bibliya wala magdasig sa sobrang pagpasiugda sa kon unsay imong isul-ob, kini nagtambag sa mga Kristohanon nga “magdayandayan sa ilang kaugalingon sa mahapsay nga sinina, uban ang pagkamakasaranganon ug maayong panghunahuna.” (1 Timoteo 2:9) Isul-ob ang sinina nga makapauswag sa imong panagway apan nga maoy dili hinobra o law-ay. * Ang makataronganong pagtagad sa imong panagway makadugang sa imong pagsalig-sa-kaugalingon. Usa ka batan-ong ginganlag Paul nagpahayag niana niining paagiha: “Tingali dili ka ang labing matahom, apan makapauswag ka niana.”

Mga Hiyas sa Sulod

Bisan tuod ang anindot nga nawong ug lawas makadani sa pagtagad, sa kataposan “ang katahom maoy usa ka bula.” (Proverbio 31:​30, Byington) Ang maayong hitsura lagmit dili malungtaron, ug kana tino nga dili makapuli sa madanihong mga hiyas sa pagkatawo. (Proverbio 11:22) Hinumdomi, usab, nga “ang tawo nagatan-aw sa makita sa iyang mga mata; apan alang kang Jehova, siya nagatan-aw sa kasingkasing.” (1 Samuel 16:7) Busa inay ipunting ang tanan mong pagtagad sa sukod sa imong hawak o sa imong pagkamaskulado, pauswaga ang imong pagdayandayan sa “natago nga pagkatawo sa kasingkasing pinaagi sa dili-madunot nga sapot sa malinawon ug malumong espiritu, nga dakog bili sa mga mata sa Diyos.” (1 Pedro 3:​3, 4; Efeso 4:24) Tinuod, sa kalibotan karong adlawa daghang batan-on tingali wala kaayoy pagtagad sa dalayegong mga kinaiya sa personalidad​—labi na gayod sa espirituwal nga mga hiyas. * Apan kadtong may diyosnong mga prinsipyo nagpabili niana ug madani niana!

Nan, ang labing maayong paagi aron magmadanihon sa mahunahunaon-sa-espirituwal nga Kristohanong mga lalaki ug mga babaye mao nga ikaw mismo magmahunahunaon sa espirituwal. Ugmara ang imong espirituwalidad pinaagi sa pag-ampo, personal nga pagtuon sa Bibliya, ug pagtambong sa Kristohanong mga tigom. (Salmo 1:1-3) Bisan pa niana, adunay ubang mapuslanong mga kahanas ug mga kinaiya nga imong maugmad. Dili kinahanglang may regular kang kadeyt o makigtrato aron maugmad kining mga kinaiyaha. Sa kapulihay, makabansay ka niana diha sa imong matag-adlawng mga paggawi ug pagpakiglangkit sa uban.

Pananglitan, ikaw ba mobatig kabakikaw ug kamaulawon kon anaay kaatbang nga sekso? Usa ka batan-on nga ginganlag Paul miadmitir: “Usahay bation ko ang kagil-as​—kay sila maoy mga babaye, ug ako dili kaayo makasabot sa mga babaye nga sama sa mga lalaki. Ug dili ko buot maulawan.” Sa unsang paagi maugmad mo ang pagsalig ug pamarog nga makaparelaks sa uban? Usa ka paagi mao ang pagpahimulos sa nagkalainlaing mga kauban nga anaa sa Kristohanong kongregasyon. Panahon sa mga tigom magpakitag personal nga interes sa uban​—dili lamang sa mga membro sa kaatbang nga sekso nga sama nimog edad kondili sa mga bata usab, mga hamtong, ug mga tigulang. (Filipos 2:4) Ang pagkakat-on sa maayong pagpakiglabot sa nagkalainlaing mga tawo makatabang kanimo sa pag-ugmad sa pagsalig-sa-kaugalingon.

Apan, pagbantay. Si Jesus miingon gayod: “Higugmaon mo ang imong silingan sama sa imong kaugalingon.” (Mateo 19:19) Kon ikaw adunay pagsalig sa imong kaugalingon, lagmit gayod nga ikaw dili mabakikaw kon anaay mga tawo. * Ugaling lang, bisan pag kinahanglanon ang pagbaton ug usa ka sukod sa pagtahod-sa-kaugalingon, ayaw pagpasobra. “Ako magasulti sa tanan dinha sa inyong taliwala,” matod ni apostol Pablo, “nga dili maghunahuna ug labaw bahin sa iyang kaugalingon kay sa angay nga hunahunaon.”​—Roma 12:3.

Susiha usab pag-ayo ang imong mga pamatasan ug mga kahanas sa pagpakiglabot sa uban. Usa ka Britanikong babaye nga ginganlag Lydia nagpahayag: “Adunay usa ka ulitawo sa among tunghaan nga popular kaayo sa daghang dalaga. Apan human sila makaila kaniya, dili na sila moangay kaniya kay siya bagison ug makapasilo.” Ang mga tawo madani sa usa nga mogamit ug maluloton, mataktikanhong sinultihan ug magpakitag konsiderasyon sa uban. (Efeso 4:​29, 32; 5:​3, 4) “Ang maayong pamatasan maoy samag pasaporte, nga motugot sa kagawasan ug pagpakigkomunikar sa mga tawo,” nag-ingon si Dr. T. Berry Brazelton. Ang maayong pamatasan “gikinahanglan aron madawat sa uban.”

 Ang mga kostumbre ug mga lagda sa maayong pamatasan nagkalainlain sa tibuok kalibotan. Busa basin gusto nimong makapaniid kon sa unsang paagi ang hamtong nga Kristohanong mga lalaki ug mga babaye magtinagdanay sa usag usa. Pananglitan, nabatasan ba sa inyong nasod nga ablihan sa usa ka lalaki ang pultahan alang sa usa ka babaye? Nan ang pagkat-on sa pagpakita sa maong kortesiya mopausbaw sa imong dungog ingon nga maligdong, maayog-batasan nga tawo.

Kataposan, basin makatabang kanimo ang pag-ugmad ug timbang nga katakos sa pagkasiawan. Ang Bibliya nag-ingon nga adunay “panahon sa pagkatawa,” ug ang usa ka tawong may katakos sa pagkasiawan daling makabaton ug mga higala.​—Ecclesiastes 3:​1, 4.

Mahigalaon Kontra Kiat

Usa ka nangangkong “giya sa malamposong pagpakigdeyt” nagtambag nga ang sekreto sa pagdani sa kaatbang nga sekso mao ang pagkiniat. Ang mga magbabasa gisultihan nga magbansay sa pagpahiyom ug pagtan-aw sa mata ug pagpauswag sa ‘mga pulong sa pagpakig-ilaila.’ Ang maong tambag maoy supak sa diwa sa tambag ni Pablo kang Timoteo nga tagdon ang mga membro sa kaatbang nga sekso “uban sa bug-os nga kaputli.”​—1 Timoteo 5:2.

Bisan tuod ang pagkiniat tingali makapausbaw sa garbo sa kaugalingon, kini maoy dili sinsero ug malimbongon. Dili kinahanglan nga ikaw magkiniat o magpakaaron-ingnong ligdong aron ipadayon ang makapaikag nga kolokabildo. Ni kinahanglang mangutana kag makapakaulaw o dili-angayang mga pangutana aron masayran kon unsay pagbati ug hunahuna sa kaatbang nga sekso. Ipadayon ang paghisgot sa mga butang nga ‘matarong, maputli, ug hiligugmaon,’ ug imong ipakita nga ikaw nagapadulong na gayod sa pagkaugmad ngadto sa usa ka hamtong, mahunahunaon-sa-espirituwal nga lalaki o babaye. (Filipos 4:8) Ang imong pagkamasinugtanon sa diyosnong mga prinsipyo maghimo kanimong madanihon dili lamang alang sa kaatbang nga sekso kondili sa Diyos mismo. *​—Proverbio 1:7-9.

[Mga footnote]

[Mga hulagway sa panid 15]

Inay ipunting ang pagtagad diha sa imong hitsura, paningkamot sa pag-ugmad sa espirituwal nga mga hiyas

[Hulagway sa panid 15]

Kat-oni ang pagrelaks uban sa nagkalainlaing mga tawo