Gikan sa Among mga Magbabasa

Pagpakigdeyt nga Batan-on Pa Buot ko kamong pasalamatan pag-ayo sa artikulong “Mga Batan-on Nangutana . . . Pagpakigdeyt nga Batan-on Pa​—Unsay Kadaot Niini?” (Disyembre 22, 2001) Di pa dugay, gisukna ko ang akong inahan sa mao gihapong pangutana​—‘Unsa ba gayoy daotan sa pagpakigdeyt?’ Nahibalo ko sa tubag, apan gusto lang nakong makombinsir pag-ayo. Sa dihang nabasa ko ang artikulo, gibati ko nga morag nabasa ni Jehova ang akong hunahuna. Kining artikuloha nagpalig-on sa akong determinasyon nga dili makigdeyt hangtod nga andam na kong magminyo. Gikalipay ko gayod ang pag-abot sa inyong mga artikulo sa hustong panahon! Sa makausa pa, daghan kaayong salamat.

L. F., Tinipong Bansa

Gibasa ko dayon ang artikulo, ug makapadasig kaayo kini. Mga 15 anyos na ang akong edad, ug ang pagpit-os nga makigdeyt kusganon kaayo. Halos tanan nakong mga kauban sa eskuylahan duna nay trato, ug kanunay ko nilang yagayagaan tungod kay wa pa koy trato. Busa gikinahanglan gayod kining artikuloha! Ang mga artikulo nga sama niini makatabang kanamo sa pagsilsil diha sa hunahuna sa maayong tambag nga makaplagan diha sa Bibliya.

J. R., Pinlandia

Ako 16 anyos, ug ang tinguhang makigdeyt uban sa usa sa kaatbang nga sekso kusganon kaayo, bisag aron lang mapabilhan o mamatikdan. Apan, seryoso kong gihunahuna kana, ug nasabtan ko nga hinungdanong mohingkod una sa dili pa makigdeyt. Kini makatabang kanamo nga malikayan ang mga kapeligrohan ug dili magpas-an sa mga responsabilidad nga wala namo mahibaloi kon unsaon pagdumala.

A. G., Italya

Ako 16 anyos. Kining artikuloha miabot sa hustong panahon alang kanako ug sa akong mga higala usab. Nanglingkod ming tanan ug gibasa kana, nga nakaamgo nga duna diay mga kapeligrohan sa pagpakigdeyt samtang batan-on pa. Kining artikuloha nakatabang usab kanamo sa pagkasabot sa tinuod nga kahulogan sa pagpakigdeyt ug sa hunahuna sa Bibliya niana. Ang konklusyon nakapaamgo kanako nga kon hulaton ko ang hustong panahon sa pagpakigdeyt, mouswag pa ako sa espirituwal ug magamit nako ang “pagbuswak sa pagkabatan-on” sa paghimo sa maong pag-uswag.​—1 Corinto 7:36.

R.L.W., Tinipong Bansa

Sugilanon sa Kinabuhi Sa akong hunahuna kinahanglan akong mosulat aron sultihan kamo nga nalingaw gayod ako sa artikulo nga nag-ulohang “Napalig-on Tungod sa Pagsalig sa Diyos.” (Disyembre 22, 2001) Ang eksperyensiya ni Rachel Sacksioni-Levee nagpakita kon sa unsang paagi si Jehova nga Diyos nagpalig-on sa iyang mga alagad latas sa mga kalisdanan nga ilang naagoman. Samtang nagakagrabe ang mga kahimtang sa kalibotan, ang mga eksperyensiya nga sama niini makatabang kanato sa pagpadayon sa pagbuhat sa kabubut-on sa Diyos bisan pa sa atong mga pagsulay.

J. F., Britanya

Artraytis Daghan kaayong salamat sa serye bahin sa artraytis. (Disyembre 8, 2001) Ako 19 anyos ug akong nahibaloan nga duna koy artraytis sa nag-edad pa akog 8. Way-hunong ang kasakit nga akong gibati, gani may pipila ka adlaw nga mas mosakit pa kini kay sa ubang mga adlaw. Ang akong tinubdan sa kahupayan mao ang paglaom sa kinabuhi sa bag-ong kalibotan sa Diyos, sa dihang mahigawas na kita gikan sa tanang makapaluya nga mga balatian. Hangtod moabot kanang panahona, masaligon ako nga iya kong hatagan sa kusog nga akong gikinahanglan sa pag-antos niining masakit nga balatian.

M. R., Brazil

Makapainteres kaayo ang impormasyon niining seryeha. Ako 28 anyos, ug sulod sa miaging tulo ka tuig, nag-antos ako sa usa ka talagsaon kaayong matang sa artraytis. Uban sa paglaom nga gitanyag niining mga artikuloha, nakaarang ako sa pagpadayon sa pag-alagad kang Jehova.

M. U., Italya

Salamat sa mga artikulo bahin sa artraytis. Gusto kong moabot na ang Gingharian sa Diyos sa di madugay aron makahimo na ako sa ‘pagsaka ingon sa laking osa.’ (Isaias 35:6) Ako siyete anyos, ug nag-antos ako sa rheumatoid arthritis sa akong mga tuhod.

E. I., Gresya