Mga Batan-on Nangutana . . .

Angay ba Akong Magpailalom sa “Cosmetic Surgery”?

“Sa wala pa ako magpaopera sa ilong, nag-antos ko pag-ayo tungod sa pagsulogsulog. Wala ko magkinahanglag espesyal nga ilong, kana lang mobagay nako. Nalipay kaayo ko sa resulta sa operasyon, ug buhaton ko kini pag-usab kon gikinahanglan.”​—Eleni. *

“Nganong mopasignunot man ko sa sukdanan sa madanihong panagway? Kon dunay mga parte sa akong lawas nga usbon pinaagi sa operasyon, mora kog mini nga kuwarta. Dili tinuod.”​—Mathias.

“Ang tanan kinahanglang mohukom alang sa iyang kaugalingon. Lisod kaayong lain ang mohukom.”​—Manuela.

“KINSA ganiy mas guwapa nako, sa walay duhaduha nagmek-ap na siya.” Sa Alemanya, kanang kataw-anang panultihon dugay nang gigamit ingong usa ka matang sa pangatarongan sa mga tawo nga nabalaka nga ang ilang mga panagway duna gayoy apan. Apan, sa ubang kayutaan karon ang panultihon mahimong ipasignunot sa panahon: “Kinsa ganiy mas guwapa nako, sa walay duhaduha nagpailalom na siya sa cosmetic surgery.” Sa pagkatinuod, ang cosmetic surgery nahimo nang ordinaryo.

 “Milabay na ang panahon sa dihang ang cosmetic surgery maoy alang lamang sa mga dato,” nagtaho ang Swekong mantalaan nga Neue Zürcher Zeitung, nga midugang: “Duha ka uso ang mitungha: Nagkadaghang tawo ang midangop sa mga cosmetic surgeon . . . , ug ang babaye nga mga pasyente mas bata kay sukad masukad.” Sumala sa usa ka surbi sa Alemanya, duolan sa 20 porsiyento niadtong gisurbi tali sa 14 ug 29 anyos nagpailalom na sa cosmetic surgery, nagplano sa pagbuhat niana, o labing menos naghunahuna bahin niana. * Tingali ang pipila nimo ka mga higala, eskolmet, o paryente nagpaopera na aron moarang-arang ang ilang panagway.

Komosta sa imong bahin? Naghunahuna ka ba sukad nga magpaopera aron moarang-arang ang imong panagway? Gibati ba nimo nga nagtangkag ang imong mga dalunggan, nga dako ra kaayo o gamay ra kaayo ang imong mga dughan, nga nagbusyad ang imong tiyan o nagbugdo ang imong mga paa, o dili-nindot tan-awon ang imong ilong? Kon mao, dili kay ikaw ray nag-antos sa maong pagbati. Usa ka grupo sa hayskul nga mga babaye misulat ug artikulo diha sa usa ka mantalaan sa Alemanya nga nag-ingon: “Halos tanang batan-ong babaye nga pareho namog edad nakaagi sa mga yugto sa pagkadiskontento sa iyang lawas.” Ang tinguha nga mahimong madanihon ug magustohan pag-ayo maoy normal. Apan ang pag-opera ba mao ang sulbad?

Usa ka Sulbad sa Imong mga Problema?

Tagda ang mga batan-on nga imong kaila. Matingala ka ba sa pagkahibalo nga daghan kanila​—tingali bisan ang pipila nga madanihon sa imong pagtan-aw​—wala malipay sa ilang panagway? Apan lagmit mao gayod kana ang kahimtang. Ang pangutana mao, Sa imo bang hunahuna silang tanan kinahanglang magpaopera aron matul-id ang ilang mga apan? O sa imo bang hunahuna mas maayo kon ang kadaghanan makakat-on sa pagkalipay sa maayong mga bahin sa ilang panagway? Dili ba mapadapat ang susamang prinsipyo sa imong kahimtang?

Sumala sa gipakita sa komento ni Eleni, ang cosmetic surgery sa pipila ka kahimtang makapahunong sa pagbugalbugal ug pagsulogsulog. Sa laing bahin, ang cosmetic surgery dili mao ang tambal sa tanan. Tinong dili kini kapuli sa himsog nga estilo sa kinabuhi, nga makapaarang-arang gayod sa panagway sa usa. Ug bisan tuod ang usa ka siruhano makapausab tingali sa imong panagway, dili niya mausab ang imong personalidad, ni makuha niya ang imong mga kabalaka o mapauswag ang imong pagtahod sa kaugalingon.

Hinumdomi usab nga ang ubang mga klinika o mga doktor may mga pangangkon nga dili nila matuman. Sila tingali, sa diwa, mosaad nimog kalipay. Apan, sa tinuoray sila tingali mas interesado sa imong kuwarta kay sa imong kalipay. Ikasubo, dunay pipila ka way-prinsipyong mga siruhano nga mohimog operasyon nga wala kinahanglana, diyutay rag purohan nga molampos, o peligroso​—basta duna lay mobayad sa galastohan.

Duna usay layog-abot nga mga kabalaka nga angayng hunahunaon. Pananglitan, ang ngil-ad tan-awon sa nag-edad ka ug 16 basig lahi nang tan-awon kon ikaw mag-edad ug 21. Nag-ingon ang aesthetic surgeon nga si Dr. Urs Bösch: “Ingong katibuk-ang lagda, ang cosmetic surgery dili angayng himoon diha sa mga tin-edyer. Ang porma sa lawas sa usa ka tin-edyer ug ang iyang kaamgohan sa iyang lawas mausab niining edara.” Dugang pa, ang mga batan-on mas lagmit nga magkinahanglan ug dugang pang mga operasyon. Ug samtang ang imong lawas motubo, ang mga uwat sa operasyon modako usab.

Kuwentaha ang Gasto

Ang Bibliya nagtambag kanato sa pagkuwenta sa gasto sa dili pa kita mosugod sa usa ka hinungdanong proyekto. (Lucas 14:28) Alang sa kadaghanang batan-on, ang cosmetic surgery maoy imposible tungod sa nalangkit nga mga galastohan. Ug kanang maong galastohan basin wala pa maglakip sa dugang mga eksaminasyon​—o pagretoke nga mahimong kinahanglanon.

Dunay daghang tawo nga nagbayad sa operasyon dili lamang pinaagi sa kuwarta kondili sa ila usab nga panglawas. Sumala sa American Society for Aesthetic Plastic Surgery, ang mga risgo sa panglawas naglakip sa temporaryong pagpanghubag, permanenteng mga uwat, pagkawala sa panimati ug katakos sa pagpasuso, ug sobrang pagdugo pa gani.  Pananglitan, si Anna halos mamatay panahon sa liposuction. Siya mireklamo: “Karon duna na akoy ngil-ad nga mga uwat ug lupyak sa akong tiyan.” Mahitungod sa liposuction nga mga operasyon, usa ka mantalaan sa Alemanya nag-ingon: “Ang mga taho bahin sa seryosong mga komplikasyon, bisan mga kamatayon, nagkadaghan.” Ayawg kalimot: “Ang cosmetic surgery maoy operasyon gihapon, uban sa tanang risgo niini,” sumala sa pagpahayag niini sa sulat-balita bahin sa panglawas nga Apotheken Umschau. Busa, timbangtimbanga pag-ayo ang mga risgo una ka modesisyon nga magpaopera​—ilabina kanang walay kalabotan sa medikal nga pagtambal.

Mahimo usab nimong suknaon ang imong kaugalingon: ‘Unsang matanga sa mensahe ang akong ihatag sa mga tawo bahin sa akong kaugalingon? Kana bang mensahe nga ang akong pisikal nga panagway maoy akong prioridad? Sa unsang paagi ang akong pagpili mag-impluwensiya sa akong mga katalirongan o mga manghod?’ *

Imong mga Motibo

Angay usab nga hunahunaon pag-ayo ang imong mga motibo. Ug dili tingali sayon ang pagsabot niana. Pananglitan, basin gusto nimong pangutan-on ang imong kaugalingon: ‘Gusto ko bang pahunongon ang kanunayng pagsulogsulog kanako bahin sa dili-nindot nga parte sa lawas? O natandog ang akong garbo? Ang ako bang tinguha sa pag-usab sa akong panagway naimpluwensiyahan sa pagpit-os sa katalirongan, makapadani nga mga panganunsiyo, o sa usa ka popular nga artista? Naningkamot ba ako sa pagkab-ot sa hilabihan ka taas nga sukdanan sa katahom nga gipasiugda pag-ayo sa palaumagian sa balita karon?’

Ang uban naghunahuna nga ang pagpaarang-arang sa panagway magpauswag sa ilang purohan nga makakita ug kapikas sa kaminyoon o maayog-suweldong trabaho. Apan sa tinuoray lang, ang matag minyo ba nga tawo nga imong kaila madanihon sa pisikal? Komosta ang panagway sa matag tawo nga dunay trabaho? Dili, ang maong mga kalamposan wala magdepende sa bug-os sa personal nga panagway. Gawas pa, ang usa ba ka umaabot nga kapikas o amo nga maghatag ug mas dakong pagtagad sa imong panagway kay sa imong pangsulod nga mga hiyas tinuod nga takos sa galastohan ug risgo sa pagpaopera?

Samtang susihon nimo pag-ayo ang imong mga motibo, hisgoti ang imong gibati uban sa imong mga ginikanan o sa usa ka hamtong nga higala. Kon naghunahuna ka nga ang usa ka parte sa imong lawas nakahatag gayod ug problema, pangutan-a sila kon unsay ilang matinud-anong opinyon. Ayaw lamang pagsalig sa salamin. Mahitungod sa paagi sa atong pagtan-aw sa atong pisikal nga mga kakulangan, si Nana miingon: “Mas seryoso kang naghunahuna niana kay sa uban tungod kay gitan-aw nimo ang imong kaugalingon gikan sa lahi nga punto-debista.” Ang mga tigdukiduki sa Landau University, sa Alemanya, misaysay nga sa daghang kaso ang cosmetic surgery gihunahuna, “dili tungod kay ang usa ka parte sa lawas ngil-ad gayong tan-awon, kondili kini morag ngil-ad tan-awon alang sa taglawas.”

Ayaw pagdalidali ug hukom, kondili timbangtimbanga pag-ayo ang tanang hinungdan. Isipa ang bisan unsang operasyon ingong permanente. Sa kaso sa bisan unsang operasyon, lagmit antoson nimo ang mga resulta sa operasyon sa dugaydugayng panahon.

Imong Labing Hinungdanong Katahom

Ang kalipay dili magsumikad sa imong panagway. Bisan tuod ang panagway makapauswag o makapamenos sa pagtahod sa kaugalingon, ang tinuod nga hinungdanon mao ang imong personalidad ug tinamdan. Human sa iyang nagpameligro sa kinabuhi nga eksperyensiya, si Anna mihinapos: “Akong nakat-onan nga ang katahom walay kalabotan sa imong panggawas nga panagway.”

Bisan tuod positibong naghisgot bahin sa pisikal nga katahom, gipakita sa Bibliya nga segundaryo lamang ang kahinungdanon niini kon itandi sa espirituwal nga katahom: “Ang pagkamadanihon mahimong malimbongon, ug ang kaanyag mahimong kawang; apan ang babaye nga nahadlok kang Jehova mao ang makabaton ug pagdayeg alang sa iyang kaugalingon.” (Proverbio 31:30; 1 Samuel 16:7) Ang pagdawat niining maong panglantaw makatabang kanimo sa pagkaplag ug kalinaw sa galamhan, bisan pag dunay parte sa lawas nga wala nimo maangayi.

Bisan unsa may imong desisyon, hinumdomi nga ang hingpit nga panagway ug hingpit nga kalipay dili gayod makab-ot sa pagkakaron. Ang tanan dili-hingpit sa pipila ka bahin. (Roma 3:23) Dili nimo kana mausab. Ang imong mausab mao ang imong pangsulod nga pagkatawo​—ang gitawag sa Bibliya ug “natago nga pagkatawo sa kasingkasing.” (1 Pedro 3:​3, 4) Pauswaga ang imong pagkatawo pinaagi sa pag-ugmad ug mga hiyas nga matahom sa mga mata sa Diyos. Wala kiniy risgo ni galastohan, ug way-sukod ang mga ganti!

[Mga footnote]

[Blurb sa panid 19]

Ang imo bang wala-maangayi nga parte sa lawas tinuod gayod nga usa ka disbentaha, o kinahanglan lang nimong usbon ang imong paglantaw sa imong kaugalingon?