Minahal nga Binuhi o Makuyaw nga Mamumuno?

TINAMPO SA MAGSUSULAT SA PAGMATA! SA POLANDIA

USA ka lalaki nga tig-jogging giatake sa usa ka agresibong iro ug human niana namatay tungod sa grabeng pagdugo. Usa ka batang babaye gipatay sa kaugalingon niyang iro nga Rottweiler. Atubangan sa iyang mga ginikanan, usa ka nuybe-anyos nga batang lalaki ang grabeng nasamdan kay giatake sa nasalaag nga German shepherd. Pipila lamang kini sa mga trahedya nga gipahinabo sa purebred o wala paliwati ug laing kaliwat nga mga iro sa Polandia.

Aron malikayan ang maong mga trahedya, ang pipila ka awtoridad nagtugot sa mga tawo nga makabaton ug pipila ka matang sa mga iro human lamang makakuhag permiso. Si Barbara Zaleska, usa ka membro sa Polish Kennel Association, nangatarongan nga ang permiso kinahanglang ihatag alang sa tag-iya ug dili alang sa iro “tungod kay nagdepende sa tag-iya kon ang mga mastiff, Rottweiler, ug mga bullterrier mahimong agresibo o magpabiling mga higala sa mga tawo.”

Sa pipila ka kaso ang mga iro tinuyong gibansay aron mahimong mga mamumuno. Gituohan nga ang mga paagi nga gigamit sa mga tigbansay naglakip sa pagbunal, pagpagutom, ug bisan sa “pag-ensayo sa pagpatay,” nga naglakip sa pagbansay sa iro sa pag-atake ug pagwataswatas sa mga tawotawo. Dayon, ang iro tudloan sa pag-atake sa mas huyang nga mga iro nga seguradong patyon niini. Sa dihang matapos na ang pagbansay, ang iro andam na nga mosalmot sa aktuwal nga mga bugno sa iro, nga makapahimuot sa mga sugarol ug uhaw-sa-dugo nga mga apisyonado.

Ang Bibliya tin-awng naghisgot bahin sa panglantaw sa Diyos maylabot sa kapintasan ngadto sa mga hayop. Kini nag-ingon: “Ang matarong nagaatiman sa kalag sa iyang binuhing hayop, apan ang mga kaluoy sa mga daotan mabangis.” (Proverbio 12:10) Kadtong buot magpahimuot sa Diyos dili magtratar sa mga hayop sa mapintas nga paagi. Kita malipay nga sa bag-ong kalibotan sa Diyos, ang batasan sa pagbansay sa mga hayop aron mahimong mga mamumuno​—alang sa esport o alang sa uban pang katuyoan​—matapos na.​—Salmo 37:9-11.