Pintali Pag-usab ang Imong Balay

ADUNAY usa ka butang nga makapalipay pag-ayo bahin sa epekto sa bag-ong pintal. Diha sa usa ka lawak nga morag hugaw ug daan tan-awon, ang pintal makahatag ug dakong kalainan. Gusto ba nimong panindoton ang usa o duha ka lawak sa imong balay? Kon wala ka pa gayod makasulay pagpamintal, tingali makaplagan nimo nga dili diay kini lisod!

Ubanan nato sa pagtrabaho si Fernando, iyang asawa, si Dilma, ug ang ilang otso-anyos nga anak babaye, si Vanessa, samtang ilang pintalag usab ang usa ka bahin sa ilang balay. Tingali human niana makamao na kitang mopintal. Apan, sa dili pa kita mag-ilis ug mga sininang pangtrabaho, magtuon una kitag diyutay bahin sa pagpilig mga kolor.

Pagpili sa mga Kolor

Hinungdanon nga pilion ug maayo ang mga kolor sa pintal. Ang kolor dili lamang makapanindot sa imong balay. Makaapekto pa gani kini sa imong buot. Ang hayag, sinaw nga mga kolor mas makapadasig, samtang  ang hilaw nga mga kolor nga dili sinaw mas lagmit nga makaparelaks kanimo. Ang usa ka kolor mahimong lugom tan-awon kon ipintal sa bungbong sa sulod sa bilding, apan ang mao gihapong kolor mahimong hayag tan-awon sa gawas. Si Fernando ug Dilma mipilig kolor nga golden yellow ug off-white alang sa ilang balay. Unya atong tan-awon kon asa nila kini ipintal.

Matikdi ang color wheel sa ibabaw. Ang mga kolor nga nag-atbang sa usag usa diha sa ligid gitawag ug complementary colors. Kini morag mohayag pa kon taparon. Kon gusto nimo ang color scheme nga mas naandan inay kanang talagsaon, pagpili ug nagkalainlaing bulok gikan sa mao ra gihapong kolor. Kini gitawag nga monochromatic color scheme.

Sa dili pa sila mosugod sa pagpintal, dunay pipila ka pangutana ang atong mga higala. Gustong mahibaloan ni Fernando kon unsang mga matanga sa pintal ang ilang gikinahanglan, ug buot masayran ni Vanessa kon giunsa paghimo ang pintal. Busa mas maayo tingaling adtoon namo ang pabrika sa pintal niining dapita aron among masayran.

Kon Giunsa Paghimo ang Pintal

Si Gerard, ang tag-iya sa pabrika, miuyon nga mahimong among giya. Usa sa unang mga butang nga among nakita sa among pagsulod sa pabrika sa pintal mao ang dakong mixer nga nag-ukay sa lapot nga sinagol nga anaa sa morag dakong palanggana nga masudlan ug 800 litros. Misinggit si Gerard tungod sa kabanha: “Ang paghimog pintal parehas ra sa paghimog keyk​—ang tanang sambog timbangon ug sagolon.”

“Apan unsay resipe sa paghimog modernong pintal?” nangutana mi.

“Dunay upat ka pangunang sambog,” mitubag si Gerard. “Mga pangkolor, binder, likido, ug espesyal nga mga aditibo. Kining pintala nga inyong nakita nga gisagol dunay titanium dioxide ingong pangunang sangkap niini. Kining puti nga substansiya gikalot gikan sa yuta ug karon gigamit na diha sa modernong mga pintal inay ang tingga.” Ang sinagol morag harina nga gigamit sa pagluto.

Si Gerard nagpadayon: “Ang sinagol polboson uban ang diyutayng gidaghanon sa binder​—niining kahimtanga gigamit ang acrylic nga salong. Sa dihang makita sa tighimog pintal nga husto na ang pagkalapot niini, idugang niya ang nahibiling salong, dayon ang mga likido sama sa tubig o tiner sa pintal, ug sa kataposan ang bisan unsang espesyal nga mga aditibo.”

Gusto namong mahibaloan kon unsang matanga sa pintal ang among kinahanglanon aron sa pagmentinar sa balay. Ang among giya nagpatin-aw: “Dunay duha ka paninugdang matang sa pintal sa balay. Ang oil-based nga mga pintal naggamit ug mga lana nga sama sa linasa o gibag-o ug diyutay nga lana sa soybin ingong binder, samtang ang water-based nga mga pintal naggamit ug vinyl o acrylic nga mga salong ingong binder. Ang oil-based nga mga pintal mogahi pag-ayo inigkauga, busa haom kining gamiton diha sa mga dapit nga kanunayng matandog, sama sa mga pultahan ug mga molding. Apan, ang oil-based nga mga pintal may tendensiya nga modalag ug mahup-ak kon dugay na. Sa laing bahin, ang dekalidad nga vinyl ug acrylic nga mga pintal dugayng molubad ug dili kaayo isog ug baho. Ang 100-porsiyento nga acrylic nga mga pintal alang sa gawas sa balay mas molahutay usab sa kainit sa ting-init sa Australia o sa kabugnaw sa tingtugnaw sa Canada.”

Hinaot mahinumdoman namo ang gitudlo ni Gerard kanamo. Apan duna pa siyay diyutayng isulti: “Dunay upat ka sukaranang kasinawon diha sa duha ka matang sa pintal: ang sinaw, samag-satin ka sinaw, dili kaayo sinaw, ug dili sinaw. Ang sinaw mas maayong ipintal ingong proteksiyon sa mga dapit nga daling madaot tungod sa kanunayng pagkatandog. Ang samag-satin ka sinaw maayong ipintal sa mga banyo ug pasilyo. Ang dili kaayo sinaw o ang  dili sinaw nga pintal mohaom kaayo sa mga sala, ug ang dili sinaw nga pintal labing maayong ipintal sa mga kisame.” Kami nagpasalamat kang Gerard tungod sa matulon-anong pagsuroy ug namauli sa balay aron sugdan ang lisod nga bahin sa atong proyekto​—ang pag-andam sa mga pintalanan.

Gikinahanglan ang Bug-os nga Pagpangandam

Ang maanindot ug malungtaron nga pintal nagdepende gayod sa kadako sa gihimong pagpangandam sa dili pa ang pagpintal. Busa manglulho na ta ug mangandam alang sa hago nga trabaho. Tingali makakuha pa kita ug dugang mapuslanon nga mga sugyot. Dunay duha ka proyekto nga gihunahuna si Fernando​—ang pagpintal sa kan-anan ug sa koral sa atubangan sa balay. Unahon nato pagtrabaho ang lawak kan-anan.

Human makuha ang mga muwebles gikan sa lawak, hanigan nato ang salog ug daan nga mga hapin sa higdaanan. Una, kinahanglan natong kagison ang daang nangahup-ak nga pintal gikan sa hamba sa bentana, sa mga molding, ug sa kisame. Atong tabangan si Fernando nianang trabahoa. Matikdi nga iyang gipahiluna ang iyang hagdanan diha sa patag nga lugar sa salog. Dugang pa, mag-amping siya nga dili gayod motindog sa kinaibabwang ang-ang sa hagdanan, kay kon buhaton niya kana mas dako ang purohan nga mahulog siya. Maayo pag kondisyon ang mga bungbong nga ginama sa yeso, apan kinahanglan una kining hugasan ginamit ang sabon ug tubig sa dili pa kini pintalan.

Sunod, gamiton nato ang igkakagis aron makuha ang nangahup-ak nga mga pintal gikan sa mga likiliki, nga kinahanglang mabulitan. Gamiton nato ang acrylic nga pangbulit sa mga likiliki palibot sa bentana ug baseboard tungod kay kini nga bulit magpabiling maunat-unat ug makasugakod sa lihok sa kahoy ug yeso. Sa ulahi, samtang hugasan ni Vanessa ang mga palita, ang uban kanato magliha pag-ayo sa nawong sa kahoy ug mga bungbong, ginamit ang dili kaayo dagkog grano nga papel-de-liha. Kini makatangtang sa gagmayng mga tibugol ug makapasapnot usab sa nawong sa kahoy aron motapot pag-ayo ang pintal.

Nganong nagsul-ob man ta niining kataw-anan-tan-awon nga mga maskara, mangutana ka tingali? Panagana kini aron dili magsakit ang atong mga tutonlan tungod sa pintal o sa abog sa yeso. Ang atong mga antipara morag dili tingali kaayo nindot tan-awon, apan sa dihang mamintal kita nga maghangad, panalipdan niini ang atong mga mata batok sa mga tipaka nga mangahulog. Kinahanglang mag-amping pag-ayo sa dihang magtangtang sa lead-based  nga mga pintal. (Tan-awa ang kahong “Ang Kapeligrohan sa Tingga” niining panira.)

Sa kataposan, atong silhigan ug silhig nga lanot ang entirong pintalanan. Ang kahoy nga wala pintali maingon man ang mga pat-ak-pat-ak diha sa mga bungbong nga ginama sa yeso kinahanglan na karong pahiran ug primer sa dili pa kini pintalan. Himoon kini aron ang ibabaw nga mga sapaw sa pintal mauga nga angay ang kasinawon imbes suhopon kini sa mga pat-ak-pat-ak diha sa kahoy tungod sa pagliha o sa daan nga pintal niini. Kon mahimo na kini, andam nang pintalan ang kuwarto.

Namatikdan nato nga ang koral ginama sa kahoy nga wala pintali. Human mahugasi pag-ayo ang koral, kinahanglang tabonan una nato ang tanang ulo sa lansang ginamit ang metal primer. Masanta niini ang paglapos sa taya. Tungod kay ang koral maladlad man sa ulan o init, ato kining pintalan ug kaduha o katulo ginamit ang acrylic nga pintal alang sa koral.

Buweno, igo na kana sa usa ka adlaw. Kay human na man ang tanan natong mga pagpangandam, ugma na ta mamintal.

Paggamit sa mga Brutsa

Karon ato nang anihon ang mga ganti sa hagong pagpangandam kagahapon. Una sa tanan, kinahanglang seguroon nato nga maayong pagkakutaw ang pintal sa dili pa nato kini ipahid. Ato nang nadugangan ug diyutayng tubig ang acrylic nga pintal alang sa bungbong, mga 5 porsiyento sa gidaghanon sa pintal. Makatabang kini aron mas daling ipahid ang pintal. Apan angay tang mag-amping nga dili masobrahan pagdugang ug tubig. Kay kon masobrahan, molasaw pag-ayo ang pintal ug makita ra gihapon ang daang kolor inigkahuman ug pintal. Alang sa mga ngilit sa bungbong ug sa kisame, gamiton nato ang lapad nga brutsa. Dayon, mogamit kitag mga roller aron sa pagpintal sa dagkong mga pintalanan. Makapadali kini sa trabaho. *

Angay natong hinumdoman nga ipahid ang sobrang pintal diha sa usa lamang ka bahin sa lata sa pintal ug isandig ang kuptanan diha sa hinlong bahin aron ang kuptanan ug ang atong mga kamot dili mabulit sa pintal. Sa kataposan, kinahanglang ipadapat nato ang lagda, “Magpintal gikan sa ibabaw paingon sa ubos.” Kini nagpasabot nga kinahanglang unahon nato pagpintal ang kisame sa dili pa pintalan ang mga bungbong. Dayon trapohan na lang nato ang bisan unsang pinisik sa pintal diha sa mga molding ginamit ang umog nga trapo ug pintalan kini ug sinaw nga oil-based nga pintal nga atong napili. Maayong pagkatrabaho! Nindot kaayong tan-awon ang golden yellow nga mga bungbong ug ang off-white nga molding.

Karon ang koral na usab sa atubangan. Alang niini gamiton nato ang dakong brutsa aron ipahid ang water-based nga pintal nganha sa koral. Igo na ang tulo ka sapaw sa pintal. Mga usa ka oras ang gikinahanglan nga sal-ang sa matag sapaw sa pintal aron igoigong mauga ang matag sapaw, sa ingon mahuman kita sa dili pa mogabii. Sugdan na nato.

Una, atong bas-on pag-ayo ang brutsa ug itaktak ang sobrang tubig. Kon himoon kini, mas motuhop sa brutsa ang pintal ug dili mogahi ang pintal diha sa brutsa. Ituslob nato pag-ayo ang brutsa sa pintal ug ipahid kinig maayo sa koral. Imbes pinahapaw lang ang pagpahid sa pintal nganha sa mga siklat, atong paneguroon nga motuhop pag-ayo sa grano sa kahoy ang pintal.

Tan-awa ra god! Ang atong kataposang sapaw sa pintal nahuman sa talisalop na ang adlaw. Bag-o nang tan-awon ang koral! Atong susihon ang atong trabaho. Kadtong duha ka adlaw nga trabaho takos gayod sa atong kahago. Pagkadakong kausaban! Nindot gayod ang bation kon mapintalan pag-usab ang balay.

[Footnote]

[Kahon/Hulagway sa panid 26]

Mga Sugyot sa Pagsulbad sa Kasagarang mga Problema

◼ AGUP-OP: Hugasi ang pintalanan ginamit ang sinagol nga usa ka bahin sa klorin ug upat ka bahin sa tubig. Pagguwantes ug pag-antipara. Pintali pag-usab ginamit ang maayong klase nga acrylic nga pintal, tungod kay mas daling motubo ang agup-op sa oil-based nga mga pintal. Kon mabatonan, gamita ang aditibo nga igpapatay sa agup-op.

◼ TUBIG UG UBANG MGA LAMA: Ayoha ang mga likiliki o kuhaa ang nakaingon sa lama. Hugasi kini ginamit ang sabon ug tubig. Pahiri ug primer o barnis nga makasanta sa taya, dayon pintali.

◼ ABOGON NGA MGA PINTALANAN: Pagpagi pag-ayo sa abog. Pahiri ug dugay-mauga nga sealer. Ang oil-based nga mga sealer daling motuhop ug mas motapot kay sa water-based nga mga sealer.

[Kahon sa panid 27]

Ang Kapeligrohan sa Tingga

Ang Environment Protection Agency sa Australia naghisgot niining mosunod diha sa pulyetong Lead Alert​—Painting Your Home?

◼ Bisan ang diyutayng gidaghanon sa tingga diha sa dugo makahatag ug dakong kadaot sa pag-ugmad sa hunahuna ug batasan sa mga bata.

◼ Dako kaayo ang kadaot nga ipahinabo niini ngadto sa mga bata nga wala pay singko anyos, tungod kay ang ilang sistema sa nerbiyos nagaugmad pa. Ang mga bata makasuhop ug hangtod 50 porsiyento sa tingga nga mosulod sa ilang mga lawas, samtang ang mga hamtong makasuhop ug mga 10 porsiyento.

◼ Kon makakaon ang bata ug may-tingga nga tipik sa pintal nga ingon ka dako sa kuko sa kumagko, ang porsiyento sa tingga diha sa iyang dugo magpabiling taas gihapon sulod sa ubay-ubayng semana.

[Hulagway sa panid 25]

Color wheel

[Hulagway sa panid 25]

Ang “kosina” sa tighimog pintal

[Hulagway sa panid 26]

Pagsul-ob ug mga himan nga manalipod kanimo