Angay Ka Bang Magpagiya sa mga Numero?

ANG numerolohiya ba makabarog ilalom sa dulot nga pagsusi sa siyensiya ug pangatarongan? Ang mga numero ba maoy paagi nga mahibaloan ang atong dulnganan? Angay ba nimong planohon ang imong umaabot pinasukad sa mga konklusyon sa paghubad sa kahulogan ug sa mga panagna labot sa mga numero?

Ang usa ka pagsupak nga wala mabuntog sa mga numerologo mao nga ang lainlaing mga kultura naggamit ug lainlaing mga kalendaryo. Pananglitan, komosta kon ang usa ka tawo nagpuyo diin ang Insek nga kalendaryo maoy gigamit? Tagda ang petsa nga gihisgotan sa atong pangbukas nga artikulo​—Septiyembre 11, 2001. Sumala sa Insek nga kalendaryo, kadto mao ang ika-24ng adlaw sa ika-7ng bulan sa ika-18ng tuig sa ika-78ng siklo. Sa Julian nga kalendaryo ang maong petsa maoy Agosto 29, 2001. Sumala sa Muslim nga kalendaryo, kadto maoy 22 Jumada II 1422, samtang sa Hebreohanong kalendaryo kadto maoy 23 Elul 5761. Sa unsang paagi mahimong adunay numerikal nga kahulogan ang usa ka petsa nga gipahayag sa lainlain gayong paagi? Laing punto: Ang mga pinulongan kasagarang adunay linain nga mga espeling sa mga ngalan. Pananglitan, ang mga letra nga anaa sa Iningles nga ngalang John maoy katumbas sa numero 2, apan ang mga letra sa Kinatsila nga espeling sa mao gihapong ngalan​—Juan​—maoy katumbas sa 1.

Tinuod nga daghang bahin sa uniberso ang ikapatin-aw pinaagi sa matematikanhong mga pormula. Kining maong mga pormula mahimong sulayan ug ipasundayag. Apan lahi gayod ang pag-angkon nga ang imong ngalan gimbut-an nang daan nga motukma sa imong petsa sa pagkatawo ug malangkit sa pipila ka numero aron matino nimo ang imong dulnganan.

Klaro ang konklusyon: Tungod kay ang paghubad sa kahulogan sa mga numero gipasukad sa nagkadaiyang mga butang sama sa kalendaryo ug pinulongan, dili makataronganong motuo nga tukma kining maong mga paghubad.

‘Panahon ug Wala Damhang Panghitabo’

Ang uban nainteres sa numerolohiya tungod kay gusto nilang mahibaloang daan ang ilang umaabot. Apan, gipatin-aw sa Bibliya nga ang mga detalye sa tawhanong kinabuhi dili matinong daan. Atong mabasa: “Ang lumba dili alang sa mga matulin, ni ang gubat alang sa mga gamhanan, ni ang pagkaon alang sa mga maalamon,  ni ang mga bahandi alang sa mga masinaboton, ni ang pabor alang kanilang adunay kahibalo; tungod kay ang panahon ug ang wala damhang panghitabo modangat kanilang tanan.” (Ecclesiastes 9:11) Oo, daghang hitabo ang kalit nga mahitabo. Ang maong wala damhang mga panghitabo nagpaimposible sa pagtag-an sa mga resulta pinasukad sa petsa sa pagkatawo o sa katumbas nga numero sa usa ka ngalan.

Tagda ang laing pananglitan: Sa pagdasig sa pagkamanggihatagon, ang Bibliya nag-ingon: “Ilabay ang imong tinapay ibabaw sa katubigan, kay sa paglabay sa daghang adlaw kini imong makaplagan pag-usab. Hatagi ug bahin ang pito, o bisan ang walo, kay ikaw wala mahibalo kon unsa nga katalagman ang mahitabo sa yuta.” (Ecclesiastes 11:​1, 2) Gawas lamang sa pipila ka eksepsiyon, ang mga kalamidad maoy mga panghitabo nga wala mahibaloi​—sa pagkatinuod, dili mahibaloan daan​—sa mga tawo. Busa, ang propesor sa matematika nga si Underwood Dudley misulat mahitungod sa mga numerologo: “Wala nila hunahunaa nga dunay mga butang nga sulagmang mahitabo. Ang katingalahang mga butang mahimong mahitabo nga walay espesipikong kalabotan sa usag usa.”

Tinuod nga dunay pipila ka panagna sa mga numerologo nga natinuod. Unsay nakaingon niini? Sa pipila ka kaso, ang sangpotanan mahimong nagkaatol lamang. Dugang pa, usahay ang pinulongan sa mga numerologo dili gayod klaro nga kini mapadapat sa ubay-ubayng mga sangpotanan. Apan dunay mas seryoso pang butang nga angayng tagdon.

Usa ka Matang sa Pagpanagna?

Wala hisgoti sa Bibliya ang numerolohiya. Apan naghisgot kini bahin kang Haman, ang  Amalekanhon kinsa naglaraw sa pagpuo sa mga Hudiyo nga nagpuyo sa Persia sa ikalimang siglo W.K.P. Ang asoy nag-ingon: “Si Haman nagsugo nga magripa (‘purim’ ang tawag niini) aron sa pagtino sa angayng adlaw ug bulan nga himoon ang iyang laraw. Ang ikanapulog tulo nga adlaw sa ikanapulog duha nga bulan, ang bulan sa Adar, mao ang napili.”​—Ester 3:​7, Today’s English Version.

Sa karaang mga panahon, ang pagripa maoy legal nga paagi sa paghusay sa panagsumpaki. * (Proverbio 18:18) Apan si Haman nagripa aron sa pagtagna​—usa ka butang nga gihukman sa Bibliya. Ang Deuteronomio 18:10-12 nag-ingon nga gidumtan sa Diyos si “bisan kinsa nga nagapanag-an, usa ka salamangkero o bisan kinsa nga nagapangitag mga tilimad-on o usa nga barangan, o usa nga tigpangdaot o bisan kinsa nga nagakonsultag espiritista o tigpanagna sa mga hitabo . . . Bisan kinsa nga nagabuhat niining mga butanga dulumtanan kang Jehova.”

Gilangkit sa Bibliya ang pagpanagna ug ang misteryosong gahom ngadto sa espiritismo. Ang daotang mga espiritu makamaniobra sa mga hitabo aron mohaom sa ilang katuyoan. Way sapayan kon mao kini ang kaso sa usa ka espesipikong kahimtang o dili, usa ka butang ang tino: Ang pagbuhat ug espiritismo gihukman sa Diyos, ug pinaagi niini ang usa makontrolar sa daotang mga espiritu.​—1 Samuel 15:23; Efeso 6:12.

Ang numerolohiya walay siyentipikanhong pasukaranan, ug dili kini makabarog kon susihon ginamit ang pangatarongan. Mas hinungdanon pa, tungod kay kini maoy usa ka matang sa pagpanagna, ang numerolohiya kasumpaki sa mga pagtulon-an sa Bibliya. Tungod niana, ang numerolohiya dili mapuslanong paagi sa pagmando sa imong kinabuhi o pagplano sa imong umaabot.

[Footnote]

[Kahon sa panid 6]

ANG KADAIYAHAN SA MGA KALENDARYO MAOY USA KA DAKONG BABAG SA NUMEROLOHIYA

GREGORIAN Septiyembre 11, 2001

INSEK Ika-24ng adlaw sa ika-7ng bulan sa ika-18ng

tuig sa ika-78ng siklo

JULIAN Agosto 29, 2001

MUSLIM 22 Jumada II 1422

HEBREOHANON 23 Elul 5761

[Kahon/Mga hulagway sa panid 7]

KASALIGAN BA ANG MGA HOROSKOPYO?

“Usahay ikaw mahigalaon, apan sa laing mga panahon ikaw hilomon. Nakaplagan nimong dili maalamon ang pagpadayag ug daghan kaayo bahin sa imong kaugalingon ngadto sa mga estranyo. Ikaw usa ka independenteng tighunahuna nga nagkinahanglan ug pamatuod sa usa ka butang una pa motuo niana. Gusto nimo ang kadaiyahan sa kinabuhi, ug dili ka magmalipayon kon ikaw napugngan sa mga lagda. Ikaw adunay dakong katakos, nga wala nimo magamit sa bug-os. Ikaw mahiligon sa pagpanaway sa imong nabuhat ug mga abilidad.”

Mora ba kanag naghubit kanimo? Kon mao, basin gihatagan nimo ug mas dakong kahulogan ang kahubitan kay sa angay niana. Kon buot hunahunaon, kadaghanan sa mga pahayag sa ibabaw tinuod alang sa kinabag-an sa katawhan. Busa, ang mga magbabasa mokiling sa pagdawat niadtong mga pahayag nga morag tukma ug dili panumbalingon kadtong dili tukma. Sumala sa librong Why Do Buses Come in Threes​—The Hidden Mathematics of Everyday Life, “ang mga tigpanukiduki nakakaplag nga kon kuhaon ang mga dagway nga nagsimbolo sa mga bituon diha sa horoskopyo, ang mga tawo dili makaila kon haing simboloha nailalom ang kahubitan, apan kon ilakip ang mga simbolo sila motuo nga ang ilang kaugalingong bituon mao ang labing tukma.”

[Kahon sa panid 8]

SIMBOLIKONG MGA NUMERO DIHA SA BIBLIYA

Ang pipila ka numero nga gigamit diha sa Bibliya dunay simbolikong mga kahulogan, apan sa sulod lamang sa konteksto sa Kasulatan diin kini gigamit. Pananglitan, ang numero kuwatro gigamit sa paghawas sa katibuk-an o pagkamalukpanon. Kining ideyaha masabot diha sa mga ekspresyon nga “upat ka tumoy sa yuta” ug “upat ka hangin sa kalangitan.” (Isaias 11:12; Daniel 8:8) Usahay, ang numero sayis naghawas sa pagkadili-hingpit. Makaiikag, ang numero nga gihatag ngadto sa yutan-ong politikal nga organisasyon ni Satanas diha sa basahon sa Pinadayag maoy “numero sa tawo”​—666. (Pinadayag 13:18) Dinhi ang sayis gisubli ug katulo, nga nagpasiugda sa pagkadili-hingpit nianang mananapon nga organisasyon. Sa dihang ang numero siyete gamiton sa simbolikong paagi, kini naghawas sa kabug-osan. (Levitico 4:6; Hebreohanon 9:24-26) Kini ug ang ubang simbolikong mga numero nga gigamit diha sa Kasulatan nakabaton ug kahulogan gumikan sa matagnaong konteksto niini.

Bisan tuod ang Kasulatan naghatag ug diyutayng importansiya sa pipila ka numero, ang Bibliya wala magdasig kanato sa paglangkit sa mga letra sa pipila ka pulong ngadto sa mga numero aron mahibaloan ang misteryosong mga kamatuoran.

[Hulagway sa panid 8]

Si Haman migamit ug pagpanagna aron sa pagpili sa petsa sa pagtuman sa iyang laraw sa pagpuo sa mga Hudiyo