Kasaligang Giya Alang sa Umaabot

ANG pagkadili-kasaligan ba sa numerolohiya ug sa ubang mga matang sa pagpanagna nagpasabot nga wala na kitay paagi nga mahibaloan ang atong umaabot? Dili gayod!

Ang mga numero dili makatug-an sa mga tawo kon unsay anaa sa umaabot. Apan ang “buhing Diyos,” nga nagsulti “sa kataposan sukad sa sinugdan,” makahimo niana. Gihimo niya kini diha sa iyang sinulat nga Pulong, ang Bibliya. (1 Timoteo 4:10; Isaias 46:10) Ang pulong usab sa buhing Diyos, dili ang pulong sa mga numerologo, ang “makatugkad sa mga hunahuna ug mga tuyo sa kasingkasing” ug busa makatabang kanimo sa pagsabot kon unsay magpalihok kanimo ug kon unsay maghatag kanimo ug tinuod nga kalamposan.​—Hebreohanon 4:12.

Ang atong Maglalalang, ang Awtor sa Bibliya, mao lamang ang usa nga tukmang makatagna sa umaabot. Tungod kini kay ang Diyos gamhanan sa tanan, ug kanunayng kasaligan ang iyang mga pulong. “Akong gisulti gayod kini,” si Jehova nga Diyos miingon. “Akong pagabuhaton usab kini.” (Isaias 46:11) Human giyahi ang mga Israelinhon paingon sa Yutang Saad, si Josue nakaingon nga masaligon: “Walay saad nga napakyas sa tanang maayong saad nga gisaad ni Jehova ngadto sa balay sa Israel; kining tanan natuman.”​—Josue 21:45; 23:14.

Ang Bibliya adunay daghang tagna nga mamatuman pa. Lakip niini kadtong nagtagna sa panahon sa dihang ang yuta mahinloan na sa pagkadaotan ug mahimong usa ka paraiso. (Salmo 37:​10, 11; Proverbio 2:​21, 22) Nadani ka ba sa maong kaugmaon? Nagtuo ka ba nga ang atong Maglalalang adunay kaalam ug gahom sa pagtul-id sa mga butang niining planetaha? Kon mao, buot nimong tagdon kon unsay giingon sa Bibliya bahin sa umaabot sa yuta. *

Busa, gamita ang imong panahon sa maalamong paagi karon​—dili pinaagi sa pagsusi sa imong umaabot pinasukad sa kahulogan sa mga numero kondili pinaagi sa pagpaningkamot sa pagbaton ug tukmang pagsabot sa Bibliya ug sa mga tagna niini. Ang mga Saksi ni Jehova andam nga motabang kanimo sa pagbaton ug dugang kahibalo bahin sa umaabot nga gipadayag diha sa Pulong sa Diyos, ang Bibliya.

[Footnote]