Kon Nganong Makapadani ang mga Numero

HANDURAWA ang kalibotan nga walay mga numero. Walay kuwarta. Ang negosyo himoon lamang sa inatubangay nga pagbayloay ug manggad. Ug komosta sa natad sa esport? Kon walay mga numero, dili lamang imposible ang pagrekord sa mga puntos kondili di gani nato mahubit kon pila ka magdudula ang angayng maglangkob sa matag tem!

Apan, gawas pa sa praktikal nga gamit niini, ang mga numero giisip sa pipila ingong misteryoso. Tungod kini kay ang mga numero anaa lamang sa hunahuna. Kini dili nimo makita, mahikap, o bation. Sa pag-ilustrar: Ang usa ka mansanas adunay lahi nga kolor, grano, gidak-on, porma, baho, ug lami. Masusi nimo ang matag usa niining maong mga kinaiya aron makita kon ang usa ka butang usa ba gayod ka mansanas, lemon, usa ka bola, o lain pang butang. Apan, ang numero dili ingon niana. Ang usa ka hugpong sa pito ka butang mahimong walay kaamgiran sa laing hugpong sa pito ka butang​—gawas sa kamatuoran nga pito kini ka buok. Busa, aron masabtan ang kahulogan sa mga numero​—pananglitan, aron maila ang kalainan tali sa sayis ug siyete​—kinahanglang masabtan ang usa ka butang sa hunahuna lamang. Ug dinhi magsugod ang pipila ka tawo sa paghatag ug mistikong kahulogan niini.

Gikan Kang Pythagoras Ngadto sa Mini nga Siyensiya

Ang paghatag ug linaing kahulogan sa mga numero maoy naandan sa karaang mga katilingban. Si Pythagoras, usa ka Gregong pilosopo ug matematiko nga nabuhi sa ikaunom nga siglo W.K.P., nagtudlo nga ang tanang butang mahubit pinaagi sa mga numero. Siya ug ang iyang mga sumusunod nangatarongan nga ang tibuok uniberso maoy pananglitan sa kahusay ug pagkabalanse. Nan, dili ba kaha nga ang matematikal nga mga kalambigitan maoy kinaiyanhon diha sa tanang pisikal nga mga butang?

Sukad sa adlaw ni Pythagoras, ang paghubad sa kahulogan sa mga numero gigamit sa pagpanagna ug pagbadbad sa mga damgo ug ingong mga tabang  usab sa pagmemorya. Gigamit kini sa mga Grego, Muslim, ug mga membro sa Kakristiyanohan. Naggamit ug usa ka sistema sa numerolohiya nga gitawag ug gematria, ang Hudiyong mga Cabalista nagtudlo ug numero alang sa matag 22 ka letra sa Hebreohanong alpabeto ug busa nangangkon nga nakakaplag ug natagong mga kahulogan diha sa Hebreohanong Kasulatan.

Susama usab niana ang modernong-adlaw nga numerolohiya. Kasagaran, ang imong ngalan ug petsa sa pagkatawo mao ang sinugdanan. Usa ka numero ang itudlo alang sa matag letra sa imong ngalan. Pinaagi sa pagsuma niini​—apil sa mga numero sa bulan ug petsa sa imong pagkatawo​—ang usa ka numerologo makaestablisar sa imong yawing mga numero. Dayon hatagan niyag linaing kahulogan kining mga numeroha, nga gibati niyang maghatag ug kompletong kahubitan nimo​—lakip na sa imong personalidad, imong wala-hunahunaang mga tinguha, ug sa imong dulnganan.

Tingali ang tinuod nga pangdani sa numerolohiya anaa sa daw pagkatukma sa pagtuki niini. “Daghang tawo ang mituo sa numerolohiya pinaagi sa pagsusi kon unsa ka duol nga ang mga numero mohaom niadtong kinsa gisusi pinaagi niini,” misulat si Edward Albertson sa iyang librong Prophecy for the Millions. Bisan pa niana, ang numerolohiya gitawag usab ug mini nga siyensiya. Ngano? Duna bay mga hinungdan nga magduda ka sa mga pangangkon niini?

[Kahon/Mga hulagway sa panid 5]

NATAGONG MGA MENSAHE SA BIBLIYA?

Sa iyang librong The Bible Code, ang magsusulat nga si Michael Drosnin nag-angkon nga nakakaplag siya ug natagong mga mensahe pinaagi sa pagtuki sa Hebreohanong Kasulatan ginamit ang kompiyuter. Sumala sa mga pangangkon ni Drosnin, ang “natagong mga simbolo” nagpadayag sa mga pulong nga “mamumuno nga mobuno” duyog sa ngalang Yitzhak Rabin​—ug nakaplagan kini usa ka tuig una patya si Primer Ministro Rabin sa Israel.

Sumala sa dahomon, ang The Bible Code nagpatunghag daghang panagsumpaki. Si Dave Thomas, usa ka matematiko ug pisiko, nagpasundayag nga ang pagtuki sa bisan unsang teksto ginamit ang kompiyuter magpatungha ug morag misteryosong mga mensahe. Sa pagtuki sa teksto nga gisusi ni Drosnin, nakaplagan ni Thomas ang mga pulong nga nagkahulogang “natagong mga simbolo,” “kuwanggol,” ug “lansis.” “Ang natagong mga mensahe makaplagan bisan asa,” matod ni Thomas, “basta andam ka lang mogugol ug panahon ug kusog sa pagpanukiduki diha sa dakong natad sa tsansa.”

Tungod sa kapasidad niini sa paghimog daghan kaayong kalkulasyon, ang usa ka kompiyuter lagmit nga makakaplag ug pipila ka kombinasyon sa mga letra nga magamit ingong usa ka matang sa panagna. Apan kini nagkaatol lamang ug wala magpamatuod nga ang Bibliya adunay natagong mga mensahe. *

[Footnote]

[Hulagway sa panid 4]

Si Pythagoras nagtudlo nga ang tanang butang mahubit pinaagi sa mga numero

[Credit Line]

Courtesy National Library of Medicine