Ang mga Tigpalupalog Panapton sa Bamako

SA Bamako, ang kaulohan sa nasod sa Mali sa Kasadpang Aprika, usa ka way-bugto nga ritmikong pagbasal ang mabatian sa tibuok adlaw. Apan, kini wala ipatungha sa mga musikero. Hinunoa, ang morag pagbasal sa tambol nga tunog naggikan sa mga payag sa mga tigpalupalog panapton. Apan nganong pukpokon man nila ang mga panapton?

Ang mga tigpalupalog panapton mao ang kataposang hugna sa talagsaong pagproseso sa panapton. Kining tanan magsugod sa usa lamang ka piraso sa puting panapton. Kasagarang tinaon kini diha sa nagkalainlaing mga kolor ug mga disenyo. Dayon ituslob kini sa almirol nga ginama sa pinulbos nga balanghoy o sa duga sa nagkalainlaing mga kahoyng yukaliptos. Human kini mabulad sa adlaw, ang panapton mogahi sama sa tabla. Niining higayona, andam na kini alang sa kataposang hugna​—ang mga tigpalupalog panapton.

Ang pangunang trabaho sa mga tigpalupalog panapton mao ang pagpukpok sa migahi na nga panapton hangtod nga wala na kiniy kusnot. Sulod sa ilang mga payag, kasagarang makita nimo ang duha ka batan-ong mga lalaki nga nag-atbang paglingkod; sa ilang tunga anaay usa ka troso nga giputol gikan sa kahoyng shea. Ang mga lalaki magpahid ug diyutayng talo diha sa panapton ug bukharon kini ibabaw sa troso. Dayon, ginamit ang mga palupalo nga ginama usab gikan sa kahoyng shea, ilang pukpokon ang panapton. Nga magpulipulig hapak sa hanas nga paagi, ang matag usa mohapak sa lugar nga wala maigo sa lain.

Nganong dili na man lang mogamit ug plansa? Ang usa ka rason mao nga ang kainit gikan sa plansa mas daling makapalubad sa panapton. Gawas pa, ang plansa dili makapatungha ug mga kolor nga sama ka hayag sa ipatungha sa palupalo nga gigamit sa mga tigpalupalog panapton. Tungod kini kay ang matag hapak sa palupalo makahatag sa panapton ug kasinaw nga mopalutaw ug samot sa kolor. Human mapalupalog maayo, ang panapton mahimong hayag kaayong tan-awon nga makahunahuna ka nga kini bag-ong gipintalan.

Busa kon moagi ka sa kadalanan niining siyudara ug mabatian nimo ang morag way-bugto nga pagbasal sa tambol, susihag maayo ang mga payag sa imong palibot. Ang tunog lagmit wala gayod maggikan sa mga tambol; kini mahimong gikan sa mga tigpalupalog panapton sa Bamako.