Pagpangitag mga Solusyon

SUGOD sa 1972, ang kapin sa usa ka gatos ka nasod mipirmag internasyonal nga kasabotan nga nagdili sa pag-ugmad, paggama, ug pagpondog kagaw isip armas. Ang maong kasabotan, nga gitawag ug Biological and Toxin Weapons Convention (BTWC), mao ang unang nagdili sa enterong matang sa armas. Ang depekto niana mao nga napakyas kana sa paghan-ay ug paagi aron matino nga ang kalagdaan gisunod sa mga nasod.

Lisod nga masusi kon ang mga nasod tinuod ba nga wala mag-ugmad sa mga kagaw isip armas, sanglit ang samang mga teknik ug kahibalo nga gigamit alang sa malinawong mga katuyoan magamit man usab sa pag-ugmad sa mga kagaw isip armas. Tungod niining “dobleng gamit” nga kinaiya sa bioteknolohiya, sayon itago ang pag-ugmad sa armas diha sa mga planta sa permentasyon ug mga laboratoryo nga daw nagahimo ug sibilyang kalihokang uyon sa balaod.

Sa pagsulbad sa mga suliran bahin sa pagsusi, ang mga delegado sa nagkalainlaing mga nasod misugod sa paghikay sa obligadong internasyonal nga kasabotan niadtong 1995. Sulod sa kapin ug unom ka tuig, gihisgotan nila kon unsang tinong mga tikang ang pagahimoon aron maseguro nga gisunod sa mga nasod ang BTWC. Niadtong Disyembre 7, 2001, ang tulo-ka-semanang komperensiya nga gitambongan sa 144 ka grupong misalmot sa 1972 nga kasabotan natapos nga nagkagubot. Ang problema mao nga ang Tinipong Bansa wala mouyon sa pangunang mga sugyot bahin sa kon unsaon pagtino nga ang BTWC gisunod. Ang pagtugot nga ang mga tagagawas maoy magsusi sa ilang militaryo ug industriyal nga mga pasilidad, nangatarongan ang Tinipong Bansa, magladlad kanila sa pagpangespiya.

Kon Unsay Umaabot

Ang bioteknolohiya may daghang umaabot nga kagamitan alang sa kaayohan  ug sa kadaotan. Ang ubang dagkong mga teknolohiya​—bahin sa metal, mga bomba, internal combustion, abyasyon, elektroniks—​tanan gigamit dili lang alang sa malinawong mga katuyoan kondili alang usab sa makig-awayon nga mga katuyoan. Tinuod ba kini sa bioteknolohiya? Nagtuo ang daghang tawo nga ang tubag sa maong pangutana maoy oo.

Usa ka taho sa U.S. Commission on National Security sa 1999 miingon: “Ang mga indibiduwal ug mga grupo . . . mahimo unyang gamhanan ug impluwensiyado, ug ang daghan kanila makabaton unyag makahadlok nga kagamitan sa paglaglag nga magamit nila. . . . Aduna unyay daghang hitabo sa aktibistang mga grupo ug mga indibiduwal, nga kasagarang nahaling tungod sa relihiyosong kasibot, sa daw dili-masabtan nga mga tinuohan sa kulto, o sa nag-umido nga kayugot. Ang mga terorista makagamit na karon sa mga teknolohiya nga kaniadto gigamit lang sa dagkong mga nasod ug makaandam sa pag-atake sa mga dapit nga daghan ug tawo.”

Bisan pag wala kita mahibalo kon unsay mahitabo sa dili madugay, nahibalo kita kon unsay gitagana sa Diyos alang sa katawhan. Ang Bibliya nagsaad nga ang panahon moabot sa dihang ang katawhan sa yuta “magapuyo sa kasegurohan, nga walay usa nga magpakurog kanila.” (Ezequiel 34:28) Aron makasusi sa dugang pa bahin nianang makalipay nga saad, pakigkita sa mga Saksi ni Jehova sa inyong dapit o pagsulat sa nahiangayng adres sa panid 5 niining magasina.

[Hulagway sa panid 10]

Ang mga tigdukiduki nagaugmad ug mga paagi sa pagwagtang sa epekto sa anthrax

[Credit Line]

Photo courtesy of Sandia National Laboratories

[Hulagway sa panid 10]

Bioweapons Conference, Nobyembre 19, 2001, Switzerland

[Credit Line]

AP Photo/Donald Stampfli

[Mga hulagway sa panid 11]

Gisaad sa Bibliya nga modangat ang panahon nga ang tanan “magapuyo sa kasegurohan”