Nagbinugtong nga Ginikanan, Apan Wala Mag-inusara

“Sa dihang ang akong mga anak mamauli ug mohalog kanako ug moingon nga sila nahigugma kanako, mao kana ang kinamaayohang bahin sa pagkainahan.”—DORIS, USA KA NAG-INUSARANG INAHAN NGA MAY DUHA KA ANAK.

ANG nag-inusarang mga ginikanan madasig sa giingon sa Bibliya: “Ang mga anak maoy panalangin ug gasa gikan sa GINOO.” (Salmo 127:​3, Contemporary English Version) Ang mga anak nga gimatuto sa usay-ginikanan nga pamilya bililhon usab sa mga mata sa Diyos. Gusto sa atong Maglalalang nga molampos ang usay-ginikanan nga mga pamilya. Ang Bibliya nag-ingon bahin kaniya: “Siya magahatag ug kahupayan sa batang ilo-sa-amahan ug sa babayeng balo.” (Salmo 146:9) Ang nag-inusarang mga ginikanan makaseguro nga ang Diyos andam nga mopaluyo kanila.

Ang usa ka bata angayang matutuon diha sa mahigugmaon, luwas, ug may kasegurohan nga palibot nga magtugot kaniya sa pagtubo sa pisikal, emosyonal, ug espirituwal. Katungdanan ug pribilehiyo sa matag ginikanan nga gamiton sa Diyos sa pagbansay sa usa ka bata.

Nakaplagan sa daghang nag-inusarang mga ginikanan nga aron molampos gikinahanglan ang makugihong pag-ampo, makanunayong pagpadapat sa mga prinsipyo sa Bibliya, ug bug-os nga pagsalig kang Jehova. Nahiuyon kini sa tambag nga makita diha sa Salmo 55:22: “Itugyan ang imong palas-anon kang Jehova, ug siya magasapnay kanimo.”

Sa popanahon, ang mga apohan, lokal nga mga ansiyano, ug eksperyensiyadong mga ginikanan diha sa Kristohanong kongregasyon mahimong makatabang sa usay-ginikanan nga pamilya sa pagdumala sa malisod nga mga situwasyon. Tinuod, ang mga membro sa pamilya ug mga isigkamagsisimba dakog ikatabang sa pagpaluyo sa nag-inusarang mga ginikanan, apan ang pangunang hinatag-sa-Diyos nga responsibilidad nahasandig sa mga ginikanan sa bata. *

 Ikalipay, daghang nag-inusarang mga ginikanan ang nagmalamposon sa pagdumala sa talagsaong mga hagit sa ilang situwasyon ug pagmatuto ug responsable, buotan, mahinadlokon-sa-Diyos nga mga anak. Ang Pagmata! nakigsulti sa daghan kanila. Ania ang pipila sa mga butang nga parehong gihimo sa maong mga ginikanan.

• Maayong pagdumala sa panimalay. Ang malamposong nag-inusarang mga ginikanan nanglimbasog nga mahimong organisado ug naningkamot nga magkatakdo ang mga eskedyul. Hinungdanon ang hustong pagplano ug pag-organisar. Ang Bibliya nag-ingon: “Ang mga plano sa kugihan mosangpot gayod sa kaayohan.”​—Proverbio 21:5.

• Debosyon. Ang malamposon nga nag-inusarang mga ginikanan naghimo sa pamilyahanong kinabuhi nga usa sa ilang unang mga prioridad. Ilang gipunting ang pagtagad sa pag-una sa mga panginahanglan sa ilang mga anak inay sa ilaha.​—1 Timoteo 5:8.

• Usa ka timbang nga paagi sa pagbuhat sa mga butang. Ang malamposong nag-inusarang mga ginikanan dili magpakamenos ni magpadako sa mga problema; sila mangitag mga kasulbaran. Sila modawat sa mga kalisdanan ug maningkamot sa pagsagubang niana nga dili mobatig kaluoy sa kaugalingon o kayugot.

• Maayong komunikasyon. Ang malamposong nag-inusarang mga ginikanan nagdasig ug komunikasyon. Ilang gidasig ang klaro ug prangka nga pagpahayag sa mga hunahuna ug pagbati diha sa pamilya. Mao kiniy giingon sa usa ka nag-inusarang amahan bahin sa iyang mga anak: “Makigsulti ako kanila sa tanang higayon. Suod kaming magkauban sa dihang maghikay sa panihapon. Nianang panahona nga mosulti sila kanako sa ilang mga sekreto.”

• Pag-atiman sa kaugalingon. Bisan pa sa ilang pagkapuliki, giila sa malamposong nag-inusarang mga ginikanan nga hinungdanon ang pag-atiman sa ilang kaugalingong espirituwal, emosyonal, ug pisikal nga mga panginahanglan. Si Ethel, usa ka diborsiyada nga nag-inusarang inahan nga may duha ka anak, miingon: “Maningkamot ko sa paggahin ug panahon alang sa akong kaugalingon. Pananglitan, sa dihang ang usa ka higala motudlog musika sa mga bata, duna akoy usa ka oras para sa akong kaugalingon. Molingkod lang ko ug dili ablihan ang TV.”

• Usa ka positibong tinamdan. Ang malamposong nag-inusarang mga ginikanan naghupot ug positibong panglantaw ngadto sa pagkahimong ginikanan ug sa kinabuhi sa katibuk-an. Ilang makita ang positibong mga bahin diha sa malisod nga mga situwasyon. Ang usa ka nag-inusarang inahan nag-ingon: “Akong naamgohan nga ang pagkahimong nag-inusarang inahan dili diay makapahigawad.”

Mga Sugilanon sa Nag-inusarang mga Ginikanan nga Nagmalamposon

Epektibo ba kining mga prinsipyoha? Oo, ingon sa makita gikan sa daghang sugilanon sa nag-inusarang  mga ginikanan nga nagmalamposon. Si Gloria, usa ka diborsiyada, nag-inusara nga nagtrabahong inahan sa Inglaterra, nga gihisgotan sa nag-unang artikulo, nagmatuto ug duha ka anak nga lalaki ug usa ka anak nga babaye. Silang tulo nahimong bug-os-panahon nga Kristohanong mga ministro, nga naggugol sa ilang kinabuhi sa pagpalambo sa edukasyon sa Bibliya. Sa dihang gipangutana kon sa unsang paagi siya milampos, si Gloria miingon: “Ang unang suliran mao ang paglahutay sa pagdumala ug regular, makaiikag nga pamilyahanong pagtuon sa Bibliya. Gusto nakong ang mga bata magmalipayon, makabaton ug kalinaw sa hunahuna, magmakontento, ug mapanalipdan batok sa mga lit-ag. Nakakita ko ug trabaho sa magabii. Ang akong tumong mao nga makauban nako ang mga bata kon posible. Sa dili pa ko motrabaho, mag-ampo mi ingong pamilya ug ako silang pakatulgon. Ang akong iyaan magpabilin sa balay samtang ako nagtrabaho.”

Sa unsang paagi gitabangan ni Gloria ang iyang mga anak sa paghimo ug hustong mga prioridad? Siya mipadayon sa pag-ingon: “Ang akong kinadak-ang tumong mao ang pag-una sa espirituwal nga mga butang. Gamay ra ang among kuwarta, ug gipahibalo ko kini sa mga bata. Bisan unsa nga akong ipabuhat nila, buhaton ko usab, ug matinabangon silang tanan.” Naghinumdom kon sa unsang paagi nahuptan niyang suod ang pamilya, si Gloria nag-ingon: “Ang sekreto sa kalamposan mao ang paghimo sa mga butang nga magkauban. Walay magpalain sa iyang kaugalingon. Kami magluto, manglimpiyo, mangareglar nga magkauban. Among gibalanse ang among mga kalihokan. Kanunay nakong giseguro nga may paglulinghayaw usab.”

Si Carolyn, usa ka nag-inusarang inahan sa usa ka batang lalaki nga ginganlag Joseph, nalipay sa paagi sa pagdako sa iyang anak. Unsay sekreto ni Joan? “Dunganan namo pagbasa ang Bibliya sa dili pa matulog,” matod niya, “ug ako siyang pangutan-on kon unsay iyang nakat-onan. Dugang pa, among konsiderahon ang piniling mga parapo gikan sa pinasukad-sa-Bibliya nga mga publikasyon ug ipadapat kana sa personal. Nakatabang kini kang Joseph sa dihang siya nag-atubang ug mga problema, sama sa pagdaogdaog nga gihimo sa ubang kabataan diha sa eskuylahan.” Miangkon si Carolyn nga ang iyang kinabuhi dili gayod sayon, apan wala siya mobating nag-inusara. Siya miingon: “Kanunay akong makigbisog, apan akong gibati nga si Jehova nagtabang gayod kanako. Nakadawat usab ako ug daghang pagdasig gikan sa Kristohanong kongregasyon.”

Ang mga sugilanon sa libolibong nag-inusarang mga ginikanan nga nagmalamposon, sama kang Gloria ug Carolyn, nagpamatuod nga ang mga ginikanan karon makasalig sa epektibong mga prinsipyo sa Bibliya sa pagmatuto ug buotan, lig-on-sa-espirituwal nga mga anak. (Proverbio 22:6) Posibleng molampos! Ang pagkahimong nag-inusarang ginikanan adunay daghang suliran nga mahimong mga kahigayonan sa pag-uswag ug pagpaambit. Ang bug-os nga pagsalig sa Diyos ug pagkakombinsido nga siya motabang mao ang labing maayong paagi sa pagsagubang sa mga kapit-os sa pagkahimong nag-inusarang ginikanan.​—Salmo 121:1-3.

[Footnote]

[Mga hulagway sa panid 11]

Ang pamilyahanong pagtuon sa Bibliya nakatabang sa tulo ka anak ni Gloria nga mahimong bug-os-panahong Kristohanong mga ministro. Dinhi nagtan-aw sila sa usa ka sulat ug letrato gikan sa kamagulangang anak nga lalaki, nga karon nag-alagad na ingong misyonaryo

[Mga hulagway sa panid 12]

Si Carolyn ug ang iyang anak, si Joseph